ভূমি অধিকাৰ আন্দোলনৰ অগ্ৰণী নেতা তথা বৰদুৱাৰ বাগান ভূমি পট্টন দাবী সমিতিৰ উপদেষ্টা আদিত চন্দ্ৰ ৰাভাক গুৱাহাটী উচ্চ ন্যায়ালয়ে জামিন প্ৰদান কৰাত সন্তুষ্টি প্ৰকাশ কৰিছে ভূমি অধিকাৰ যৌথ সংগ্ৰাম সমিতিয়ে। সংগঠনটোৱে লগতে অসমৰ ভূমি অধিকাৰৰ দাবীত গণতান্ত্ৰিক সংগ্ৰাম অধিক তীব্ৰতৰ কৰাৰ ঘোষণা কৰিছে।
এক প্ৰেছ বিজ্ঞপ্তিত সমিতিৰ আহ্বায়ক গোবিন্দ চন্দ্ৰ ৰাভা আৰু সুব্ৰত তালুকদাৰে কয় যে, ৰাভা হাছঙৰ থলুৱা লোকক উচ্ছেদ কৰি ‘চেটেলাইট টাউনশ্বীপ’ নিৰ্মাণৰ বিৰুদ্ধে জনসাধাৰণক সংগঠিত কৰাৰ বাবেই অসম চৰকাৰে ষড়যন্ত্ৰমূলকভাৱে আদিত চন্দ্ৰ ৰাভাক গ্ৰেপ্তাৰ কৰি কাৰাগাৰলৈ প্ৰেৰণ কৰিছিল বুলি তেওঁলোকে অভিযোগ কৰে।
সমিতিয়ে অভিযোগ কৰে যে নিজৰ প্ৰাপ্য অধিকাৰৰ বাবে মাত মাতিলেই চৰকাৰৰ দৃষ্টিত মানুহক অপৰাধী সজোৱাৰ চেষ্টা কৰা হৈছে। একে ধৰণৰ অভিযোগ উত্থাপন কৰি সংগঠনটোৱে কয় যে বৃহৎ হোটেল নিৰ্মাণৰ বিৰোধিতা কৰাৰ বাবেই প্ৰণৱ দলেক ৰাষ্ট্ৰীয় নিৰাপত্তা আইনৰ অধীনত গ্ৰেপ্তাৰ কৰি কাৰাগাৰত ৰখা হৈছে।
বিজ্ঞপ্তিটোত সমিতিয়ে অসম চৰকাৰক বৃহৎ পুঁজিপতিৰ স্বাৰ্থৰ পক্ষ লোৱাৰ অভিযোগ উত্থাপন কৰি কয় যে চৰকাৰৰ বিৰুদ্ধে মাত মাতিলে জনসাধাৰণৰ কণ্ঠ ৰুদ্ধ কৰাৰ চেষ্টা চলোৱা হৈছে।
ইফালে, ভূমি অধিকাৰ যৌথ সংগ্ৰাম সমিতিয়ে স্পষ্ট কৰি দিয়ে যে অসমৰ মানুহৰ ভূমি অধিকাৰৰ স্বাৰ্থত তেওঁলোকৰ গণতান্ত্ৰিক সংগ্ৰাম অব্যাহত থাকিব। আদিত চন্দ্ৰ ৰাভাৰ কাৰাগাৰৰ পৰা মুক্তিয়ে আগন্তুক সংগ্ৰামক অধিক উৎসাহিত কৰিছে বুলিও সমিতিয়ে উল্লেখ কৰে।
আদিত চন্দ্ৰ ৰাভাৰ হৈ আইনী যুঁজ আগবঢ়োৱা গুৱাহাটী উচ্চ ন্যায়ালয়ৰ জ্যেষ্ঠ অধিবক্তা শান্তনু বৰঠাকুৰ আৰু তেওঁৰ সহযোগীসকলক সমিতিয়ে কৃতজ্ঞতা জ্ঞাপন কৰে। লগতে ‘ন্যায় আৰু অধিকাৰৰ’ হকে মাত মাতি এই জটিল সময়ত সমৰ্থন আগবঢ়োৱা অসমবাসীলৈও সংগঠনটোৱে ধন্যবাদ জ্ঞাপন কৰে।
