এইবাৰ ন্যায়দাতা ন্যায়াধীশৰ বিৰুদ্ধে উত্থাপন হৈছে ভয়ংকৰ অভিযোগ। গোচৰ নিষ্পত্তিৰ বাবে ন্যায়াধীশে অভিযুক্তৰ পিতৃৰ পৰা ধন দাবী কৰাৰ অভিযোগ উত্থাপন হৈছে। খোদ অভিযুক্তৰ পিতৃয়ে উত্থাপন কৰিছে এই অভিযোগ।
এই বিস্ফোৰক দাবী কৰিছে এগৰাকী মৃত অভিযন্তা অতুল সুভাষৰ পিতৃয়ে। অতুলৰ পিতৃয়ে কয় যে তেওঁৰ পুত্ৰৰ বিৰুদ্ধে কেইবাটাও গোচৰ আছে। যাৰ বাবে তেওঁ দিশহাৰা হৈ আত্মহত্যা কৰে।
উল্লেখ্য যে যোৱা ৯ ডিচেম্বৰত পত্নী আৰু পৰিয়ালক নিৰ্যাতনৰ অভিযোগ উত্থাপন কৰি ২৪ পৃষ্ঠাৰ আত্মহত্যাৰ টোকা লিখি আত্মহত্যা কৰিছিল অতুলে।
অতুল কৰ্মসূত্ৰে বাংগালুৰুত বাস কৰিছিল। এটা তথ্য প্ৰযুক্তি কোম্পানীত তেওঁ জেনেৰেল মেনেজাৰ আছিল। তেওঁৰ পিতৃ-মাতৃ বিহাৰত থাকে।
অতুলৰ পিতৃয়ে সংবাদ মাধ্যমক জনোৱা মতে অতুলৰ পত্নী নিকিতা সিংঘনিয়াই অতুল আৰু অতুলৰ পৰিয়ালৰ বিৰুদ্ধে কেইবাটাও মিছা গোচৰ দিছিল। সেই গোচৰবোৰ আদালতত বিচাৰাধীন আছিল।
অতুলৰ পিতৃ পৱন কুমাৰে অভিযোগ কৰে যে নিকিতাই ২০২১ চনৰ জানুৱাৰী মাহৰ পৰা এই গোচৰবোৰ দিবলৈ আৰম্ভ কৰিছিল। যাৰ বাবে অতুল মানসিকভাবে ভাগি পৰিছিল।
ইয়াৰ পিছত তেওঁ ন্যায়াধীশে ধন দাবী কৰাৰ বিষয়টো উত্থাপন কৰে। অতুলৰ পিতৃয়ে কয় যে আদালতত মধ্যস্থতাৰ কথা উত্থাপন হৈছিল। আদালতে গোচৰটো নিষ্পত্তিৰ বাবে মধ্যস্থতা কৰিবলৈ ব্যক্তিগৰাকীৰ পৰা ধন দাবী কৰে।
অভিযোগ অনুসৰি, প্ৰথমে ন্যায়াধীশে ২০ হাজাৰ টকা দাবী কৰে। তাৰপিছত আকৌ ৪০ হাজাৰ টকা বিচাৰে। ইয়াৰ পিছত ন্যায়াধীশ গৰাকীয়ে কয় যে সমস্যাটো সমাধানৰ বাবে কমেও পাঁচ লাখ টকা দিব লাগিব।
উল্লেখ্য যে নিকিতা আৰু তেওঁৰ পৰিয়াল উত্তৰ প্ৰদেশৰ জৌনপুৰত থাকে। ইতিমধ্যে বেংগালুৰু আৰক্ষীৰ চাৰিজনীয়া এটা দলে অতুলৰ আত্মহত্যাৰ গোচৰৰ তদন্তৰ বাবে জৌনপুৰৰ নিকিতাৰ ঘৰত উপস্থিত হৈ নিকিতা আৰু তেওঁৰ পৰিয়ালৰ লোকক জেৰা কৰে।
যোৱা ৯ ডিচেম্বৰৰ পুৱতি নিশা ৩৪ বছৰীয়া অতুলে নিজৰ ঘৰত চিপ লৈ আত্মহত্যা কৰে। আত্মহত্যা কৰাৰ পূৰ্বে তেওঁ এটা ৯০ মিনিটৰ ভিডিঅ’ নিৰ্মাণ কৰিছিল। লগতে, ২৪ পৃষ্ঠাৰ এখন ছুইচাইড নোটো লিখিছিল। ভিডিঅ’ আৰু ছুইচাইড নোটত উল্লেখ কৰা অনুসৰি আদালতত বিবাহ বিচ্ছেদৰ কাৰ্য্যবিধিৰ সময়ত তেওঁৰ পত্নী নিকিতা সিংহানিয়াই তেওঁক আত্মহত্যা কৰিবলৈ উৎসাহিত কৰিছিল।
মৃতকৰ ভাতৃ বিকাশ কুমাৰে জনোৱা মতে, ৮ মাহ পূৰ্বে অতুল আৰু তেওঁৰ পত্নীয়ে পৃথকে পৃথকে থাকিবলৈ আৰম্ভ কৰিছিল অতুলৰ বিৰুদ্ধে হত্যাৰ চেষ্টা, ধনৰ বাবে হাৰাশাস্তি, ঘৰুৱা হিংসা, ধনৰ দাবী আদি মুঠ ৯টা ভুৱা গোচৰ ৰুজু কৰা হৈছিল। আনকি তেওঁৰ পত্নীয়ে অভিযোগ প্ৰত্যাহাৰ কৰিবলৈ ৩ কোটি টকা দাবী কৰিছিল। বিকাশৰ মতে, এই ঘটনাৰ পিছত তেওঁৰ ভাতৃ মানসিক আৰু শাৰীৰিকভাৱে বিধ্বস্ত হৈ পৰিছিল। জানিব পৰা মতে, আৰক্ষীয়ে ইতিমধ্যে অতুলৰ পত্নীক গ্ৰেপ্তাৰ কৰিছে।
