দিল্লীত সোমবাৰে ককৰোচ জনতা পাৰ্টী চমুকৈ চি জে পিৰ সংসদ ভৱন অভিযানৰ সময়ত গুৰুতৰভাৱে আহত হোৱা এগৰাকী যুৱতীৰ স্বাস্থ্যৰ হঠাতে অৱনতি ঘটে। ইয়াৰ পিছতে তেওঁক ততাতৈয়াকৈ ৰাম মনোহৰ লোহিয়া চিকিৎসালয়ৰ আই চি ইউলৈ স্থানান্তৰ কৰা হৈছে।
সূত্ৰৰ পৰা জানিব পৰা মতে, যন্তৰ মন্তৰৰ প্ৰতিবাদস্থলীৰ সমীপত প্ৰতিবাদকাৰীৰ সমাৱেশত আৰক্ষীয়ে চলোৱা চলোৱা আক্ৰমণৰ সময়ত যুৱতীগৰাকীয়ে এটা বেৰিকেডত খুন্দা মাৰে। ইয়াৰ ফলত তেওঁ মূৰত গুৰুতৰ আঘাত পায়।
দিল্লী আৰক্ষীৰ সূত্ৰই প্ৰকাশ কৰা অনুসৰি, সোমবাৰে চি জে পিৰ এই সংসদ ভৱন অভিযানৰ সময়ত ৮০ জনতকৈয়ো অধিক প্ৰতিবাদকাৰী আহত হৈছিল। মঙলবাৰে পুৱা ইয়াৰে ৭৯ জন ছাত্ৰ-যুৱকক চিকিৎসালয়ৰ পৰা যাবলৈ দিয়া হয়। সোমবাৰে লাঠীচালনা আৰু কন্দুৱা গেছ ব্যৱহাৰ কৰিও আৰক্ষীয়ে চি জে পিৰ এই অভিযান সম্পূৰ্ণৰূপে স্তব্ধ কৰিব নোৱাৰিলে। বৰঞ্চ আৰক্ষীৰ বাধা নেওচি সোমবাৰে দুপৰীয়া প্ৰতিবাদকাৰীসকল সংসদ ভৱনৰ কাষ পাইছিলগৈ। প্ৰতিবাদকাৰীৰ সমদল আগবাঢ়ি অহা দেখি নিৰাপত্তাৰ স্বাৰ্থত সংসদৰ মূল গেটখন লগে লগে বন্ধ কৰি দিয়া হৈছিল।
নিট পৰীক্ষাৰ প্ৰশ্নকাকত ফাদিলৰ প্ৰতিবাদত আৰু কেন্দ্ৰীয় শিক্ষামন্ত্ৰী ধৰ্মেন্দ্ৰ প্ৰধানৰ পদত্যাগৰ দাবীত সোমবাৰে এই সংসদ অভিযানৰ আহ্বান জনাইছিল চি জে পিয়ে। সেই অনুসৰি পুৱা দিল্লীৰ যন্তৰ মন্তৰৰ পৰা এক বিশাল সমদল উলিওৱা হয়। অৱশ্যে আৰক্ষীয়ে জানিবলৈ দিয়া মতে এই কাৰ্যসূচীৰ বাবে কোনো আনুষ্ঠানিক অনুমতি লোৱা হোৱা নাছিল। বৰষুণৰ মাজতো বহু লোকে ৰেইনকোট পিন্ধিয়েই এই সমদলত অংশগ্ৰহণ কৰে। তেওঁলোকৰ হাতত ৰাষ্ট্ৰীয় পতাকা আৰু ভাৰতৰ সংবিধান দেখা গৈছিল। সংবাদ মাধ্যমৰ দাবী অনুসৰি সোমবাৰৰ এই কাৰ্যসূচীত প্ৰায় ২০ হাজাৰ লোকে অংশগ্ৰহণ কৰিছিল, যাৰ অধিকাংশই আছিল ছাত্ৰ আৰু যুৱক। আনহাতে সোমবাৰৰ পৰাই সংসদৰ বৰ্ষাকালীন অধিৱেশনো আৰম্ভ হৈছে। সংসদ ভৱনত প্ৰধানমন্ত্ৰীকে ধৰি বিভিন্ন দলৰ সাংসদ আৰু কেন্দ্ৰীয় মন্ত্ৰীসভাৰ সদস্যসকল উপস্থিত আছিল। এনে পৰিস্থিতিত চি জে পিৰ এই অভিযানক লৈ দিল্লী আৰক্ষী আগৰে পৰাই অতি সতৰ্ক আছিল। প্ৰতিবাদকাৰীসকলক ছত্ৰভংগ দিয়াবলৈ শ্ৰমশক্তি ভৱনৰ ওচৰত আৰক্ষীয়ে লাঠীচালনা কৰাৰ লগতে কন্দুৱা গেছৰ গোলাও নিক্ষেপ কৰে। ইয়াৰ পিছতো প্ৰতিবাদকাৰীৰ একাংশই সংসদ ভৱনৰ দিশে আগুৱাই যাবলৈ চেষ্টা কৰিছিল যদিও অৱশেষত আৰক্ষীয়ে তেওঁলোকক সংসদ ভৱন পোৱাৰ আগতেই বাধা প্ৰদান কৰিবলৈ সক্ষম হয়।
