অসমৰ সমাজ জীৱনত ঘৃণাৰ বিষবাষ্প বিয়পাই, মিয়া সম্প্ৰদায়ক লক্ষ্য কৰি লৈ নিৰ্মম ঘৃণাৰ মন্তব্য কৰা মুখ্যমন্ত্ৰী ড০ হিমন্ত বিশ্ব শৰ্মাই এতিয়া নিজৰ কৰ্মকাণ্ডৰ বাবে ন্যায়ালয়ৰ কাঠগড়াত থিয় দিব লগা হোৱাত হয়তো ভয়ংকৰভাৱে শংকিত হৈ পৰিছে। পিআইএল নং ১৪/২০২৬-ৰ বিপৰীতে দাখিল কৰা তেওঁৰ শেহতীয়া শপনামাখনে প্ৰমাণ কৰিছে যে ৰাজ্যৰ সৰ্বোচ্চ ক্ষমতাশালী ব্যক্তিজনে আজি আইনৰ সুৰুঙা বিচাৰি নিজৰ দায়িত্বৰ পৰা কেনেকৈ পলায়ন কৰিবলৈ চেষ্টা চলাইছে। ড০ হীৰেন গোহাঁইকে ধৰি সচেতন নাগৰিকসকলে মুখ্যমন্ত্ৰীৰ বিৰুদ্ধে দাখিল কৰা এই জনস্বাৰ্থ জড়িত আবেদনখনত প্ৰত্যক্ষভাৱে প্ৰমাণিত হৈছে যে তেওঁৰ মন্তব্যই কেৱল ৰাজনৈতিক পৰিধি অতিক্ৰম কৰাই নহয়, বৰঞ্চ সংবিধানৰ মৌলিক আধাৰক চৰমভাৱে অৱমাননা কৰিছে।
স্মৰণীয় যে যোৱা ৭ ফেব্ৰুৱাৰীত বিজেপিৰ অফিচিয়েল ছচিয়েল মিডিয়া হেণ্ডেলত প্ৰচাৰিত সেই ভয়ংকৰ ভিডিঅ’টো আৰু মুখ্যমন্ত্ৰীৰ মুখনিসৃত “পইণ্ট ব্লেংক শ্বট”, “ন’ মাৰ্চি”, “ফৰেনাৰ ফ্ৰী আছাম” আৰু “ন’ ফৰগিভনেছ টু বাংলাদেশীছ”ৰ দৰে শব্দবোৰ অসমৰ প্ৰতিজন সচেতন নাগৰিকৰ মগজুত আজিও স্পষ্ট হৈ আছে। মুখ্যমন্ত্ৰীয়ে এতিয়া আদালতত থিয় দি আত্মপক্ষক সমৰ্থন কৰিবলৈ শংকিত হৈ প্ৰমাণসমূহ বাতৰিকাকতৰ বিচ্ছিন্ন মন্তব্য দি বিকৃত কৰা বুলি তুচ্ছ তাচ্ছিল্য কৰিছে। তেওঁৰ এই আচৰণক কেৱল এক আইনী কৌশল বুলিয়েই নহয়, বৰঞ্চ ৰাইজৰ স্মৃতিশক্তিক অৱমাননা কৰা এক নীচ প্ৰয়াস বুলি গণ্য কৰিব পাৰি। হিমন্ত বিশ্ব শৰ্মাই হয়তো ভাবিছে নেকি যে তেওঁৰ ঘৃণাৰ ভাষণবোৰৰ প্ৰমাণ কেৱল কাকত বা সামাজিক মাধ্যমতহে আৱদ্ধ হৈ থাকে? আচলতে তেওঁৰ সেই বিষাক্ত মন্তব্যবোৰ অসমৰ প্ৰতি গৰাকীৰ স্মৃতিত এনেদৰে খোদিত হৈ আছে যে কোনো শপনামা বা আদালতৰ নথিয়ে সেই সত্যক মচিব নোৱাৰে।
আদালতৰ শপতনামাত তেওঁ যি যুক্তি দিছে— যেনে অশ্বিনী কুমাৰ উপাধ্যায় গোচৰৰ নজিৰ বা আৰক্ষী তদন্তৰ দোহাই— সেয়া কেৱল গোচৰটোৰ পৰা পলায়ন কৰাৰ এক সুচতুৰ কৌশল। তেওঁৰ শপনামাৰ সাৰমৰ্ম এয়াই যে, ঘৃণাৰ ভাষণৰ বিৰুদ্ধে বিচাৰ প্ৰক্ৰিয়া চলিব নালাগে। যিগৰাকী ব্যক্তিৰ প্ৰৰোচনাত এতিয়া মিয়া সম্প্ৰদায়ৰ লোকসকলে অমানৱীয় মানসিক যন্ত্ৰণাৰ মাজেৰে জীয়াই আছে, সেইজন মুখ্যমন্ত্ৰীয়ে এতিয়া তেওঁৰ বিৰুদ্ধে গোচৰ চলাই আদালতে হস্তক্ষেপ কৰিব নালাগে বুলি যি যুক্তি দিছে, সেয়া চূড়ান্ত অগণতান্ত্ৰিক আৰু অমানৱীয় বুলিও চৰ্চা চলিছে।দৰাচলতে, মুখ্যমন্ত্ৰীৰ এই প্ৰচেষ্টা কেৱল এজন ৰাজনীতিবিদৰ আত্মৰক্ষাৰ প্ৰয়াস নহয়, ই হৈছে এক স্বৈৰাচাৰী মানসিকতাৰ বহিঃপ্ৰকাশ। ৰাইজৰ মনত ঘৃণাৰ জুই জ্বলাই দি, এতিয়া বিচাৰৰ মজিয়াত সেই জুইৰ অস্তিত্বক অস্বীকাৰ কৰা এই আচৰণে অসমৰ গণতান্ত্ৰিক পৰম্পৰাক কলংকিত কৰিছে বুলিও চৰ্চা চলিছে। আদালতে কি সিদ্ধান্ত গ্ৰহণ কৰিব সেয়া ভৱিষ্যতে লক্ষণীয় হ’ব, কিন্তু ইতিহাসৰ চকুত মুখ্যমন্ত্ৰী ড০ হিমন্ত বিশ্ব শৰ্মাৰ এই পলায়নবাদী মনোভাৱ আৰু ঘৃণাৰ ৰাজনীতি চিৰদিন এক লজ্জাজনক অধ্যায় হৈ ৰ’ব। অসমৰ সাধাৰণ ৰাইজে তেওঁৰ এই কুটিল অভিনয় বুজি পাইছে, আৰু ইয়াৰ উত্তৰ তেওঁ জনতাৰ আদালতত কেতিয়াবা নহয় কেতিয়াবা দিবই লাগিব।
