ৰাজ্য চৰকাৰৰ বিত্তীয় অৱস্থা অতি শোচনীয় সেয়া স্বাস্থ্য মন্ত্ৰী ড০ হিমন্ত বিশ্ব শর্মাৰ বক্তব্যই প্ৰমাণ কৰিলে বুলি মন্তব্য কৰে বিৰোধী দলপতি দেবব্ৰত শইকীয়াই।
নৰ্থ ইষ্ট নাওলৈ প্ৰেৰণ কৰা এক ভিডিঅ’যোগে শইকীয়াই কয় ‘চৰকাৰখনৰ বিত্তীয় অৱস্থা যে অতি শোচনীয়, সেয়া যোৱা কালি মন্ত্ৰী ড° শৰ্মাৰ প্ৰেছ মেলত ওলাই পৰিল। কাৰণ কেন্দ্ৰীয় চৰকাৰে ঘোষণা কৰা বিত্তীয় পেকেজৰ পৰা সৰ্বসাধাৰণে একো নেপাই মাত্ৰ চৰকাৰৰ উদং হোৱা বিত্তীয় পুঁজিতহে ব্যৱহাৰ হ’ব।‘
ইয়াৰোপৰি অসম চৰকাৰে আৰম্ভ কৰা ডিজিটেল পাঠ্যক্ৰমৰ জৰিয়তে, শিশু তথা ছাত্ৰ-ছাত্ৰী সকলৰ মনত এক মানসিক হেঁচা পৰিব বুলি উল্লেখ কৰি তেওঁ লগতে কয়, ‘কিয়নো গ্ৰামাঞ্চলত বহুতো পৰিয়ালৰ হাতত স্মাৰ্ট ফোন নাই, যাৰ ফলত ছাত্ৰ-ছাত্ৰী সকলৰ মাজত শৈক্ষিক বৈষম্যৰ সৃষ্টি হ’ব।‘
সেয়েহে এই বিষয়ে শিক্ষা মন্ত্ৰীক বিষয়টো চালি জাৰি চাই আকৌ এবাৰ চিন্তা কৰিবলৈ শইকীয়াই অনুৰোধ জনায়।
ইপিনে, ব্যক্তিগত খণ্ডৰ বিদ্যালয় সমূহৰ মাহিলী মাচুল কম কৰি দি অভিভাৱক সকলক অলপ সকাহ দিবলৈ শিক্ষা মন্ত্ৰীক তেওঁ অনুৰোধ জনায় লগতে কয় ‘কিয়নো এই সময়ত, যিহেতু ক্লাছ আৰম্ভ হোৱা নাই সেয়েহে নিশ্চিত ভাৱে বিদ্যালয়ৰ বিদ্যুৎ মাচুল তথা ল’ৰা ছোৱালীক অনা নিয়া কৰা গাড়ী সমূহৰ ইন্ধনৰ খৰচ কমিছে। এই লাভ চৰকাৰে বিদ্যালয়সমূহৰ জৰিয়তে অভিভাৱক সকললৈ প্ৰেৰণ কৰাৰ এক ব্যৱস্থা লওক।‘
তাৎপৰ্যপূৰ্ণভাৱে কোভিড১৯ৰ বিৰুদ্ধে যুঁজিবলৈ চৰকাৰে যিমান প্ৰস্তুত হ’ব লাগিছিল সিমান নোহাৱাটো ইতিমধ্যে ৰাজ্য চৰকাৰৰ কিছুমান মন্তব্যৰ পৰা গম পোৱা গৈছে বুলি উল্লেখ কৰি তেওঁ এক উদাহৰণ দি কয়, ‘যেনেকৈ বহিঃ ৰাজ্যত আৱদ্ধ হৈ থকা অসমৰ ব্যক্তিসকলক বৰ্তমান চৰকাৰে অসমলৈ আনিবলৈ দেখুওৱা অনীহা তেওঁলোকৰ মন্তব্যৰ পৰা ধৰিব পৰা গৈছে।‘
‘কোভিড১৯ৰ বাবে ৰাজ্যৰ এক বিপৰ্যয়ৰ সময়ত, চৰকাৰী প্ৰেছ মেলত ৰাজ্যৰ বিত্ত আৰু স্বাস্থ্য মন্ত্ৰী ডাঙৰীয়াই ৰাজ্যিক বিজেপিৰ সভাপতিক কাষত বহুৱাই দলীয় প্ৰচাৰ তথা ৰাজনৈতিক মুনাফা লোৱাৰ প্ৰচেষ্টাক মই গৰিহণা দিছোঁ।‘ শইকীয়াই বিজেপিৰ ৰাজ্যিক সভাপতি ৰঞ্জিত দাসক কটাক্ষ কৰি কয়।