তামিলনাডুৰ ৰাজনীতিত এতিয়া আটাইতকৈ চৰ্চিত বিষয় হৈছে অভিনেতাৰ পৰা ৰাজনীতিবিদ হোৱা বিজয় আৰু তেওঁৰ দল টিভিকে। ৰাজ্যখনৰ বিধানসভা নিৰ্বাচনত প্ৰথমবাৰৰ বাবে অংশ লৈয়ে টিভিকে একক বৃহত্তম দল হিচাপে আত্মপ্ৰকাশ কৰিছে। কিন্তু চৰকাৰ গঠনৰ দাবী জনাবলৈ যাওঁতে এটা কাৰিকৰী ভুলৰ বাবেই বিজয়ে মুখ্যমন্ত্ৰী হোৱাৰ সুযোগ হেৰুৱাব লগা হৈছে নেকি বুলি এতিয়া সৰ্বত্ৰে আলোচনা চলিছে। ৰাজনৈতিক মহলত এই লৈ বিভিন্ন ধৰণৰ প্ৰশ্ন উত্থাপন হৈছে।
সূত্ৰ অনুসৰি যোৱা ৬ মে’ত ৰাজ্যপালৰ ওচৰত চৰকাৰ গঠনৰ দাবী জনাবলৈ যাওঁতে বিজয়ে যিখন পত্ৰ জমা দিছিল তাতে কিছু খেলি-মেলি আছিল। সেই পত্ৰখনত কেৱল টিভিকেৰ ১০৮ জন বিধায়কৰ স্বাক্ষৰেই নহয় লগতে কংগ্ৰেছৰ বিধায়কসকলৰো স্বাক্ষৰ আছিল। বিশেষজ্ঞসকলৰ মতে এইটোৱেই বিজয়ৰ বাবে এক ডাঙৰ কৌশলগত ভুল হিচাপে পৰিগণিত হৈছে। কাৰণ একক বৃহত্তম দল হিচাপে চৰকাৰ গঠনৰ দাবী জনালে প্ৰথমে কেৱল টিভিকেৰ বিধায়কসকলৰ সমৰ্থনৰ তালিকাখনহে জমা দিব লাগিছিল।
ৰাজনৈতিক বিশ্লেষকসকলৰ মতে বিজয়ৰ পত্ৰখনত কংগ্ৰেছৰ বিধায়কৰ স্বাক্ষৰ থকাৰ বাবে ৰাজ্যপালে ইয়াক এক মিত্ৰজোঁটৰ চৰকাৰ গঠনৰ দাবী হিচাপে গণ্য কৰিছে। যাৰ বাবে ৰাজ্যপালে বিজয়ক চৰকাৰ গঠনৰ বাবে প্ৰয়োজনীয় সংখ্যাগৰিষ্ঠতা অৰ্থাৎ ১১৮ জন বিধায়কৰ সমৰ্থনৰ প্ৰমাণ দিবলৈ কয়। ইয়াৰ পিছত দ্বিতীয়বাৰৰ বাবে ৰাজ্যপালৰ সৈতে বৈঠক অনুষ্ঠিত হয় যদিও কোনো সমাধান নোলাল। তামিলনাডু লোক ভৱনৰ পৰা জনোৱা হৈছে যে বিজয়ে চৰকাৰ গঠনৰ বাবে প্ৰয়োজনীয় সংখ্যাগৰিষ্ঠতাৰ প্ৰমাণ দিব পৰা নাই। এই সমগ্ৰ ঘটনাক কেন্দ্ৰ কৰি ৰাজনৈতিক বিতৰ্ক এতিয়া তীব্ৰতৰ হৈ পৰিছে।
বহুতো ৰাজনৈতিক পৰ্যবেক্ষকে ক’ব বিচাৰে যে যদিহে বিজয়ে প্ৰথমে কেৱল টিভিকেক একক বৃহত্তম দল হিচাপে দাঙি ধৰিলেহেঁতেন তেন্তে পৰিস্থিতি আজি বেলেগ হ’লহেঁতেন। ছ’চিয়েল মিডিয়াতো এই লৈ বিভিন্ন প্ৰতিক্ৰিয়া দেখা গৈছে। একাংশ লোকৰ মতে এজন সঠিক ৰাজনৈতিক উপদেষ্টা থকা হ’লে বিজয়ে হয়তো আজি শপত গ্ৰহণ কৰিবলৈ সক্ষম হ’লহেঁতেন। ৫১ বছৰীয়া বিজয়ৰ বাবে এয়া আছিল প্ৰথমটো ডাঙৰ নিৰ্বাচন আৰু তেওঁৰ দল টিভিকেৰ ইয়াৰ আগতে কোনো নিৰ্বাচনী অভিজ্ঞতা নাছিল। আনকি স্থানীয় পৌৰসভা নিৰ্বাচনতো দলটোৱে আগতে অংশ লোৱা নাছিল। মন কৰিবলগীয়া যে টিভিকেৰ বিধায়কসকলৰ গড় বয়স মাত্ৰ ৪৪ বছৰ।
আনহাতে ৰাজ্যপালৰ এই সিদ্ধান্ত সাংবিধানিকভাৱে শুদ্ধ নে ভুল সেই লৈও প্ৰশ্ন উত্থাপন হৈছে। বিৰোধী দলসমূহে অভিযোগ তুলিছে যে ৰাজ্যপালে কেন্দ্ৰীয় চৰকাৰৰ হেঁচাত পৰিহে এনে কাম কৰিছে। সংবিধান বিশেষজ্ঞসকলৰ মাজতো এই বিষয়ত মতভেদ দেখা গৈছে। জ্যেষ্ঠ অধিবক্তা নীৰজ কিষাণ কলৰ মতে সংবিধানৰ ১৬৩ অনুচ্ছেদ অনুসৰি চৰকাৰ গঠনৰ বাবে আমন্ত্ৰণ জনোৱাৰ ক্ষেত্ৰত ৰাজ্যপালৰ কিছুমান বিশেষ ক্ষমতা থাকে। কিন্তু আনহাতে প্ৰাক্তন এটৰ্নী জেনেৰেল মুকুল ৰোহতগী আৰু কংগ্ৰেছ নেতা অভিষেক মনু সিংভিৰ মতে একক বৃহত্তম দলৰ নেতা হিচাপে বিজয়কহে প্ৰথমে চৰকাৰ গঠনৰ বাবে আমন্ত্ৰণ জনাব লাগিছিল।
বৰ্তমান তামিলনাডুৰ ৰাজনৈতিক সমীকৰণ অতি জটিল হৈ পৰিছে। ৰাজনৈতিক মহলত এই চৰ্চাও চলিছে যে বহু দিনৰ প্ৰতিদ্বন্দ্বী ডিএমকে আৰু এআইএডিএমকে দল দুটা একেলগ হ’ব পাৰে। এতিয়া সকলোৰে চকু ৰাজ্যপালৰ পৰৱৰ্তী সিদ্ধান্তৰ ওপৰত নিৱদ্ধ হৈ আছে যে তেওঁ এই জটিল পৰিস্থিতি কেনেকৈ সমাধান কৰে।
