শুকুৰবাৰে কেন্দ্ৰীয় চৰকাৰে ভাৰতৰ উচ্চতম ন্যায়ালয়ক অৱগত কৰে যে বাংলাদেশলৈ ‘ঠেলি’ পঠিওৱা বুলি অভিযোগ উঠা কেইগৰাকীমান লোকক ভাৰতলৈ ঘূৰাই অনা হ’ব। তেওঁলোক ঘূৰি অহাৰ পিছত তেওঁলোকৰ নাগৰিকত্বৰ দাবীসমূহ পৰীক্ষা কৰা হ’ব বুলি কেন্দ্ৰই জনাইছে। ছলিচিটৰ জেনেৰেল তুষাৰ মেহতাই আদালতত কয় যে চৰকাৰে তেওঁলোকক ঘূৰাই আনিব আৰু তাৰ পিছত তেওঁলোকৰ নাগৰিকত্ব পৰীক্ষা কৰিব। এই পৰীক্ষাৰ ফলাফলৰ ওপৰত ভিত্তি কৰি পৰৱৰ্তী পদক্ষেপ গ্ৰহণ কৰা হ’ব। ন্যায়ালয়ে এই গোচৰটোৰ পৰৱৰ্তী শুনানিৰ বাবে জুলাই মাহ নিৰ্ধাৰণ কৰিছে।
যোৱা ২০২৫ চনৰ ২৬ ছেপ্টেম্বৰত কলিকতা উচ্চ ন্যায়ালয়ে সোণালী খাতুন আৰু আন কেইগৰাকীমান লোকক বাংলাদেশলৈ বিতাড়িত কৰাৰ কেন্দ্ৰীয় চৰকাৰৰ সিদ্ধান্তক বেআইনী বুলি বাতিল কৰিছিল। উচ্চ ন্যায়ালয়ৰ এই নিৰ্দেশক প্ৰত্যাহ্বান জনাই কেন্দ্ৰীয় চৰকাৰে উচ্চতম ন্যায়ালয়ত দাখিল কৰা আবেদনৰ শুনানি গ্ৰহণ কৰিছিল শীৰ্ষ আদালতখনে। উল্লেখযোগ্য যে যোৱা বছৰৰ ৩ ডিচেম্বৰত উচ্চতম ন্যায়ালয়ে মানৱীয়তাৰ খাতিৰত কেৱল সোণালী খাতুন আৰু তেওঁৰ আঠ বছৰীয়া সন্তানটোকহে ভাৰতত প্ৰৱেশৰ অনুমতি দিছিল। কিন্তু তেওঁলোকৰ সৈতে বিতাড়িত হোৱা আন লোকসকলৰ কথা তেতিয়া বিবেচনা কৰা হোৱা নাছিল।
সোণালী খাতুনৰ পিতৃ ভদু শেখৰ হৈ আদালতত উপস্থিত থকা জ্যেষ্ঠ অধিবক্তা কপিল চিব্বাল আৰু সঞ্জয় হেগড়েই এই গোচৰটোৰ শুনানিৰ বাবে বাৰে বাৰে দাবী জনাই আহিছিল। তুষাৰ মেহতাৰ এই প্ৰতিশ্ৰুতিয়ে আবেদনকাৰীৰ পক্ষক যথেষ্ট সকাহ দিছে। ভদু শেখে অভিযোগ কৰিছিল যে গৃহ মন্ত্ৰালয়ৰ এখন জাননীৰ পিছত আৰম্ভ হোৱা পৰিচয় প্ৰমাণীকৰণ অভিযানৰ সময়ত যোৱা বছৰৰ ২৬ জুনত তেওঁৰ কন্যা, নাতি আৰু জোঁৱায়েকক অবৈধভাৱে আটক কৰি বাংলাদেশলৈ বিতাড়িত কৰা হৈছিল।
শেখে দাবী কৰিছিল যে তেওঁ পশ্চিমবংগৰ স্থায়ী বাসিন্দা আৰু তেওঁৰ কন্যা আৰু জোঁৱায়েক জন্মসূত্ৰে ভাৰতীয় নাগৰিক। আনহাতে, কেন্দ্ৰীয় চৰকাৰে যুক্তি দিছিল যে বিতাড়িত লোকসকলে তেওঁলোক ভাৰতীয় বুলি প্ৰমাণ কৰিবলৈ কোনো ধৰণৰ নথিপত্ৰ দাখিল কৰিবলৈ সক্ষম হোৱা নাছিল। শেহতীয়াকৈ কেন্দ্ৰৰ এই পদক্ষেপে গোচৰটোত এক নতুন মোৰ আনিছে।
