এইখন অসমতেই আছে ২৬ বছৰে সম্পূৰ্ণ নোহোৱা এখন চিকিৎসালয়। চিকিৎসালয়খনে সম্পূৰ্ণ নোহোৱাকৈয়ে অতিক্ৰম কৰিলে ৰূপালী জয়ন্তীবৰ্ষ।
শিৱসাগৰ জিলাৰ দিচাং ধাইআলি গাওঁ পঞ্চায়তৰ অন্তৰ্গত ২নং চাউলকৰা গাঁৱৰ বামবাৰীত অৱস্থিত এই আধাৰুৱা চিকিৎসালয়খন।
১৯৯৪ চনত সেই সময়ৰ যোৰহাট লোকসভা সমষ্টিৰ সাংসদ প্ৰয়াত বিজয়কৃষ্ণ সন্দিকৈয়ে উদ্বোধন কৰা এই চিকিৎসালয়খন এতিয়া ভূত বাংলাত পৰিণত হৈছে। এতিয়া কেৱল দুটা জৰাজীৰ্ণ বাসগৃহৰ বাদে একো অস্তিত্ব নাই চিকিৎসালয়খনৰ।
১৯৯৪ চনৰ পৰা আজিলৈকে ৰাজ্যত অগপ, কংগ্ৰেছ আৰু বিজেপি দলে শাসন কৰিছে যদিও কোনো এখন চৰকাৰে গুৰুত্ব নিদিলে চিকিৎসালয়খন সম্পূৰ্ণ কৰিবলৈ। যাৰ বাবে এতিয়া পৰিত্যক্ত অৱস্থাত চিকিৎসালয়খন।
আনহাতে, ১৫ বছৰ স্বাস্থ্য মন্ত্ৰী হৈ স্বাস্থ্যখণ্ডলৈ অমূল পৰিৱৰ্তন অনা বুলি দাবী কৰা মুখ্যমন্ত্ৰী হিমন্ত বিশ্ব শৰ্মাৰ ১৫ বছৰীয়া কাৰ্যকালতো ইটা এচপৰা নপৰিল চিকিৎসালয় খনত।
যাৰ বাবে বৃহত্তৰ আখৈফুটীয়া, মাজৱমেলীয়া, চৰগুৱা, ৰিৰিয়া, ডিমৌমুখ, জয়ৰাপাৰ, বাঢৈটিং, কপটিং আদি অঞ্চলৰ ৰাইজে চিকিৎসা সেৱাৰ পৰা বঞ্চিত হোৱাৰ উপৰিও চিকিৎসাৰ বাবে ২০ কিলোমিটাৰ নিলগৰ জয়সাগৰ অসামৰিক চিকিৎসালয়লৈ যাবলগীয়া হয়।
প্ৰশ্ন হয়, কেতিয়া সম্পূৰ্ণ হব এই ২৬ বছৰে পৰিত্যক্ত অৱস্থাত থকা বামবাৰীৰ এই চিকিৎসালয়খন। বৰ্তমানৰ বিজেপি চৰকাৰে গুৰুত্ব দিবনে চিকিৎসালয়খন নিৰ্মাণত?
যি সময়ত দেশৰ আন আন ৰাজ্যত ক’ভিডৰ ভয়াৱহতাৰ প্ৰতি লক্ষ্য ৰাখি নতুন নতুন চিকিৎসালয় নিৰ্মাণ কৰিছে সেই সময়ত এইখন অসমত ২৬ বছৰেও এখন চিকিৎসালয় সম্পূৰ্ণ নোহোৱা কথাটো মানি ল’ব পাৰিনে?
