গাড়ী চলোৱাক লৈ বিজেপি বিধায়কৰ পুত্ৰৰ সৈতে কংগ্ৰেছ নেতাৰ পুত্ৰৰ বিবাদ। প্ৰথমে কথা পাতি তাৰ পাছত কংগ্ৰেছ নেতাৰ পুত্ৰক প্ৰহাৰ কৰি অপহৰণ কৰাৰ অভিযোগ বিজেপি বিধায়কৰ পুত্ৰৰ বিৰুদ্ধে উত্থাপন হৈছে। ইতিমধ্যে আৰক্ষীয়ে গ্ৰেপ্তাৰ কৰিছে অভিযুক্তক। সম্প্ৰতি কাৰাগাৰত আছে বিধায়কগৰাকীৰ পুত্ৰ। কিন্তু শেহতীয়াকৈ কংগ্ৰেছ নেতাগৰাকীয়ে বিজেপি বিধায়কগৰাকীক পদত্যাগ কৰিবলৈ দাবী জনাইছে। বিজেপিয়ে যদি বিধায়কজনক তেওঁলোকৰ দলৰ পৰা বৰ্খাস্ত নকৰে তেন্তে প্ৰতিবাদত কংগ্ৰেছ নেতাগৰাকীয়ে কেৱল ইছলাম ধৰ্ম গ্ৰহণ কৰাৰ ভাবুকি দিয়াই নহয়, জিলা দণ্ডাধীশক সাক্ষাৎ কৰি ধৰ্মান্তৰকৰণৰ বাবে প্ৰয়োজনীয় নথি-পত্ৰ সংগ্ৰহো কৰিছে।
এই ঘটনা গুজৰাটৰ। বিজেপিৰ গীতাবা জাদেজা ৰাজ্যৰ গণ্ডাল বিধানসভাৰ বিধায়ক। আনহাতে, কংগ্ৰেছ নেতা ৰাজেশ সোলাংকি জুনাগড় চহৰৰ কংগ্ৰেছ দলৰ অনুসূচিত জাতি, জনজাতি কোষৰ অধ্যক্ষ। ৰাজেশৰ দাবী যে পুত্ৰক অপহৰণ আৰু প্ৰহাৰৰ গোচৰত গীতাবা আৰু তেওঁৰ স্বামীকো গ্ৰেপ্তাৰ কৰিব লাগে। তাৰ লগতে স্থানীয় কংগ্ৰেছ নেতাজনে গীতাবাক বিধায়ক পদৰ পৰা অপসাৰণ কৰাৰ দাবী উত্থাপন কৰিছে।
কিন্তু ধৰ্ম পৰিৱৰ্তনৰ লগত কি সম্পৰ্ক? সোলংকীৰ মতে, গুজৰাটত বিজেপিৰ ২৭ বছৰীয়া শাসনকালত দলিতসকলে বিভিন্ন নিৰ্যাতনৰ বলি হৈছিল। কমেও ৫ হাজাৰ নিৰ্যাতনৰ গোচৰ ৰুজু হৈছে। কিন্তু প্ৰশাসন নিমাত। বিজেপিৰ অধীনত দলিত সুৰক্ষিত নহয়। সেয়ে তেওঁ নিজৰ ধৰ্ম সলনি কৰাৰ সিদ্ধান্ত ল’লে।
গুজৰাটত ধৰ্মান্তৰকৰণৰ বাবে চৰকাৰৰ পূৰ্ব অনুমতি বাধ্যতামূলক। নৰেন্দ্ৰ মোদীয়ে মুখ্যমন্ত্ৰীৰ কাৰ্যকালত এই আইন প্ৰণয়ন কৰিছিল। কিন্তু ই ধৰ্মান্তৰকৰণক ৰোধ কৰিব নোৱাৰিলে। প্ৰধানমন্ত্ৰীৰ ৰাজ্যত বৌদ্ধ ধৰ্ম গ্ৰহণৰ ধাৰা দিনক দিনে বৃদ্ধি পাইছে। শেহতীয়াকৈ গুজৰাট চৰকাৰে এক অধিসূচনাযোগে কয় যে ধৰ্মান্তৰকৰণৰ বিষয়টোক সহজভাৱে ল’ব নোৱাৰি। জিলা দণ্ডাধীশসকলে অধিক সাৱধান হ’ব লাগে। বলপূৰ্বক ধৰ্মান্তৰকৰণ কৰা হৈছে নে নাই চাব লাগে।
কংগ্ৰেছ নেতা সোলংকিয়ে জিলা দণ্ডাধীশক সাক্ষাৎ কৰি প্ৰতিবাদ আৰু ধৰ্ম সলনি কৰাৰ ইচ্ছা প্ৰকাশ কৰে। স্থানীয় ৰাজনৈতিক মহলত ব্যাপক হুলস্থুলৰ সৃষ্টি হৈছে। বিজেপি বিধায়কগৰাকীৰ পুত্ৰৰ দাদাগিৰিৰ বিৰুদ্ধে বহু কংগ্ৰেছ নেতা-কৰ্মীয়ে ওলাই আহিছে যদিও সোলংকীৰ ধৰ্মান্তৰকৰণৰ গৰিহণা দিছে।
