উত্তৰ প্ৰদেশৰ হৰদৈত ইনষ্টাগ্ৰাম আৰু টেলিগ্ৰামৰ জৰিয়তে অশ্লীল সামগ্ৰী বিক্ৰী কৰা এজন বিটেক পাছ কৰা চতুৰ যুৱকক আৰক্ষীয়ে গ্ৰেপ্তাৰ কৰিছে। ধৃত যুৱকজন প্ৰয়াগৰাজৰ বাসিন্দা বুলি চিনাক্ত কৰা হৈছে। বিকাশ নামৰ এই অভিযন্তাজনে ছচিয়েল মিডিয়াত ২১ টা চেনেল আৰু গ্ৰুপ খুলি প্ৰায় সাত হাজাৰ লোকক অশ্লীল সামগ্ৰী বিক্ৰী কৰি আহিছিল। আৰক্ষীৰ অনুসন্ধানত তেওঁৰ তিনিটা বেংক একাউণ্টত প্ৰায় ১.২০ কোটি টকা পোৱা গৈছে। বৰ্তমানলৈকে চলি থকা তদন্তত তেওঁৰ পৰা ১০ হাজাৰ আপত্তিজনক ভিডিঅ’ আৰু ৪০ হাজাৰ ফটো উদ্ধাৰ কৰা হৈছে।
এই সমগ্ৰ ঘটনাটো পোহৰলৈ আহে যোৱা এপ্ৰিল মাহত, যেতিয়া হৰদৈৰ এজন ছাত্ৰই এটা পৰ্টেলৰ জৰিয়তে আৰক্ষীৰ ওচৰত অভিযোগ দাখিল কৰিছিল। ছাত্ৰজনে জনাইছিল যে তেওঁৰ এটা কৃত্ৰিম বুদ্ধিমত্তা অৰ্থাৎ এআইৰ জৰিয়তে প্ৰস্তুত কৰা অশ্লীল ভিডিঅ’ কোনোবাই টেলিগ্ৰামত আপলোড কৰিছে। এই অভিযোগ পোৱাৰ পিছতে আৰক্ষী সক্ৰিয় হৈ পৰে আৰু তদন্তৰ খাতিৰত এজন গোপন তথ্যদাতাক গ্ৰাহক সজাই অভিযুক্ত বিকাশৰ সৈতে যোগাযোগ কৰায়। বিকাশে সেই গোপন তথ্যদাতাজনক অশ্লীল ভিডিঅ’ দিয়াৰ বিনিময়ত তেওঁৰ চেনেল চাবস্ক্ৰাইব কৰিবলৈ কয় আৰু ৩৫০ টকা মাচুল বিচাৰি নিজৰ বেংক একাউণ্টৰ নম্বৰ আৰু আইএফএচচি ক’ড প্ৰদান কৰে। বেংকৰ তথ্য লাভ কৰাৰ লগে লগে আৰক্ষীয়ে অভিযান চলাই প্ৰয়াগৰাজৰ পৰা বিকাশক গ্ৰেপ্তাৰ কৰে।
আৰক্ষীৰ সূত্ৰই প্ৰকাশ কৰা অনুসৰি বিকাশে ২০১৯ চনত প্ৰয়াগৰাজৰ এখন আগশাৰীৰ কলেজৰ পৰা বিটেক ডিগ্ৰী লাভ কৰিছিল। ২০২০ চনৰ পৰা তেওঁ এই অবৈধ ব্যৱসায় আৰম্ভ কৰে আৰু বিগত ছয় বছৰত তেওঁৰ সৈতে সাত হাজাৰ গ্ৰাহক জড়িত হৈ পৰে। তেওঁ গ্ৰাহকসকলৰ বাবে বিভিন্ন ধৰণৰ আঁচনি তৈয়াৰ কৰিছিল, য’ত ১ মাহৰ বাবে ৩৫০ টকা, ৩ মাহৰ বাবে ৪৫০ টকা আৰু ৬ মাহৰ বাবে ৬০০ টকাৰ মাচুল ধাৰ্য কৰা হৈছিল। এই ধন লাভ কৰাৰ পিছত তেওঁ গ্ৰাহকসকলক নিজৰ গোপন চেনেলৰ লিংক দি দিছিল। আৰক্ষীৰ মতে এই ব্যৱসায়ৰ জৰিয়তে তেওঁ কোটি কোটি টকা উপাৰ্জন কৰিছিল আৰু তেওঁৰ একাউণ্টত থকা ১.২০ কোটি টকাৰ বাহিৰেও পূৰ্বে বহুত ডাঙৰ লেনদেন হৈছিল।
অভিযুক্ত যুৱকজনে মানুহৰ ব্যক্তিগত মুহূৰ্তৰ ফটো আৰু ভিডিঅ’ সংগ্ৰহ কৰিবলৈ নিজৰ কাৰিকৰী শিক্ষাৰ অপপ্ৰয়োগ কৰিছিল। কোনো ভিডিঅ’ৰ মাত্ৰ কেইচেকেণ্ডমানৰ ক্লিপ বা স্ক্ৰীণশ্বট পালেই তেওঁ গুগল লেন্স আৰু অন্যান্য আধুনিক প্ৰযুক্তি ব্যৱহাৰ কৰি সেই ভিডিঅ’টোৰ আচল উৎস আৰু আচল ফাইলটো বিচাৰি উলিয়াইছিল আৰু তাক ডাউনলোড কৰি নিজৰ চেনেলত আপলোড কৰিছিল। আশ্চৰ্যজনক কথাটো হ’ল যে বিকাশৰ দেউতাক ভাৰতীয় বায়ু সেনাৰ এজন অৱসৰপ্ৰাপ্ত বিষয়া। পঢ়া-শুনা শেষ কৰাৰ পিছত বিকাশে সদায় নিজৰ কোঠাৰ ভিতৰত লেপটপ আৰু কম্পিউটাৰ লৈ ব্যস্ত থকা বাবে পৰিয়ালৰ লোকে ভাবিছিল তেওঁ ঘৰৰ পৰাই অনলাইন চাকৰি কৰি আছে। কিন্তু আৰক্ষী ঘৰত উপস্থিত হোৱাৰ পিছতহে পৰিয়ালৰ লোকে জানিব পাৰিলে যে তেওঁলোকৰ পুত্ৰই আচলতে পর্ন’গ্ৰাফীৰ ব্যৱসায় চলাই আছিল। ধৃত বিকাশৰ গ্ৰাহকসকলৰ ভিতৰত বহু নাবালক ছাত্ৰও অন্তৰ্ভুক্ত আছে বুলি আৰক্ষীয়ে জানিবলৈ দিছে আৰু এই সন্দৰ্ভত বৰ্তমান অধিক তদন্ত চলাই থকা হৈছে।
