আকৌ এবাৰ ক্ৰিকেট অনুৰাগীয়ে উপভোগ কৰিলে টেষ্ট ক্ৰিকেটৰ মাদকতা। সীমিত অভাৰৰ ক্ৰিকেটৰ জনপ্ৰিয়তাৰ মাজতে টেষ্ট ক্ৰিকেটৰ গুৰুত্ব হ্ৰাস পোৱা বুলি সততে উঠা অভিযোগৰ মাজতে আজি আকৌ টেষ্ট ক্ৰিকেটে মুহিলে ক্ৰিকেট অনুৰাগীৰ মন।
ভাৰত বনাম নিউজিলেণ্ডৰ মাজত চলিত টেষ্ট শৃংখলাৰ প্ৰথমখন টেষ্ট আজি ড্ৰ ৰূপে সামৰণি পৰে। নিশ্চিত জয়ৰ দিশত গতি কৰা ভাৰতৰ আশাত চেঁচা পানী ঢালিলে নিউজিলেণ্ডৰ উদীয়মান খেলুৱৈ তথা অভিষেক ঘটোৱা ৰচীন ৰবীন্দ্ৰ।
টেষ্টখনত ভাৰতৰ প্ৰথম ইনিংছৰ ৩৪৫ ৰানৰ প্ৰত্যুত্তৰত নিউজিলেণ্ডে ২৯৬ ৰান সংগ্ৰহ কৰিছিল। প্ৰথম ইনিংছত ৪৯ ৰানৰ অগ্ৰগতি লাভ কৰা ভাৰতে দ্বিতীয় ইনিংছত ২৩৪ ৰানত ইনিংছ সমাপ্তি ঘোষণা কৰে আৰু নিউজিলেণ্ডক ২৮৪ ৰানৰ লক্ষ্য বান্ধি দিয়ে।
কিন্তু ভাৰতীয় বলাৰৰ দৰ্শনীয় প্ৰদৰ্শনত একপ্ৰকাৰ নিষ্প্ৰভ হৈ পৰা নিউজিলেণ্ডে ১৫৫ ৰানতে ৯ টা উইকেট হেৰুৱাই বিপদত পৰিছিল। এনে সময়ত টেষ্টখনত ভাৰতৰ জয় এক প্ৰকাৰ নিশ্চিত হৈ পৰিছিল। কিন্তু ৰচীন ৰবীন্দ্ৰ আৰু আজাজ পেটেলে অন্তিম উইকেটত ধৈৰ্যসহকাৰে ৯ অভাৰ বেটিং কৰি ভাৰতৰ জয়ৰ আশাত চেঁচা পানী ঢালে আৰু টেষ্ট খন ড্ৰ ৰূপে সামৰণি পেলায়।
উল্লেখ্য যে এই টেষ্টখনত কেইবাটাও অভিলেখ সৃষ্টি হয়। টেষ্টখনত অভিষেক ঘটোৱা শ্ৰেয়স আয়াৰে অভিষেক মেচত দুয়োটা ইনিংছত শতক আৰু অৰ্ধশতক অৰ্জন কৰা প্ৰথম ভাৰতীয় বেটাৰত পৰিণত হয়।
সেইদৰে ভাৰতীয় তাৰকা স্পিনাৰ ৰবিচন্দ্ৰন অশ্বিনে টেষ্ট ক্ৰিকেটত সৰ্বাধিক উইকেট দখলৰ তালিকাত কিংবদন্তী ৱাছিম আক্ৰাম আৰু হৰভজন সিঙক অতিক্ৰম কৰে। অশ্বিনে হৰভজন সিঙক অতিক্ৰম কৰি টেষ্ট ক্ৰিকেটত তৃতীয় সৰ্বাধিক উইকেট দখলকাৰী ভাৰতীয় বলাৰত পৰিণত হয়। লগতে ২০২১ বৰ্ষত টেষ্টত সৰ্বাধিক উইকেট দখল কৰা বলাৰ হিচাপেও পৰিগণিত হয় অশ্বিন।
মেচখনত চমকপ্ৰদ বেটিঙেৰে অভিষেক মেচতে উজলি উঠা শ্ৰেয়স আয়াৰক শ্ৰেষ্ঠ খেলুৱৈ হিচাপে নিৰ্বাচিত কৰা হয় ।
শৃংখলাৰ দ্বিতীয় খন টেষ্ট ৩ ডিচেম্বৰৰ পৰা মুম্বাইৰ ৱাংখাৰে ষ্টেডিয়ামত অনুষ্ঠিত হ’ব। উক্ত মেচখনত ভাৰতৰ নিয়মীয়া অধিনায়ক বিৰাট কোহলীৰ ভাৰতীয় টেষ্ট দললৈ প্ৰত্যাৱৰ্তন ঘটিব।