তামিলনাডুৰ ৰাজনীতিত এক ঐতিহাসিক পৰিৱৰ্তনৰ সূচনা কৰি অভিনেতা বিজয়ৰ দল তামিলগা ভেট্ৰি কাজাগাম চমুকৈ টিভিকি এতিয়া চৰকাৰ গঠনৰ দিশে অগ্ৰসৰ হৈছে। যোৱা চাৰিদিন ধৰি চলি থকা তীব্ৰ ৰাজনৈতিক অচলাৱস্থাৰ অন্তত শুকুৰবাৰে সন্ধিয়া বিজয়ৰ চেন্নাইৰ বাসগৃহৰ সন্মুখত সমৰ্থকসকলে উল্লাস প্ৰদৰ্শন কৰে।
সূত্ৰৰ খবৰ অনুসৰি অহা বিধানসভাত চৰকাৰ গঠনৰ বাবে প্ৰয়োজনীয় সংখ্যাগৰিষ্ঠতা বিজয়ে লাভ কৰিছে আৰু আজি সন্ধিয়া তেওঁ ৰাজ্যপাল আৰ ভি আৰলেকাৰক সাক্ষাৎ কৰি চৰকাৰ গঠনৰ দাবী উত্থাপন কৰাৰ সম্ভাৱনা আছে।
চলিত নিৰ্বাচনত বিজয়ৰ দলে ২৩৪ খন আসনৰ ভিতৰত ১০৮ খন আসন লাভ কৰি যোৱা ৬২ বছৰ ধৰি তামিলনাডুৰ বুকুত চলি থকা ডিএমকে আৰু এআইএডিএমকেৰ আধিপত্য ভংগ কৰিবলৈ সক্ষম হয়। অৱশ্যে নিৰ্বাচনৰ ফলাফলত ১০৮ খন আসন লাভ কৰিলেও চৰকাৰ গঠনৰ বাবে প্ৰয়োজন হোৱা ১১৮ খন আসনৰ সংখ্যা বিজয়ৰ ওচৰত নাছিল। ইয়াৰ বাবেই ৰাজ্যপালে তেওঁক একক সংখ্যাগৰিষ্ঠতা প্ৰমাণ নকৰা পৰ্যন্ত চৰকাৰ গঠনৰ বাবে আমন্ত্ৰণ জনোৱা নাছিল। বিগত দুদিন ধৰি ৰাজ্যপালৰ সৈতে বিজয়ৰ বৈঠক চলিছিল যদিও ৰাজ্যপালে বিধায়কৰ সমৰ্থন পত্ৰ অবিহনে অনুমতি দিয়াৰ পৰা বিৰত আছিল।
বিজয়ৰ এই যাত্ৰাত এতিয়া কংগ্ৰেছ আৰু আন কেইবাটাও দলে সহায়ৰ হাত আগবঢ়াইছে। ডিএমকেৰ সৈতে থকা পুৰণি মিত্ৰতা ছেদ কৰি কংগ্ৰেছে বিজয়ক ৫ জন বিধায়কৰ সমৰ্থন আগবঢ়াইছে। অৱশ্যে ইয়াৰ বিনিময়ত বিজয়ে কোনো সাম্প্ৰদায়িক শক্তিৰ সৈতে মিত্ৰতা নকৰাৰ চৰ্ত আৰোপ কৰিছে। ইয়াৰ উপৰি ভিচিকি, চিপিআই আৰু চিপিআইএম দৰে দলসমূহেও বিজয়ক সমৰ্থন দিয়াৰ কথা প্ৰকাশ কৰিছে। প্ৰতিটো দলে দুখনকৈ আসন লাভ কৰি মুঠ ৬ খন আসনৰ সমৰ্থন পত্ৰ ইতিমধ্যে জমা দিছে। ইয়াৰ বিনিময়ত এই দলসমূহৰ প্ৰতিটোৱে নতুন কেবিনেটত এটাকৈ মন্ত্ৰী পদ লাভ কৰাৰ সম্ভাৱনা আছে।
বৰ্তমান ইণ্ডিয়ান ইউনিয়ন মুছলিম লীগৰ এজন আৰু টিটিভি ধিনাকৰণৰ দলৰ এজন বিধায়কৰ সমৰ্থন লাভ কৰাৰ পিছত বিজয়ৰ শক্তি এতিয়া ১২১ লৈ বৃদ্ধি পাইছে। ইয়াৰ বিপৰীতে ৰাজ্যখনৰ দুই শক্তিশালী দল ডিএমকে আৰু এআইএডিএমকেৰ মাজত মিত্ৰতা হ’ব পাৰে বুলি যি চৰ্চা চলিছিল সেয়া অৱশেষত বাস্তৱত পৰিণত নহ’ল। দুয়োটা দলৰ আদৰ্শগত পাৰ্থক্যৰ বাবে এই তথাকথিত অপবিত্ৰ মিত্ৰতা সম্ভৱ নহ’ল বুলি ৰাজনৈতিক বিশ্লেষকসকলে মত পোষণ কৰিছে। এই সমগ্ৰ ঘটনাক্ৰমে তামিলনাডুৰ ৰাজনীতিত এতিয়া এক নতুন যুগৰ সূচনা কৰিছে।
