ছচিয়েল মিডিয়া বা ডেটিং এপৰ জৰিয়তে গঢ়ি তোলা বন্ধুত্ব যে কেতিয়াবা বিপদৰ কাৰণ হৈ পৰিব পাৰে, তাৰ এক ভয়ংকৰ উদাহৰণ বেংগালুৰুত পোহৰলৈ আহিছে। এজন ২৭ বছৰীয়া চিভিল ইঞ্জিনিয়াৰ সমকামী ডেটিং এপ গ্ৰাইণ্ডাৰত এক গভীৰ ষড়যন্ত্ৰৰ বলি হ’ল। চাৰিজন দুষ্কৃতিকাৰীয়ে তেওঁক এপটোৰ জৰিয়তে প্ৰলোভন দি এঠাইত লগ কৰিবলৈ মাতি নিছিল আৰু তাৰ পিছত নৃশংসভাৱে আক্ৰমণ কৰিছিল। যোৱা বুধবাৰে বেংগালুৰু আৰক্ষীয়ে এই ঘটনাৰ সৈতে জড়িত চাৰিজন লোকক গ্ৰেপ্তাৰ কৰিছে।
আৰক্ষীৰ তথ্য অনুসৰি, ভুক্তভোগী যুৱকজনে যোৱা তিনি বছৰ ধৰি এই ডেটিং এপটো ব্যৱহাৰ কৰি আছিল। যোৱা শুকুৰবাৰে সন্ধিয়া এপটোত এজন ব্যক্তিৰ সৈতে তেওঁৰ চিনাকি হৈছিল। সেই অচিনাকি ব্যক্তিজনে তেওঁক পালনাহাল্লী গেটৰ ওচৰত দেখা কৰিবলৈ কৈছিল। সেই আহ্বানত সঁহাৰি জনাই সন্ধিয়া প্ৰায় ৭ বজাত যুৱকজনে বাছেৰে নিৰ্দিষ্ট স্থানত উপস্থিত হৈছিলগৈ।
সেই ঠাইত উপস্থিত হোৱাৰ লগে লগে চাৰিজন যুৱকে তেওঁক চাৰিওফালৰ পৰা ঘেৰি ধৰে। কিছু সময় কথা পতাৰ পিছত তেওঁক জোৰকৈ জামুনী লে-আউটৰ এক নিৰ্জন অঞ্চললৈ লৈ যোৱা হয়। তাত অভিযুক্তকেইজনে যুৱকজনক ধাৰাল চুৰি দেখুৱাই ভয় খুৱাবলৈ আৰম্ভ কৰে। তেওঁলোকে ভাবুকি দিছিল যে যদি তেওঁ তেওঁলোকৰ কথা নুশুনে, তেন্তে তেওঁৰ ব্যক্তিগত জীৱনৰ কথা পৰিয়াল আৰু বন্ধু-বৰ্গৰ আগত ৰাজহুৱা কৰি দিয়া হ’ব। ইয়াৰ পিছতে তেওঁলোকে যুৱকজনৰ পৰা টকা দাবী কৰে আৰু অকথ্য গালি-গালাজ আৰম্ভ কৰে।
যুৱকজনে বাধা দিবলৈ চেষ্টা কৰাত পৰিস্থিতি অধিক ভয়ংকৰ হৈ পৰে। দুষ্কৃতিকাৰীকেইজনে তেওঁক চুৰিৰে আঘাত কৰিবলৈ ধৰে। তেওঁৰ মূৰ, হাত আৰু পেটত কেইবাৰো চুৰিকাঘাত কৰা হয়। ৰক্তাক্ত অৱস্থাত যুৱকজনে পলাবলৈ চেষ্টা কৰিছিল যদিও চাৰিওজনে মিলি তেওঁক কাবু কৰি পেলায়। ইয়াৰ পিছত তেওঁৰ মোবাইল ফোনটো কাঢ়ি লৈ জোৰকৈ ইউপিআইৰ জৰিয়তে ১৬,০০০ টকা নিজৰ একাউণ্টলৈ ট্ৰেন্সফাৰ কৰি লৈ দুষ্কৃতিকাৰীকেইজন তাৰ পৰা পলায়ন কৰে।
আঘাতপ্ৰাপ্ত অৱস্থাত যুৱকজনে কোনোমতে তেওঁৰ এজন বন্ধুক ফোন কৰে আৰু তাৰ পিছত তেওঁক বেলাৰী ৰোডৰ এখন ব্যক্তিগত চিকিৎসালয়ত ভৰ্তি কৰা হয়। এই ঘটনা সন্দৰ্ভত ইয়েলাহাংকা থানাৰ আৰক্ষীয়ে ভাৰতীয় ন্যায় সংহিতাৰ ৩১১ নম্বৰ ধাৰাৰ অধীনত ডকাইতি আৰু হত্যাৰ চেষ্টাৰ গোচৰ ৰুজু কৰি তদন্ত আৰম্ভ কৰে।
অঞ্চলটোৰ চিচিটিভি ফুটেজ পৰীক্ষা কৰি আৰক্ষীয়ে চাৰিজন অভিযুক্তক চিনাক্ত কৰিবলৈ সক্ষম হয়। গ্ৰেপ্তাৰ হোৱা সকলৰ ভিতৰত দৰ্শন আৰু ৰাজেশ নামৰ দুজন ১৯ বছৰীয়া যুৱকো আছে। বাকী দুজন নাবালক হোৱাৰ বাবে তেওঁলোকৰ পৰিচয় গোপন ৰখা হৈছে। আৰক্ষীয়ে জনোৱা মতে, ধৃত চাৰিজন অভিযুক্তই আধাতে বিদ্যালয় ত্যাগ কৰিছিল। কেৱল হাত খৰচ আৰু নিচাযুক্ত দ্ৰব্যৰ বাবে টকা যোগাৰ কৰিবলৈকে তেওঁলোকে এই অপৰাধৰ পথ বাছি লৈছিল বুলি প্ৰাথমিক তদন্তত ধৰা পৰিছে।
এই ঘটনাই পুনৰবাৰ প্ৰমাণ কৰিলে যে অচিনাকি ব্যক্তিৰ সৈতে ছচিয়েল মিডিয়া বা ডেটিং এপত যোগাযোগ কৰাৰ ক্ষেত্ৰত কিমান সাৱধান হোৱা প্ৰয়োজন। আৰক্ষীয়ে জনসাৱধাৰণক অনুৰোধ কৰিছে যে এনে ধৰণৰ এপ ব্যৱহাৰ কৰাৰ সময়ত ব্যক্তিগত তথ্য বিনিময় কৰা বা কোনো নিৰ্জন স্থানত দেখা কৰাৰ আগতে যাতে সকলোৱে বাৰে বাৰে ভাবি চায়।
