সাম্প্ৰতিক সময়ত অভাৱনীয়ভাৱে বৃদ্ধি পোৱা নিষ্পত্তিহীন গোচৰৰ সংখ্যাই দেশৰ ন্যায় ব্যৱস্থাত এক সংকটৰ সৃষ্টি কৰিছে। ন্যায়ালয়সমূহত নিষ্পত্তি নোহোৱাকৈ থকা লাখ লাখ গোচৰৰ সংখ্যাই ন্যায় ব্যৱস্থাটোক এক প্ৰকাশ কোঙা কৰি তুলিছে।
অসমকে ধৰি দেশৰ বিভিন্ন ৰাজ্যত নিষ্পত্তি নোহোৱাকৈ পৰি থকা গোচৰৰ সংখ্যাই গভীৰ সংকটৰ সৃষ্টি কৰিছে।
কেন্দ্ৰীয় চৰকাৰৰ তথ্যই দেশৰ ন্যায় ব্যৱস্থাটোৰ স্বৰূপ উদঙাই দিছে। কেন্দ্ৰীয় চৰকাৰৰ তথ্য অনুসৰিয়েই যোৱা ৩১ জানুৱাৰিলৈকে অকল উচ্চতম ন্যায়ালয়তে ৫৬,৯৯৪ টা গোচৰ নিষ্পত্তি নোহোৱাকৈ পৰি আছে। সেইদৰে গুৱাহাটীকে ধৰি দেশৰ বিভিন্ন উচ্চ ন্যায়ালয়সমূহত মুঠ ৪২,৪৫,৭৭৫টা গোচৰ মীমাংসা নোহোৱাকৈ পৰি আছে।
আনহাতে, ন্যায়ালয়সমূহত গোচৰৰ সংখ্যা বৃদ্ধি পাই অহাৰ বিপৰীতে বিচাৰকৰ সংখ্যা বৃদ্ধি পোৱা নাই। খালী হোৱা বিচাৰকৰ পদৰ সংখ্যা বৃদ্ধিহে পাই আছে। বৰ্তমান উচ্চতম ন্যায়ালয়ত ৩টা আৰু দেশৰ বিভিন্ন উচ্চ ন্যায়ালয়সমূহত ৪০০টা ন্যায়াধীশৰ পদ খালী হৈ আছে।
লক্ষ্যণীয়ভাৱে, কেন্দ্ৰীয় আইন আৰু ন্যায় মন্ত্ৰ্যালয়ৰ তথ্য অনুসৰি যোৱা ৩১ জানুৱাৰিলৈকে গুৱাহাটী উচ্চ ন্যায়ালয়ত ৪০,৯৬৭টা গোচৰ নিষ্পত্তি নোহোৱাকৈ পৰি আছে। তদুপৰি, গুৱাহাটী উচ্চ ন্যায়ালয়ৰ মুঠ ২৪টা অনুমোদিত বিচাৰকৰ পদৰ ভিতৰত ৪টা পদ বৰ্তমানো খালী হৈ আছে।
তাৎপৰ্যপূৰ্ণভাৱে, বিগত ২০১৬ চনৰ ৩১ মাৰ্চলৈকে গুৱাহাটী উচ্চ ন্যায়ালয়ত নিষ্পত্তি নোহোৱাকৈ পৰি থকা মুঠ গোচৰৰ সংখ্যা আছিল ২৭,০১৩টা। কিন্তু মাত্ৰ তিনিটা বছৰতে এই সংখ্যা ৪০,৯৬৭টালৈ বৃদ্ধি পাইছে। প্ৰায় তিনি বছৰৰ ভিতৰত ৰাজ্যৰ উচ্চ ন্যায়ালয়ত ১৩,৯৫৪টা গোচৰ বৃদ্ধি পোৱাটো সঁচাকৈয়ে চিন্তনীয় বিষয়।
ইপিনে, গুৱাহাটী উচ্চ ন্যায়ালয়ৰ বাহিৰে ৰাজ্যৰ বিভিন্ন জিলাত থকা আদালতসমূহতো বৃহৎ সংখ্যক বিচাৰকৰ পদ খালী হৈ পৰি আছে। চৰকাৰী তথ্য অনুসৰি ৰাজ্যৰ জিলা আদালতসমূহৰ বাবে অনুমোদিত মুঠ ৪৩০টা বিচাৰকৰ ভিতৰত ৭৪টা পদেই বৰ্তমানো খালী হৈ আছে। আনহাতে, জিলা আদালতসমূহত যোৱা ১৮ জুলাইলৈকে মুঠ ২,৭৩,০৯৮টা গোচৰ নিষ্পত্তি নোহোৱাকৈ পৰি আছে।
এইদৰে বৃহৎ সংখ্যক গোচৰৰ ভৰত কোঙা হৈ পৰা ন্যায় ব্যৱস্থাটোৰ পৰা ন্যায়াৰ আশাত বন্দী লোকসকলে ভাগ্যৰ ওপৰতে ভৰসা কৰি বহি থাকিবলগীয়া হৈছে।
