চুলুং পাইকাৰী বজাৰৰ পৰা বৰঘুলিৰ নিজ ঘৰ অভিমুখে গৈ থকা দুজন ব্যৱসায়ীক খুকুৰি-ৰডেৰে প্ৰহাৰ কৰি ধন কাঢ়ি নিয়া দুৰ্বৃত্তৰ এতিয়াও কোনো সন্ধান উলিয়াব নোৱাৰিলে আৰক্ষীয়ে।
ইয়াৰ বিপৰীতে আৰক্ষীয়ে ঘটনাটোক লগত লৈ ৰহস্যজনক স্থিতি লোৱাৰহে অভিযোগ উঠিছে। আৰক্ষীয়ে ঘটনাটোক গুৰুত্বহীনভাৱে লৈছে আৰু ঘটনাৰ পিছতে এজাহাৰ দিয়াৰ পিছতো অপৰাধীক ধৰাৰ কোনো চেষ্টা কৰা নাই বুলি অভিযোগ আনিছে ভুক্তভোগীৰ পৰিয়ালে।
উল্লেখযোগ্য যে ১ ডিচেম্বৰৰ দিনা চুলুং বজাৰৰ পৰা মটৰচাইকেলত ঘূৰি আহি থকা অৱস্থাত অহিদুল ইছলাম আৰু আব্দুল ফাৰুক নামৰ ব্যৱসায়ী দুজনক আক্ৰমণ কৰি সমুদায় ধন লৈ এখন নম্বৰবিহীন পালছাৰ বাইকত উধাও হয় দুৰ্বৃত্তৰ দলটো।
দুৰ্বৃত্তকেইজনৰ প্ৰহাৰত গুৰুতৰভাৱে আহত হৈছিল অহিদুল ইছলাম আৰু আব্দুল ফাৰুক। আৰক্ষীয়ে দুয়োজনক জখলাবন্ধা চিকিৎসালয়লৈ প্ৰেৰণ কৰিছিল।
আনহাতে দুৰ্বৃত্তৰ দলটোৱে ব্যৱসায়ী দুজনৰ পৰা কাঢ়ি নিয়া ধনৰ পৰিমাণক লৈয়ো ভুক্তভোগীৰ পৰা ভিন্ন মত দিছে আৰক্ষীয়ে। ধনৰ পৰিমাণক লৈ ব্যৱসায়ী দুজনেও মিছা মতা বুলি মন্তব্য কৰিছে স্থানীয় ৰাইজে। অহিদুল ইছলাম আৰু তেওঁৰ ভায়েকৰ মতে তেওঁলোকৰ হাতত আছিল প্ৰায় এক লাখ ত্ৰিচ হাজাৰ টকা। আনহাতে আৰক্ষীৰ মতে, ইমান টকা থকা কথাটো সঁচা নহয় যেন লাগে।
