ৰাহুল গান্ধীৰ বিৰুদ্ধে অভিযান চলাব পাৰে বলবৎকাৰী সঞ্চালকালয় চমুকৈ ইডিয়ে। ৰাহুল গান্ধীয়ে নিজেই এই আশংকা প্ৰকাশ কৰিছে।
ইডিৰ পৰা এই ভিতৰুৱা খবৰ লাভ কৰা বুলি দাবী কৰে বিৰোধী দলৰ নেতাগৰাকীয়ে।
সংসদত তেওঁ বিজেপিয়ে চক্ৰবেহু ৰচনা কৰা বুলি কৰা মন্তব্যৰ বাবে ইডিৰ অভিযান চলিব পাৰে বুলি আশংকা প্ৰকাশ কৰিছে গান্ধীয়ে।
বৃহস্পতিবাৰে দিনৰ ১:৫২ বজাত ৰাহুল গান্ধীয়ে নিজৰ এক্স হেণ্ডেলত লিখিছে, ‘মোৰ চক্ৰব্যুহৰ ভাষণ ২ জন লোকে ভাল নাপালে। ইডিৰ ভিতৰৰ মানুহেই মোক কৈছিল যে মোৰ বিৰুদ্ধে চাৰ্চ অপাৰেচনৰ পৰিকল্পনা কৰা হৈছে। মই তেওঁলোকৰ বাবে মুকলি আকাশৰ তলত অপেক্ষা কৰি আছো। চাহ আৰু বিস্কুটো সাজু কৰি ৰাখিছোঁ।
উল্লেখযোগ্য যে যোৱা ২৯ জুলাইত বিৰোধী দলৰ নেতা ৰাহুল গান্ধীয়ে লোকসভাত বাজেট ভাষণত কেন্দ্ৰীয় চৰকাৰক সমালোচনা কৰিছিল। মহাভাৰতৰ ‘চক্ৰবেহু’ কাণ্ডৰ কথা উনুকিয়াই তেওঁ কয় যে কৃষক, শ্ৰমিক আৰু যুৱক-যুৱতীসকলক বিজেপিয়ে চক্ৰবেহুৰ দ্বাৰা আগুৰি ধৰিছে।
তেওঁ কয়, “হাজাৰ বছৰ আগতে কুৰুক্ষেত্ৰত অভিমন্যুক আৱদ্ধ কৰি ছয়জন লোকে এটা ‘চক্ৰব্যুহ’ত হত্যা কৰিছিল। মই কিছু গৱেষণা কৰি গম পালোঁ যে ‘চক্ৰব্যুহ’ক ‘পদ্মব্যুহ’ বুলিও কোৱা হয়। ইয়াৰ এটা পদ্মব্যুহ আছে। ইয়াৰ কেন্দ্ৰত ছয়জন লোকে ভাৰতক নিয়ন্ত্ৰণ কৰি আছে। তেওঁলোক হৈছে নৰেন্দ্ৰ মোডী, অমিত শ্বাহ, মোহন ভাগৱত, অজিত ডোভাল, আম্বানী আৰু আদানী।”
মঙলবাৰে সংসদত ৰাহুল গান্ধীৰ মন্তব্যৰ উত্তৰ দিওঁতে বিজেপি সাংসদ অনুৰাগ ঠাকুৰে ৰাহুল গান্ধী তীব্ৰ বাক্যবাণেৰে আক্ৰমণ কৰে।
অনুৰাগ ঠাকুৰৰ জাতি-ভাষা মন্তব্যই বিতৰ্কৰ সৃষ্টি কৰিছিল যদিও প্ৰধানমন্ত্ৰী নৰেন্দ্ৰ মোদীয়ে এই মন্তব্যৰ প্ৰশংসা কৰে।
