সমগ্ৰ অসমৰ লগতে শিৱসাগৰ জিলাতো যোৱা ৩ অক্টোবৰৰ পৰা আৰম্ভ হোৱা দ্বিতীয় পৰ্যায়ৰ সদৌ অসম মণ্ডল কানন্গো সন্মিলনীৰ অসহযোগ কাৰ্যসূচী আজি তৃতীয় দিনাও অব্যাহত আছে।
আজি শিৱসাগৰ জিলা প্ৰশাসনৰ কৰ্মচাৰী পৰিষদে সদৌ অসম মণ্ডল কানন্গো সন্মিলনীৰ অসহযোগ কাৰ্যসূচীৰ নৈতিক সমৰ্থন জনাইছে বুলি পৰিষদৰ সভাপতি অনিল বৰা আৰু সম্পাদক জিতেন মিলিয়ে জানিবলৈ দিছে।
আনহাতে অসম চৰকাৰৰ ভুৱা প্ৰতিশ্ৰুতিৰ ফলত সদৌ অসম মণ্ডল কানন্গো সন্মিলনীৰ ন্যায্য প্ৰাপ্তীৰ দাবীত আৰম্ভ কৰা তিনিদিনীয়া অসহযোগৰ ফলত শিৱসাগৰত ৰাজহ বিভাগৰ কাম কাজ সম্পূৰ্ণ ৰূপে স্তব্ধ হৈ পৰিছে। যাৰ বাবে জনসাধাৰণে বিভিন্ন সমস্যাৰ সন্মুখীন হ’বলগীয়া হৈছে।
জানিব পৰা মতে অসম চৰকাৰে তেওঁলোকৰ ন্যায্য দাবীসমূহ পূৰণ কৰাৰ পৰিৱৰ্তে সকলো মণ্ডলক এখনকৈ মটৰ চাইকেল প্ৰদান কৰিব বুলি এক আভুৱা ভৰা সিদ্ধান্ত গ্ৰহণৰ প্ৰচাৰ চলাইছে। ইফালে মণ্ডল সকলে চৰকাৰৰ এনে টোপ গ্ৰহণ কৰিব নিবিচাৰে বুলি শিৱসাগৰ জিলাৰ মণ্ডল কানন্গো সন্মিলনীৰ সম্পাদক বিনোদ গগৈয়ে জানিবলৈ দিছে।
সদৌ অসম মণ্ডল কানন্গো সন্মিলনীৰ সভাপতি অমূল্য কলিতা আৰু সাধাৰণ সম্পাদক প্ৰদীপ কলিতাই অসম চৰকাৰে দুমাহৰ পূৰ্বে দিয়া প্ৰতিশ্ৰুতি বিগত পাঁচ মাহে পালন নকৰাৰ ববেই পুনৰ অন্দোলনৰ কাৰ্যসূচী গ্ৰহণ কৰিবলগীয়া অৱস্থাৰ সৃষ্টি হ’ল বুলি উল্লেখ কৰে।
লগতে সন্মিলনীৰ ন্যায্য দাবীৰ ক্ষেত্ৰত গ্ৰহণ কৰা অসহযোগৰ ফলত জনসাধাৰণে সন্মুখীন হোৱা সমস্যাৰ বাবে ৰাইজৰ ওচৰত ক্ষমা বিচাৰে।
তাৰোপৰি চৰকাৰে ক্ষীপ্ৰতাৰে তেওঁলোকৰ দাবীসমূহ পূৰণ নকৰিলে পুনৰ অহা ৯ অক্টোবৰৰ পৰা অনিৰ্দিষ্টকালীন অসহযোগ আন্দোলনৰ হুংকাৰ প্ৰদান কৰি জিলাখনত ৬ টাকৈ কাননগো ৰাজহ পৰিদৰ্শক দুটাকৈ পদ তৎকালীভাৱে পূৰণ কৰিবলৈ সন্মীলনীয়ে দাবী জনাইছে।
