তীক্ষ্ণ বুদ্ধি আৰু ইংৰাজী শব্দৰ উৎকৃষ্ট ব্যৱহাৰৰ বাবে ভাৰতীয় ৰাজনীতিত তেওঁ পৰিচিত। কংগ্ৰেছৰ সাংসদ শশী থাৰুৰে এতিয়া প্ৰধানমন্ত্ৰী নৰেন্দ্ৰ মোডী আৰু কেন্দ্ৰীয় গৃহমন্ত্ৰী অমিত শ্বাহক অভূতপূৰ্ব প্ৰশংসা কৰিছে।
অসম আৰু পশ্চিমবংগত বিজেপিৰ বিপুল সফলতাৰ পৰিপ্ৰেক্ষিতত থাৰুৰে এতিয়া মুকলিকৈ স্বীকাৰ কৰিছে যে মোডী-শ্বাহৰ যুটিটো নিৰ্বাচনী যুঁজত অতি দক্ষ আৰু পেছাদাৰী।
সোমবাৰে সৰ্বভাৰতীয় সংবাদ মাধ্যমক দিয়া এক সাক্ষাৎকাৰত থাৰুৰে কয়, “প্ৰধানমন্ত্ৰী মোডী আৰু অমিত শ্বাহে অসম আৰু পশ্চিমবংগত অতি ভাল কাম কৰিছে। ইয়াৰ কাৰণৰ এটা অংশ হ’ল তেওঁলোক নিৰ্বাচন পৰিচালনা কৰাত অতি পাকৈত। তেওঁলোক অতি পেছাদাৰী আৰু তেওঁলোকৰ সাংগঠনিক শক্তিও আকৰ্ষণীয়।”
থাৰুৰৰ মতে বিজেপিয়ে যি ধনবল আৰু জনশক্তিৰে প্ৰচাৰৰ আয়োজন কৰে সেয়া অতি নিখুঁত।
তিৰুৱনন্তপুৰমৰ সাংসদগৰাকীয়েও বিশ্বাস কৰে যে বিজেপিৰ নির্বাচনী ক্ষেত্রত অশ্বমেধৰ ঘোঁৰাৰ দৌৰৰ পৰা বিৰোধীয়ে বহুখিনি শিকিবলগীয়া আছে৷ তেওঁ কয় যে বিজেপিৰ এই পৰিকল্পনা আৰু প্ৰচাৰ পৰিচালনাৰ পৰা আমি সকলোৱে কিবা এটা শিকিবলগীয়া আছে। অৱশ্যে প্ৰশংসাৰ লগতে তেওঁ এটা সতৰ্কবাণীও দিয়ে।
থাৰুৰৰ ভাষাত “মই মাথোঁ আশা কৰিছো যে তেওঁলোকৰ (বিজেপি) বিজয়ৰ বাৰ্তাই যেন দেশবাসীক একত্ৰিত কৰে, বিভাজন নকৰে।”
আনহাতে, থাৰুৰেও নিজৰ ৰাজ্য কেৰালাৰ ফলাফলৰ বিষয়ে মুকলিকৈ ক’লে। তাত কংগ্ৰেছ নেতৃত্বাধীন ইউডিএফে বাওঁ মৰ্চাৰ (এল ডি এফ)ক স্থানচ্যুত কৰি যাদুকৰী সংখ্যা অতিক্ৰম কৰিছে। থাৰুৰে অনুভৱ কৰে যে বাওঁপন্থী শাসনৰ এটা দশকৰ পাছত মানুহে পৰিৱৰ্তনৰ দাবী জনাইছে। অৱশ্যে কেইবাজনো হেভিৱেট নেতা পিছ পৰি থকাৰ বাবে তেওঁ অলপ সতৰ্ক।
কেৰেলাৰ পৰৱৰ্তী মুখ্যমন্ত্ৰী কোন হ’ব সেই প্ৰশ্নৰ উত্তৰত থাৰুৰে কয় যে ফলাফল চূড়ান্ত হোৱাৰ পিছত নৱনিৰ্বাচিত বিধায়কসকলৰ সৈতে আলোচনা কৰি দলৰ শীৰ্ষ নেতৃত্বই সামূহিকভাৱে সিদ্ধান্ত ল’ব।
শশী থাৰুৰ সাধাৰণতে ৰাষ্ট্ৰীয় ৰাজনীতিত মোডী চৰকাৰৰ কঠোৰ সমালোচক হিচাপে পৰিচিত। কিন্তু ২০২৬ চনৰ বৃহৎ নিৰ্বাচনী ফলাফলৰ পিছত মোডী-শ্বাহৰ ‘নিৰ্বাচন ব্যৱস্থাপনা’ৰ প্ৰতি তেওঁৰ অকপট প্ৰশংসাই ৰাজনৈতিক মহলত এক নতুন চৰ্চাৰ সূত্ৰপাত কৰিছে। বহুতে বিশ্বাস কৰে যে বিজেপিৰ অদম্য অপপ্ৰচাৰ যন্ত্ৰৰ শক্তিক এতিয়া কংগ্ৰেছৰ ভিতৰতো স্বীকৃতি দিয়া হৈছে।
