হোজাই জিলাৰ মোৰাঝাৰ থানাৰ অন্তৰ্গত তথা ডবকাৰ সমীপবৰ্তী আমবাৰী বজাৰৰ পৰা যোৱা ২ অক্টোবৰ তাৰিখে অপহৃত হোৱা আজিৰ উদ্দিন নামৰ ব্যৱসায়ীজনৰ মৃতদেহটো আজি কাকী থানাৰ অন্তৰ্গত মধুপুৰ গাঁৱৰ এখন পথাৰত উদ্ধাৰ হৈছে। এই ব্যৱসায়ীজনৰ মৃতদেহটো উদ্ধাৰ হোৱাৰ পিছতে হোজাই জিলাজুৰি তীব্র চাঞ্চল্যৰ সৃষ্টি হৈছে। মৃতদেহটোৰ হাত ভৰি বন্ধা তথা শৰীৰৰ কেবাঠাইত দাৰে ঘপিওৱাৰ দাগ থকাৰ প্ৰতি লক্ষ্য কৰি এয়া পৰিকল্পিত হত্যাকাণ্ড তথা কোনো সুপাৰী কিলাৰৰ দ্বাৰা এই হত্যাকাণ্ড সংঘটিত কৰা হৈছে বুলি সন্দেহ প্ৰকট কৰিছে স্থানীয় ৰাইজে।
আমবাৰী বজাৰৰ আজিৰ উদ্দিন নামৰ ব্যৱসায়ীজনে সেই নিশা নিজৰ গেলামাল দোকানখন বন্ধ কৰি ঘৰলৈ গৈ থকাৰ সময়তে এটা দুৰ্বৃত্তৰ দলে তেওঁক অপহৰণ কৰি নিছিল। দুৰ্বৃত্তৰ দলে ব্যৱসায়ীজনক অপহৰণ কৰি কাৰ্বি আংলঙৰ ফালে লৈ যোৱা বুলি সন্দেহ কৰা হৈছিল যদিও আজি ৰহস্যজনকভাৱে কাকীৰ মধুপুৰৰ এখন পথাৰত ব্যৱসায়ীজনৰ ৰক্তাক্ত মৃতদেহ ৰাইজে প্ৰত্যক্ষ কৰি কাকী আৰক্ষীক খবৰ দিয়ে। সেইমতে আৰক্ষী ঘটনাস্থলীত উপস্থিত হে মৃতদেহটো উদ্ধাৰ কৰি তদন্ত আৰম্ভ কৰিছে।
অতি আচৰিত কথা এই যে ব্যৱসায়ীজনক অপহৰণ কৰাৰ পিছত দুৰ্বৃত্তৰ দলে ফোনযোগে ব্যৱসায়ীজনৰ পৰিয়ালক অপহৰণ কৰাৰ কথা অৱগত কৰিছিল বুলি চৰ্চিত হৈছে। অপহৰণ হোৱাৰ পিছত পৰিয়ালে মোৰাজাৰ থানাত ঘটনা সন্দৰ্ভত এটা গোচৰ তৰিছিল যদিও আৰক্ষীয়ে ব্যৱসায়ীজনৰ কোনো সন্ধান উলিয়াবলৈ সক্ষম নহল।
আজি মৃতদেহটো উদ্ধাৰ হোৱাৰ পিছতে ব্যৱসায়ীজনৰ পৰিয়ালৰ লগতে স্থানীয় ৰাইজ শোকত ভাগি পৰে। আমবাৰী অঞ্চলৰ সৰবৰহী তথা অতি অমায়িক আৰু সকলোৰে লগত মিলিজুলি থকা এই ব্যৱসায়ীজনক কোনে কি কাৰণে অপহৰন কৰি হত্যা কৰিলে সেয়া ৰহস্যৰ আবৰ্ত্তত। আৰক্ষীয়ে হত্যাকাৰীক আটক কৰিবলৈ সক্ষম হবনে, সেয়া হ’ব লক্ষণীয়।
ইপিনে মৃতদেহ উদ্ধাৰ হোৱাৰ পাছতে পৰিয়ালটো বিশেষকৈ একমাত্ৰ কন্যাগৰাকী কান্দোনত ভাগি পৰিছে৷ নিহত ব্যৱসায়ীজনৰ একমাত্ৰ কন্যাই এইবাৰ স্নাতক ডিগ্ৰী লাভ কৰিছে৷
ইপিনে, স্থানীয় বিভিন্ন দল সংগঠনে শোক প্ৰকাশ কৰি শোকসন্তপ্ত পৰিয়ালবৰ্গলৈ গভীৰ সমবেদনা জ্ঞাপন কৰাৰ লগতে শীঘ্ৰে হত্যাত জড়িতসকলক আটক কৰি কঠোৰ শাস্তি প্ৰদান কৰাৰ দাবী তুলিছে৷