অসম বিধান সভাৰ প্ৰাক্তন উপাধ্যক্ষ তথা বোকাখাত বিধান সভা সমষ্টিৰ প্ৰাক্তন বিধায়ক আৰু কীৰ্তি শিক্ষক বলোভদ্ৰ তামুলীৰ ৮০ সংখ্যক জন্মদিনৰ লগত সংগতি ৰাখি ২১ অক্টোবৰত বোকাখাতৰ পুৱতি সাহিত্য সভা ভৱনত এক বিশেষ অনুষ্ঠানৰ আয়োজন কৰা হয় ৷
এই অনুষ্ঠানতে বলোভদ্ৰ তামুলীৰ জীৱনৰ বিভিন্ন দিশ সামৰি প্ৰকাশিত এখন অভিনন্দন গ্ৰন্থও উন্মোচন কৰা হয় ৷ বোকাখাতৰ অৱসৰ প্ৰাপ্ত অধ্যাপক শৈলেন তামুলীৰ পৌৰোহিত্য অনুষ্ঠিত এই অনুষ্ঠানত বন্তি প্ৰজ্বলন কৰে স্থানীয় জে ডি এছ জি মহাবিদ্যালয়ৰ প্ৰাক্তন অধ্যক্ষ ড৹ বিভা বৰাই ৷
অনুষ্ঠান উদ্বোধন কৰে পুৱতি সাহিত্য সভাৰ প্ৰাক্তন সভাপতি কল্পনা চেতিয়াই ৷ অনুষ্ঠানত অসমৰ প্ৰাক্তন মুখ্য মন্ত্ৰী প্ৰফুল্ল কুমাৰ মহন্ত, জ্যেষ্ঠ সাংবাদিক ভৱেশ শইকীয়া, সাহিত্যিক পেঞ্চনাৰ অন্নদা শইকীয়া, গোলাঘাট জিলা সাহিত্য সভাৰ প্ৰক্তন সভাপতি মহেশ্বৰ শইকীয়া, কীৰ্তি শিক্ষক ৰাতুল শইকীয়া, মহকুমাধিপতি বিবেক শ্যাম, পুৱতি সাহিত্য সভাৰ সভাপতি অপূৰ্ব বৰদলৈ, বোকাখাত জিলা চুতীয়া জাতি সন্মিলনৰ সভাপতি প্ৰতাপ বৰাকে ধৰি বিশিষ্ট ব্যক্তি সকল উপস্থিত থাকে ৷
এই অনুষ্ঠানতে অধ্যাপক প্ৰশান্ত শইকীয়াৰ সম্পাদনাত প্ৰকাশিত অভিনন্দন গ্ৰন্থ ‘মৃত্যুঞ্জয়ী’ আনুষ্ঠানিকভাৱে উন্মোচন কৰে জ্যেষ্ঠ সাংবাদিক ভৱেশ শইকীয়াই ৷ পুৱতি সাহিত্য সভাৰ সম্পাদক গীতাঞ্জলি কলিতাই আঁত ধৰা এই অনুষ্ঠানত বোকাখাতৰ বিভিন্ন দল-সংগঠনে বলোভদ্ৰ তামুলী আৰু অনুষ্ঠানৰ মুখ্য অতিথি প্ৰফুল্ল মহন্তক সম্বৰ্ধনা জ্ঞাপন কৰে ৷
আনহাতে এই অনুষ্ঠানৰ শেষত সাংবাদিকৰে সৈতে হোৱা বাৰ্তালাপত প্ৰাক্তন মুখ্য মন্ত্ৰী প্ৰফুল্ল মহন্তই ২৩ অক্টোবৰত যদিহে হিন্দু-বাংলাদেশীক সংস্থাপন কেন্দ্ৰীয় চৰকাৰে আইনত পৰিণত কৰে তেন্তে অসম গণ পৰিষদ দল সোণোৱাল চৰকাৰৰ সহযোগী দল হৈ নাথাকিব বুলি মন্তব্য কৰে ৷
লগতে সমাগত পঞ্চায়ত নিৰ্বাচনত অগপই অকলে যুঁজিব বুলিও কয় ৷ ১৭ নৱেম্বৰত বঙালী সংগঠনে জনোৱা সমাবেশৰো তেওঁ বিৰোধিতা কৰে।