১৬ বছৰ পূৰ্বে, ২০০৬ চনৰ ২১ জুনত নেপালৰ এটা বিমান দুৰ্ঘটনাত মৃত্যু হৈছিল য়েটি এয়াৰলাইনন্সৰ সহ-পাইলট দীপক পোখৰেলৰ। সেই দুৰ্ঘটনাটোত লগতে মৃত্যু হৈছিল ৬ জন যাত্ৰী আৰু ৪ জন ক্ৰুৰ। মৃত্যুৰ সময়ত দীপক পোখৰেলে অকলশৰীয়া কৰি থৈ গৈছিল পত্নী অঞ্জু খাতিৱাৰাক।
অঞ্জু খাতিৱাৰাও আছিল স্বামী দীপক পোখৰেলৰ দৰে এগৰাকী সহ-পাইলট। স্বামীৰ মৃত্যুৰ পিছত নিজকে চম্ভালি লৈ যথেষ্ট কষ্টৰ মাজেৰে নিজৰ জীৱন-জীৱিকাত মনোনিৱেশ কৰিছিল অঞ্জুৱে।
কিন্তু দুৰ্ভাগ্যজনক ভাবে যোৱা শনিবাৰে নেপালত সংঘটিত হোৱা বিমান দুৰ্ঘটনাটোত মৃত্যু হয় অঞ্জু খাতিৱাৰাৰ। শনিবাৰে দুৰ্ঘটনাত পতিত হোৱা বিমানখনৰ সহ-পাইলটৰ দায়িত্বত আছিল অঞ্জু খাতিৱাৰা। খাতিৱাৰাৰ জীৱনত সহ-পাইলট হিচাপে এইটোৱেই আছিল অন্তিমটো উৰণ। দুৰ্ঘটনা নহৈ এই উৰণ সম্পূৰ্ণ হোৱাৰ পিছতে সহ-পাইলটৰ পৰা পাইলটলৈ পদোন্নতি হ’লহেতেঁন অঞ্জু খাতিৱাৰাৰ। কাৰণ এই যাত্ৰা সম্পূৰ্ণ কৰা হ’লে সহ-পাইলটৰ পৰা পাইলট হ’বলৈ লগা ১০০ ঘন্টাৰ উৰণ অভিজ্ঞতা সম্পূৰ্ণ হ’লহেতেঁন অঞ্জুৰ।
কিন্তু ভাগ্যৰ বিৰম্বনা আৰু বিধিৰ লিখনে অঞ্জুকো লৈ গ’ল নেদেখা দেশলৈ। সহ-পাইলট অঞ্জুৱে সহ-পাইলট স্বামীৰ দৰেই বিমান দুৰ্ঘটনাতে সামৰিলে ইহ সংসাৰ। ৬৮ জন যাত্ৰীৰ লগতে এই বিমান দুৰ্ঘটনাটোত প্ৰাণ হেৰুৱালে ৪ জন বিমান কৰ্মীয়ে।
দেওবাৰে নেপালৰ পোখাৰাত দুৰ্ঘটনাগ্ৰস্ত হোৱা য়েটি এয়াৰলাইন্সৰ এ টি আৰ ৭২ বিমানখনৰ পাইলট আছিল কমল কে চি। ৩৫ বছৰীয়া উৰণৰ অভিজ্ঞতা থকা কমল কেচিৰ ভুলৰ বাবেই নে কাৰিকৰী বিজুতিৰ বাবেই হ’ল এই দুৰ্ঘটনা সেয়া এতিয়ালৈকে পোহৰলৈ অহা নাই।
