আজি পবিত্ৰ মহা শিৱৰাত্ৰি। এইবাৰ শিৱৰাত্ৰিৰ শুভ ক্ষণ দুদিনীয়াকৈ পৰিছে। আজি দেওবাৰৰ বিয়লি ৪ বাজি ১৪ মিনিটৰ পৰা আৰম্ভ হোৱা এই পবিত্ৰ মহূৰ্ত সোমবাৰৰ সন্ধিয়ালৈকে চলিব। এই উপলক্ষে ৰাজ্যৰ বিভিন্ন প্ৰান্তৰ লগতে ঐতিহাসিক শিৱসাগৰ চহৰতো এক আধ্যাত্মিক পৰিৱেশে বিৰাজ কৰিছে। পুৱাৰে পৰা শিৱসাগৰৰ ঐতিহাসিক শিৱদৌলত হাজাৰ হাজাৰ ভক্তৰ সমাগম ঘটিছে। ভক্তসকলে ধূপ-দীপ, নৈবেদ্যৰ লগতে গাখীৰ, পানী, ঘীউ আৰু মৌৰে শিৱলিংগত অভিষেক ঘটাইছে। বহুতে মহাদেৱক সন্তুষ্ট কৰিবলৈ ভাং আৰু ধতুৰাও অৰ্পণ কৰা পৰিলক্ষিত হৈছে।
মহা শিৱৰাত্ৰিৰ লগত সংগতি ৰাখি শিৱসাগৰৰ এই ঐতিহাসিক শিৱদৌল প্ৰাংগণত আজিৰ পৰা পাঁচদিনীয়া কাৰ্যসূচীৰে শিৱৰাত্ৰি মেলাও আৰম্ভ হৈছে। প্ৰতি বছৰে অনুষ্ঠিত হৈ অহা এই মেলাৰ এক বিশেষ গুৰুত্ব আছে। ভাৰতৰ অন্যতম জাগ্ৰত শিৱধাম হিচাপে পৰিচিত এই দৌলত বিগত প্ৰায় তিনিশ বছৰে নিয়মীয়াকৈ শিৱ পূজা আৰু মেলা অনুষ্ঠিত হৈ আহিছে। আজিৰ দিনটোত সমগ্ৰ চহৰখনতে এক উৎসৱমুখৰ পৰিৱেশৰ সৃষ্টি হৈছে।
ঐতিহাসিক তথ্য অনুসৰি, ১৭৩৪ খ্ৰীষ্টাব্দত আহোম স্বৰ্গদেউ শিৱ সিংহৰ দিনত বৰৰজা অম্বিকাই এই কৰদৈশিৰীয়া শিৱদৌল নিৰ্মাণ কৰাইছিল। তেতিয়াৰ কলঞ্চুপাৰ গাঁৱত এক বিশাল পুখুৰী খন্দোৱাই তাৰ পাৰত তিনিটা দৌল নিৰ্মাণ কৰা হৈছিল, যাৰ ভিতৰত শিৱদৌলটোৱেই আছিল আটাইতকৈ ওখ। প্ৰায় ১০৪ ফুট উচ্চতাৰ এই দৌলটোৰ শিখৰত এটা সোণৰ কলচি স্থাপন কৰা হৈছে। এই দৌলটো কেৱল ইয়াৰ অনন্য স্থাপত্যৰ বাবেই নহয়, বৰঞ্চ ইয়াৰ গভীৰ আধ্যাত্মিক মাহাত্ম্যৰ বাবেও সমগ্ৰ দেশতে বিখ্যাত।
শিৱৰাত্ৰি উপলক্ষে এই দৌলটোৰ মহিমা দৰ্শন কৰিবলৈ ৰাজ্যৰ বাহিৰৰ পৰাও অসংখ্য সাধু-সন্ত আৰু পৰ্যটকৰ আগমন ঘটে। এই বিশাল ভক্তৰ সমাগমৰ বাবেই শিৱসাগৰৰ শিৱৰাত্ৰি মহোৎসৱক কুম্ভমেলাৰ এক সৰু সংস্কৰণ বুলিও অভিহিত কৰা হয়। যদিও আজি সন্ধিয়াৰ পৰাহে পূজাৰ মূল লগ্ন আৰম্ভ হ’ব, তথাপিও পুৱাৰে পৰা ভক্তৰ ভিৰত উখল-মাখল হৈ পৰিছে সমগ্ৰ দৌল চৌহদ। জিলা প্ৰশাসনেও ভক্তসকলৰ সুবিধাৰ্থে সকলো ধৰণৰ যাৱতীয় ব্যৱস্থা গ্ৰহণ কৰিছে।
