তামিলনাডুত চৰকাৰ গঠনক লৈ চলি থকা টনা-আঁজোৰাৰ মাজতে এইবাৰ অভিনেতা তথা তামিলাগা ভেট্টি কাজাগাম চমুকৈ টিভিকে দলৰ মুৰব্বী থলপতি বিজয়ৰ বিৰুদ্ধে এক গুৰুতৰ অভিযোগ উত্থাপন হৈছে। বিজেপি আৰু এডিএমকেৰ সহযোগী দল আম্মা মক্কাল মুনেত্রা কাজাগামৰ প্রধান টিটিভি দীনকৰণে বিজয়ৰ বিৰুদ্ধে ৰাজ্যপালক ভুৱা সমৰ্থন পত্ৰ জমা দিয়াৰ অভিযোগ তুলি আৰক্ষীৰ ওচৰত এজাহাৰ দাখিল কৰিছে। চেন্নাইৰ গুইণ্ডি থানাত দিয়া এই অভিযোগত কোৱা হৈছে যে চৰকাৰ গঠনৰ দাবী জনাবলৈ বিজয়ে যিখন সমৰ্থন পত্ৰ ব্যৱহাৰ কৰিছে সেয়া সম্পূৰ্ণৰূপে ভুৱা। দীনকৰণ হৈছে তামিলনাডুৰ প্ৰয়াত মুখ্যমন্ত্ৰী জয়ললিতাৰ বান্ধৱী শশীকলাৰ ভতিজাক আৰু বৰ্তমান এএমএমকে দলৰ মুৰব্বী।
দীনকৰণৰ অভিযোগ অনুসৰি বিজয়ে ৰাজ্যপালৰ ওচৰত ১১৯ গৰাকী বিধায়কৰ সমৰ্থন থকাৰ যিখন তালিকা জমা দিছে তাত এএমএমকে দলৰ বিধায়ক এছ কামৰাজৰ নামো অন্তৰ্ভুক্ত কৰা হৈছে। কিন্তু কামৰাজে তেনেকুৱা কোনো সমৰ্থন পত্ৰত স্বাক্ষৰ কৰা নাই বুলি দীনকৰণে দাবী কৰিছে। তেওঁ স্পষ্টকৈ কৈছে যে ৰাজ্যপালৰ ওচৰত জমা দিয়া সমৰ্থন পত্ৰৰ ফটোকপিটোত জালিয়াতি কৰা হৈছে। আনকি আন এটা দল ভিসিকৰ নেতা থল তিৰুমালব্যনেও জনাইছে যে বিজয়ক সমৰ্থন কৰাৰ সন্দৰ্ভত তেওঁলোকে এতিয়ালৈকে কোনো চূড়ান্ত সিদ্ধান্ত লোৱা নাই। যদিও ইয়াৰ আগদিনা বিজয়ে তেওঁৰ চৰকাৰক দলিত দলটোৱে সমৰ্থন কৰিব বুলি দাবী কৰিছিল।
তামিলনাডুৰ শেহতীয়া নিৰ্বাচনত বিজয়ে সাত দশকৰ পুৰণি ডিএমকে আৰু এডিএমকেৰ আধিপত্য ভংগ কৰি সকলোকে আচৰিত কৰি দিছে। ২৩৪ খন আসনৰ তামিলনাডু বিধানসভাত চৰকাৰ গঠনৰ বাবে ১১৮ খন আসনৰ প্ৰয়োজন যদিও এইবাৰ কোনো এটা দলেই একক সংখ্যাগৰিষ্ঠতা লাভ কৰিবলৈ সক্ষম হোৱা নাই। অৱশ্যে বিজয়ৰ টিভিকে দলে ১০৮ খন আসনত জয়লাভ কৰি একক বৃহত্তম দল হিচাপে আত্মপ্ৰকাশ কৰিছে। যিহেতু বিজয়ে নিজে দুখন আসনত জয়ী হৈছে সেয়েহে বৰ্তমান তেওঁৰ দলৰ বিধায়ক সংখ্যা ১০৭ জন। আনহাতে ডিএমকে-কংগ্ৰেছ-বাম মিত্ৰজোঁটে ৭৪ খন আৰু এডিএমকে-বিজেপি জোঁটে ৫৩ খন আসন লাভ কৰিছে।
ৰাজনৈতিক পৰিস্থিতি অধিক জটিল হৈ পৰিছে কাৰণ ডিএমকে ৫৯ খন আসনত জিকিলেও দলৰ মুৰব্বী এম কে ষ্টেলিন পৰাজিত হৈছে। চৰকাৰ গঠনৰ বাবে যিহেতু বিজয়ৰ হাতত প্ৰয়োজনীয় সংখ্যক বিধায়ক নাই সেয়েহে তেওঁ বিভিন্ন দলৰ সমৰ্থন বিচাৰিছে। কংগ্ৰেছ আৰু বাওঁ দলসমূহে ইতিপূৰ্বে বিজয়ক সমৰ্থন দিয়াৰ কথা ঘোষণা কৰিছে যদিও ৰাজ্যপাল বিশ্বনাথ আৰ্লেকাৰে এতিয়ালৈকে তেওঁক শপত গ্ৰহণৰ বাবে আমন্ত্ৰণ জনোৱা নাই। ৰাজ্যপালৰ মতে ১১৮ জন বিধায়কৰ স্পষ্ট সমৰ্থন নোপোৱালৈকে তেওঁ চৰকাৰ গঠনৰ অনুমতি দিব নোৱাৰে। এনে এক সন্ধিক্ষণতে সমৰ্থন পত্ৰ জালিয়াতিৰ এই অভিযোগে বিজয়ৰ বাবে চৰকাৰ গঠনৰ পথ অধিক কঠিন কৰি তুলিছে।
