‘যোৱা কেইদিনত চিংগাপুৰৰ পৰাই সামাজিক মাধ্যমত সাংসদ গৌৰৱ গগৈৰ বিৰুদ্ধে ৭/৮ টা টুইট কৰি অভিযোগ অনাৰ আৰম্ভ কৰা মুখ্যমন্ত্ৰী ডাঙৰীয়া উভতি আহিয়েই গুৱাহাটীৰ পৰা এইবাৰ সামাজিক মাধ্যম আৰু ইলেকট্ৰনিক সংবাদ মাধ্যমৰ সন্মুখত কেইবাটাও প্ৰশ্ন উত্থাপন কৰিছে । আমি তেওঁক আদৰণী জনাইছো।
কিন্ত্ত, মুখ্যমন্ত্ৰীৰ প্ৰশ্ন আৰু তেওঁৰ নিত্য-নতুন কল্প কাহিনীৰ উত্তৰ দিয়াৰ পূৰ্বে আমি মুখ্যমন্ত্ৰী ডাঙৰীয়াক ওলোটাই প্ৰশ্ন কৰিব বিচাৰিছো যে আপুনি কোন উৎসৰ পৰা পাকিস্তানী উচ্চায়ুক্ত আৰু সাংসদ গগৈৰ সহিতে ছাত্ৰ-ছাত্ৰীসকল বহি থকা ফটোখন লাভ কৰিছিল ? যাৰ ওপৰত ভিত্তি কৰি আপুনি সাংসদ গগৈক জবাবদিহি কৰিব বিচাৰিছে ? ইয়াৰ ভিত্তি কি ?
কোনে আপোনাক এই ফটোৰ যোগান ধৰিছিল ? নে আপোনাৰ নিৰ্দেশতেই এনেদৰে ফটোখন সামাজিক মাধ্যমত প্ৰচাৰ কৰা হৈছিল ?এই কথা আপুনি অসমবাসী ৰাইজক স্পষ্টকৈ জনাব পাৰিবনে ? তেতিয়াই অসমৰ ৰাইজে প্ৰকৃত সত্য উন্মোচন কৰিব পাৰিব।
কাৰণ,আমি দৃঢ়তাৰে ক’ব পাৰো যে আপুনি সামাজিক মাধ্যমত প্ৰচাৰ কৰা উক্ত ফটোখনেই ভূৱা বা মূল ফটোখনৰ পৰিবৰ্তন কৰা ফটো। যাক ইংৰাজীত Morph বা বিকৃত কৰা বুলিও ক’ব পাৰি।সাংসদ গগৈৰ ভাবমুৰ্তি ম্লান কৰাৰ ই আপোনাৰ এক সম্পূৰ্ণৰূপে উদ্দেশ্য প্ৰণোদিত আৰু সু-পৰিকল্পিত ষড়যন্ত্ৰ । ইয়াৰ সপক্ষত আমি দুটা প্ৰমাণ ৰাইজৰ সন্মুখত তলত দাঙি ধৰিলো :-
১) সাংসদ গগৈয়ে ইতিমধ্যেই কৈছে যে বিশ্বৰ বিভিন্ন দেশৰ দিল্লীস্হ উচ্চায়ুক্ত আৰু ৰাষ্ট্ৰদূত সকলক সাক্ষাৎ কৰি Series of Lecture বা মত-বিনিময়ৰ কাৰ্যসূচীৰ অংশস্বৰুপে ২০১৫ চনৰ ৯ চেপ্তেম্বৰ তাৰিখে নতুন দিল্লীত পাকিস্তানী উচ্চায়ুক্তৰ সৈতে Youth Forum on Foreign Policy ৰ সদস্য ছাত্ৰ-ছাত্ৰীসকলৰ সৈতে তেওঁ মত বিনিময় অনুষ্ঠানত উপস্হিত আছিল।
এই কাৰ্যসূচীৰ এটি বাতৰি ৰাষ্ট্ৰীয় সংবাদ পত্ৰ The Hindu ত ফটোসহ প্ৰকাশ হৈছিল। ফটোখনৰ image ID হৈছে 166416353. লক্ষণীয় ভাবে এই ফটোখনত উচ্চায়ুক্ত আৰু সাংসদ গগৈ বহি থকাৰ পাছফালে থকা বেনাৰখনত লিখা আছে – PAKISTAN HIGH COMMISSION, LECTURE SERIES,NEW DELHI .
২) ঠিক তেনেদৰে YFFP ৰ নিজা Facebook page তো তেওঁলোকে উক্ত কাৰ্যসূচীৰ ফটো ১০ চেপ্তেম্বৰ ২০১৫ তাৰিখে আপলোড কৰিছিল। সেইসমূহ ফটো চালেও দেখিব যে পাকিস্হানী উচ্চায়ুক্ত আৰু সাংসদ গগৈ বহি থকাৰ পাছফালে বেনাৰখনত লিখা আছে PAKISTAN HIGH COMMISSION, LECTURE SERIES,NEW DELHI .
আনহাতেদি, আমাৰ মুখ্যমন্ত্ৰী ডাঙৰীয়াই সামাজিক মাধ্যমত প্ৰচাৰ কৰি থকা ফটোখনত দেখিব যে বেনাৰখনত মাথো লিখা আছে PAKISTAN HIGH COMMISSION, NEW DELHI বুলিহে । মাজত থকা LECTURE SERIES শাৰীটো নাই। আচৰিত কথা নহয় নে ? কোনোবাই morph বা edit নকৰিলে সেই শাৰীতো হেৰাই যোৱাৰ প্ৰশ্নই নুঠে। আমি সাধাৰণ মানুহ, Technical কথা ইমান বুজি নাপাঁও। তথাপি,এই যুক্তিতেই আপোনাৰ বিৰুদ্ধে আইনী ব্যৱস্হা গ্ৰহণ কৰিব নালাগে নে ?
এতিয়া লাখটকীয়া প্ৰশ্নটো হ‘ল যে এখন ৰাষ্ট্ৰীয় সংবাদ পত্ৰত প্ৰকাশ পোৱা আৰু অনুষ্ঠানটোৰ আয়োজনৰ সৈতে জড়িত YFFP এ ২০১৫ চনতে নিজৰ অফিচিয়েল সামাজিক মাধ্যমত দিয়া ফটোবিলাক অসমৰ ৰাইজে বিশ্বাস কৰিব, নে মুখ্যমন্ত্ৰীয়ে উদ্দেশ্যে প্ৰণোদিত ভাবে সামাজিক মাধ্যমত প্ৰচাৰ কৰা ফটোখন বিশ্বাস কৰিব ?
সেয়েহে,মুখ্যমন্ত্ৰী ডাঙৰীয়াক বিনম্ৰতাৰে অনুৰোধ জনাইছো যে আনক প্ৰশ্ন কৰাৰ পূৰ্বে প্ৰথমে আপুনি ফটোখন লাভ কৰা উৎসতো ৰাজহুৱা কৰক। এইয়া আপোনাৰ উদ্দেশ্যে প্ৰণোদিত সুপৰিকল্পিত ষড়যন্ত্ৰ নে আপোনাকো গুজৰাটী Peddlar এ টুপী(?) পিন্ধালে ? আপুনি ইয়াৰ স্পষ্টীকৰণ দিয়ক ,তাৰ পাছতহে আপোনাৰ প্ৰশ্নৰ উত্তৰ দিয়াৰ যুক্তি আছে বুলি অনুভৱ কৰো।
Don’t Underestimate the Intelligence of the Assamese People.’
