আহোমৰ ৰাজত্বৰ পৰাই ঐতিহ্যৰ ধ্বজাবহনকাৰী তথা পৌৰাণিক বিশ্বাস মতে ব্ৰহ্মাই সৃষ্টি কৰা নৱগ্ৰহ মন্দিৰৰ আজি কিয় এই দূৰৱস্থা?
ধ্বংসস্তুপলৈ থেলি দিয়া হৈছে নেকি ঐতিহ্য বিজাড়িত নৱগ্ৰহ মন্দিৰক?
বাতৰিটোৰ আৰম্ভণিতে এনেবোৰ প্ৰশ্ন কৰিছো এইবাবেই যে বিজেপি চৰকাৰৰ শাসনতে শিলপুখুৰীস্থিত চিত্রাচল পাহাৰত অৱস্থিত নৱগ্ৰহ দেৱালয় জহি খহি যোৱাৰ উপক্ৰম হৈছে।
যোৱা ৫ আগষ্টত ঐতিহাসিক ৰাম মন্দিৰৰ ভূমি পুজন অনুষ্ঠিত হৈ গ’ল। কেন্দ্ৰীয় চৰকাৰে ৰাম মন্দিৰৰ নিৰ্মাণৰ বিষয়টো অতি গুৰুত্ব সহকাৰে গ্ৰহণ কৰিছে।
তেনে সময়তে পোহৰলৈ আহিছে অন্য মঠ-মন্দিৰৰ দুৰৱস্থা।
নৱগ্ৰহ দেৱালয়ৰ গম্বুজৰ বেৰৰ চাৰিওফালে ফাঁট মেলাৰ লগতে কিছু কিছু ঠাইত খহিবলৈ আৰম্ভ কৰিছে।
কেৱল সেয়াই নহয় এজাক সামান্য বৰষুণতে পানী জমা হয় মন্দিৰটোৰ ভিতৰত।
দুৰ্ভাগ্যৰ বিষয় এয়ে যে ২০১৫ চনৰে পৰা মন্দিৰটোৰ মেলা ফাটেৰে বৰষুণৰ পানী পৰি ডোঙা বান্ধি আহিছে।
বিগত কংগ্ৰেছ চৰকাৰৰ দিনত প্ৰায় ২ কোটি ৬৩ লাখ টকা মন্দিৰৰ আন্তঃগাঁথনি নিৰ্মাণৰ বাবদ মোকলাই দিয়া হৈছিল যদিও নিৰ্বাচনৰ বাবেই সেই ধন মন্দিৰ পৰিচালনা কমিটিৰ হাতত নপৰিলহি বুলি মন্দিৰৰ এগৰাকী পূজাৰীয়ে জনায়।
পৰৱৰ্তী সময়ত জিএমডিএক ৪০ লাখ টকা মোকলাই দিছিল যদিও আজি সেই ধন কাৰ পকেটত সোমাল বা কি হ’ল তাৰ হিচাপ কাৰোৰে হাতত নাই।
প্ৰশ্ন হয়, নিৰ্মাণ হ’বলগীয়া ৰাম মন্দিৰৰ সমান্তৰালকৈ গুৰুত্ব দিব নে অন্য মঠ-মন্দিৰৰ মেৰামতিত?
ইপিনে, ২০১৯-২০ বৰ্ষৰ বাজেটত ১০০ বছৰ পুৰণি মন্দিৰ, মছজিদ, গীৰ্জালৈ আন্তঃগাঁথনি উন্নয়নৰ বাবে বছৰি ১০ লাখ টকাকৈ সাহায্য আগ বঢ়োৱা হ’ব বুলি বিত্ত মন্ত্ৰী ড০ হিমন্ত বিশ্ব শৰ্মাই ঘোষণা কৰিছিল যদিও প্ৰকৃততে সেয়া যেন ঘোষণাতে সীমাবদ্ধ। কিয় অসম দৰ্শন আঁচনিয়ে স্পৰ্শ কৰা নাই নৱগ্ৰহ দেৱালয়ক? সেয়াও এক বিচাৰ্য বিষয়।
মন্দিৰ পৰিচালনা কমিটিয়ে বাৰম্বাৰ ৰাজ্য চৰকাৰক মন্দিৰৰ দুৰৱস্থাৰ বিষয়ে অৱগত কৰাৰ লগতে মুখ্য মন্ত্ৰী সৰ্বানন্দ সোণোৱালকো স্মাৰক পত্ৰ প্ৰেৰণ কৰিছে। কিন্তু বৰ্তমানো গা লৰা নাই ৰাজ্য চৰকাৰৰ।
ইপিনে, মন্দিৰৰ গম্বুজটোৰ তলৰফালে এন্দুৰে সন্ত্ৰাস চলোৱা পৰিলক্ষিত হৈছে। এন্দুৰে বহু ঠাইত গাঁত খান্দি সুৰংগসদৃশ অৱস্থাৰ সৃষ্টি কৰিছে।
আহোম স্বৰ্গদেউ ৰাজেশ্বৰ সিংহৰ ৰাজত্ব কালত অৰ্থ্যাৎ ১৭৫১ চনতে স্থাপিত হোৱা এই ঐতিহ্য বিজড়িত ৫০০ বছৰৰ পুৰণি মন্দিৰক ৰাজ্য চৰকাৰে নিজেই ধ্বংসৰ গৰাহলৈ থেলি দিব নেকি? এই সময়ত এয়া লক্ষণীয় বিষয়।
মন্দিৰটোৰ আজিৰ এই অৱস্থাত উদ্বিগ্ন হৈ পৰিছে মন্দিৰ পৰিচালনা কমিটি। মন্দিৰৰ আন্তঃগাঁথনি উন্নয়নৰ বাবে পুঁজি মোকোলাই দিবলৈ ৰাজ্য চৰকাৰক টানি অনুৰোধ জনাইছে মন্দিৰৰ পূজাৰী পংকজ প্ৰতিম শৰ্মাই।