মধ্যপ্ৰাচ্যত চলি থকা উত্তপ্ত পৰিস্থিতিৰ পোনপটীয়া প্ৰভাৱ পৰিছে ক্ৰিকেট বিশ্বৰ অন্যতম জনপ্ৰিয় প্ৰতিযোগিতা আই পি এলৰ ওপৰত। যদিও আই পি এলৰ প্ৰথম পৰ্যায়ৰ খেলসমূহৰ সূচী ইতিমধ্যে ঘোষণা কৰা হৈছে, তথাপিও প্ৰতিযোগিতাখন সুকলমে আৰম্ভ হোৱাক লৈ এতিয়াও বিভিন্ন প্ৰশ্নৰ অৱতাৰণা হৈছে। শেহতীয়া খবৰ অনুসৰি, আই পি এল নিৰ্ধাৰিত সময়ত আৰম্ভ হ’লেও ইয়াৰ আৰম্ভণিতে সকলো বিদেশী ক্ৰিকেটাৰক পোৱা যাব নে নাই, তাক লৈ এক গভীৰ সন্দেহৰ সৃষ্টি হৈছে।
যুদ্ধৰ পৰিৱেশৰ বাবে ডুবাই আৰু ডোহাৰ দৰে গুৰুত্বপূৰ্ণ ট্ৰেনজিট পইণ্টসমূহত বিমান পৰিবহণ সেৱা এতিয়াও স্বাভাৱিক হৈ উঠা নাই। ইয়াৰ ফলত ৱেষ্ট ইণ্ডিজ আৰু দক্ষিণ আফ্ৰিকাৰ বহু ক্ৰিকেটাৰ নিজ নিজ দেশলৈ উভতি যোৱাত সমস্যাৰ সন্মুখীন হৈছে। ইমান কম সময়ৰ ভিতৰত তেওঁলোকে পুনৰ ভাৰতলৈ আহি আই পি এলত যোগদান কৰিব পাৰিবনে নাই, সেইটোৱেই এতিয়া ডাঙৰ চিন্তাৰ কাৰণ হৈ পৰিছে। কেৱল এই দুখন দেশেই নহয়, আন বহু দেশৰ ক্ৰিকেটাৰসকলো এই পথটোৱেই ট্ৰেনজিট হিচাপে ব্যৱহাৰ কৰে, যাৰ বাবে সকলো দলৰে খেলুৱৈৰ সংকট হোৱাৰ সম্ভাৱনা আছে। বিশেষকৈ যিবোৰ দলত এই দেশসমূহৰ ক্ৰিকেটাৰ আছে, সেই দলবোৰ বেছি প্ৰভাৱিত হ’ব বুলি ধাৰণা কৰা হৈছে।
আনহাতে, সমগ্ৰ বিশ্বতে শক্তি সংকটৰ পৰিস্থিতি বিৰাজ কৰাৰ বাবে ভাৰততো ইয়াৰ প্ৰভাৱ দেখা গৈছে। দেশত গেছৰ যোগান নিয়ন্ত্ৰণৰ বাবে চৰকাৰে বিভিন্ন ব্যৱস্থা গ্ৰহণ কৰিবলগীয়া হৈছে। এনে এক পৰিস্থিতিত আই পি এলৰ দৰে বৃহৎ পৰিমাণৰ অনুষ্ঠান আয়োজন কৰা কিমান দূৰ সম্ভৱ হ’ব, সেই লৈও চৰ্চা চলিছে। যদি পৰিস্থিতিৰ দ্ৰুত উন্নতি নহয়, তেন্তে প্ৰতিযোগিতাখন পিছুৱাই দিয়াৰ বাহিৰে ব’ৰ্ডৰ হাতত আন কোনো বিকল্প নাথাকিব পাৰে বুলিও একাংশ মহলে আশংকা প্ৰকাশ কৰিছে।
ইফালে, আই পি এলৰ আয়োজন সম্পূৰ্ণৰূপে বন্ধ কৰাৰ কথা বৰ্তমানলৈকে ব’ৰ্ডে ভবা নাই। পৰিস্থিতিৰ ওপৰত তীক্ষ্ণ নজৰ ৰখাৰ লগতে সকলো খেল যাতে নিৰ্ধাৰিত সময়ত আৰু সুকলমে সম্পন্ন কৰিব পৰা যায়, তাৰ বাবে শেষ মুহূৰ্তলৈকে প্ৰচেষ্টা অব্যাহত ৰখা হ’ব বুলি জানিব পৰা গৈছে।
