তামিলনাডুৰ ৰাজনীতিত এক নতুন যুগৰ সূচনা কৰি দেওবাৰে ৰাজ্যখনৰ মুখ্যমন্ত্ৰী হিচাপে শপত গ্ৰহণ কৰিলে দক্ষিণৰ জনপ্ৰিয় ছুপাৰষ্টাৰ থলপতি বিজয়ে। শপত গ্ৰহণৰ পিছতেই জনসাধাৰণৰ উদ্দেশ্যে দিয়া তেওঁৰ প্ৰথমটো বাৰ্তাত তেওঁ নিজক এজন সাধাৰণ মানুহ বুলি পৰিচয় দিয়ে। বিজয়ে কয় যে এতিয়াৰ পৰা তামিলনাডুত ধৰ্মনিৰপেক্ষতা আৰু সামাজিক ন্যায়ৰ এক নতুন অধ্যায় আৰম্ভ হ’ল। তেওঁৰ এই চৰকাৰে জনসাধাৰণৰ স্বাৰ্থত কাম কৰিব বুলিও তেওঁ প্ৰতিশ্ৰুতি দিয়ে।
মুখ্যমন্ত্ৰী হিচাপে দায়িত্ব লৈয়েই বিজয়ে তামিলনাডুৰ ৰাইজৰ বাবে কেইবাটাও গুৰুত্বপূৰ্ণ ঘোষণা কৰিছে। ইয়াৰ ভিতৰত আটাইতকৈ উল্লেখযোগ্য হ’ল ৰাজ্যবাসীৰ বাবে বিনামূলীয়া বিদ্যুৎ সেৱা আগবঢ়োৱা আৰু মহিলাসকলৰ নিৰাপত্তাৰ বাবে এটা বিশেষ নাৰী সুৰক্ষা বাহিনী গঠন কৰা। চেন্নাইত দিয়া তেওঁৰ প্ৰথমটো ভাষণত তেওঁ স্পষ্টকৈ কয় যে শাসনৰ কেন্দ্ৰবিন্দুত কেৱল তেওঁ নিজেই থাকিব আৰু চৰকাৰৰ প্ৰতিটো নীতিৰ বাবে তেওঁ জনসাধাৰণৰ ওচৰত জবাবদিহি হ’ব।
পূৰ্বৰ ডিএমকে চৰকাৰক সমালোচনা কৰি বিজয়ে কয় যে বিগত চৰকাৰে ৰাজ্যখনৰ ওপৰত ১০ লাখ কোটি টকাৰ ঋণৰ বোজা জাপি দি থৈ গৈছে। এনে প্ৰত্যাহ্বানৰ মাজতো তেওঁ ৰাইজৰ সহায় আৰু সমৰ্থন বিচাৰিছে যাতে নিৰ্বাচনী প্ৰতিশ্ৰুতিসমূহ আখৰে আখৰে পালন কৰিব পৰা যায়। তেওঁ লগতে জনাইছে যে তেওঁৰ নেতৃত্বত থকা টিভিকে চৰকাৰে কোনো মিত্ৰজোঁটৰ হেঁচাত কাম নকৰে আৰু নিজৰ স্বতন্ত্ৰতা বজাই ৰাখিব।
অনুৰাগী আৰু জনসাধাৰণৰ প্ৰতি থকা মৰম প্ৰকাশ কৰি ছুপাৰষ্টাৰজনে তামিল ভাষাত এন নেনজিল কুডিয়িরুক্কুম বুলি সম্বোধন কৰে, যাৰ অৰ্থ হ’ল যিসকল মোৰ হৃদয়ত বাস কৰে। তেওঁ আৱেগিক হৈ কয় যে জনসাধাৰণেই তেওঁৰ জীৱন আৰু তেওঁলোকৰ অবিহনে বিজয়ৰ কোনো অস্তিত্ব নাই। ৰাইজৰ মংগলৰ বাবেই তেওঁ দিনে-নিশাই কাম কৰি যাব বুলিও দৃঢ়তাৰে ঘোষণা কৰে।
