অসম প্ৰদেশ কংগ্ৰেছ কমিটিয়ে আৰম্ভ কৰা দ্বিতীয় পৰ্যায়ৰ ‘সময় পৰিৱৰ্তনৰ’ শীৰ্ষক যাত্ৰা আজি তিনিচুকীয়া জিলাত প্ৰৱেশ কৰে। অসম প্ৰদেশ কংগ্ৰেছ কমিটিৰ সভাপতি গৌৰৱ গগৈৰ নেতৃত্বত এই যাত্ৰা আজি জিলাখনৰ তিনিচুকীয়া, ডিগবৈ, মাকুম আৰু মাৰ্ঘেৰিটা সমষ্টিৰ মাজেৰে পদযাত্ৰাৰ জৰিয়তে অগ্ৰসৰ হয়। “আলি কাটি জালি দিম বৰপীৰা পাৰি দিম/এইবাৰ কংগ্ৰেছ চৰকাৰ আনি দিম/এইবাৰ সকলোৱে হাততেই ভোট দিম”… শীৰ্ষক গীতৰ তালে তালে এনেদৰে উজনিত বৃদ্ধি পাইছে কংগ্ৰেছৰ নিৰ্বাচনী উত্তাপ।
সময় পৰিৱৰ্তন যাত্ৰাৰ কাৰ্যসূচীৰে গৌৰৱ গগৈয়ে আজি তিনিচুকীয়াত পদাৰ্পন কৰিয়েই কয় যে এয়া কেৱল পৰিবৰ্তনৰ যাত্ৰা নহয়, এয়া হৈছে সমন্বয়ৰ যাত্ৰা, অসমবাসীৰ আত্মৰক্ষাৰ যাত্ৰা। এয়া হৈছে নিবনুৱা সকলৰ আশাৰ যাত্ৰা, অসমক হিটলাৰী শাসন ব্যৱস্থাৰ পৰা মুক্ত কৰা যাত্ৰা। পদযাত্ৰাৰ আৰম্ভণিতে গৌৰৱ গগৈয়ে স্বাধীনতা সংগ্ৰামী সুভাষ চন্দ্ৰ বসু, শ্বহীদ পিয়লি ফুকন আৰু সুধাকণ্ঠ ড° ভূপেন হাজৰিকাৰ প্ৰতিমূৰ্তিত শ্ৰদ্ধাঞ্জলি অৰ্পণ কৰে। তিনিচুকীয়াৰ পৰা বিয়লি ভাগত কংগ্ৰেছৰ এই যাত্ৰা ডুমডুমাত উপস্থিত হয়। ডুমডুমা নগৰত প্ৰৱেশ কৰাৰ পিছতে স্থানীয় কেইবা শতাধিক কংগ্ৰেছ কৰ্মীয়ে দলটোক আদৰণি জনায়। “আলি কাটি জালি দিম, বৰপীৰা পাৰি দিম, এইবাৰ সকলোৱে কংগ্ৰেছক ভোট দিম, কংগ্ৰেছ চৰকাৰ আনি দিম” এই নতুন গীতেৰে ৰাজপথ মুখৰিত কৰি দলটোৱে ডুমডুমা নগৰৰ মাজমজিয়াৰে আহি কলিয়াপানী চাৰিআলিত ৰাইজক সম্বোধন কৰি গৌৰৱ গগৈয়ে কয় যে এইবাৰ অসমৰ ৰাইজে ভয়-ভাবুকিৰ পৰিৱৰ্তে এখন শান্তিপূৰ্ণ নতুন বৰ অসম বিচাৰিছে। বিজেপি চৰকাৰক তীব্ৰ সমালোচনা কৰি গগৈয়ে কয়, এতিয়া অসম মাত্ৰ এজন মানুহৰ বাবে চলে, এজন মানুহৰ ঘৰৰ উন্নয়নৰ বাবে চলে। এইখন চৰকাৰৰ দিনতেই এজন মানুহৰ ঘৰৰ ভিতৰতে ১২ হেজাৰ বিঘা ভূমি বিভিন্ন জন সদস্যৰ নামত পঞ্জীয়ন হৈছে। তেওঁ কয়, এই চৰকাৰৰ অন্যায়ৰ বিৰুদ্ধে আমি মাত মাতি যাম। আজি অসমত চৰকাৰী বিদ্যালয় বন্ধ কৰি গাঁৱে-ভূঞে মদৰ দোকান খুলিবলৈ দিছে। অসমত এতিয়া চাহ উদ্যোগৰ অৱস্থা বেয়া হৈ গৈছে। কংগ্ৰেছে বিচাৰে, অসমৰ ৰাইজ শান্তি সম্প্ৰীতি আৰু স্বাভিমানেৰে জীয়াই থাকক। অসমৰ ৰাইজ জুবিন গাৰ্গৰ দৰে নিৰ্ভয় আৰু স্পষ্টবাদী হোৱাটো বিচাৰোঁ। তেওঁ লগতে কয়, ৰাইজে এইবাৰ যুঁজিব, ৰাইজ জিকিব আৰু কংগ্ৰেছৰ নেতৃত্বত এখন চৰকাৰ হ‘ব যিখন চৰকাৰৰ দিনত ৰাইজ নিৰ্ভয়ে থাকিব পাৰিব।
ৰাইজক সম্বোধন কৰি বিৰোধী দলপতি দেৱব্ৰত শইকীয়াই কয় যে অসমৰ দৰিদ্ৰ ৰাইজে ভূমিৰ পট্টা বিচাৰিছে যদিও এই চৰকাৰখনে বসুন্ধৰা এক, দুই, তিনিৰ পিছতো ৰাইজক মাটিৰ পট্টা দিয়াত ব্যৰ্থ হৈছে। কিন্তু ইয়াৰ বিপৰীতে মাটিৰ খাজনা পূৰ্বতকৈ বহুগুণে বৃদ্ধি কৰি দিছে। পৰৱৰ্তী সময়ত এই যাত্ৰা ডিগবৈ আৰু মাৰ্ঘেৰিটা বিধানসভা সমষ্টিৰ দিশে ৰাওনা হয়। ডিগবৈ আৰু মাৰ্ঘেৰিটা সমষ্টিতো গৌৰৱ গগৈ নেতৃত্বাধীন কংগ্ৰেছৰ এই যাত্ৰাক ৰাইজে উষ্ম আদৰণি জনায়।
উল্লেখ্য যে, আজি যাত্ৰাৰ সময়ত সমগ্ৰ তিনিচুকীয়া জিলা ”আলিকাটি জালি দিম, বৰপীৰা পাৰি দিম, এইবাৰ কংগ্ৰেছ চৰকাৰ আনি দিম’’ গীতেৰে মুখৰিত হৈ পৰে। আনহাতে, ৰাইজৰ সৈতে মত বিনিময়ৰ উপৰিও এই যাত্ৰা সু-শৃংখলিতভাৱে সমাপনৰ ক্ষেত্ৰত প্ৰতিটো সৰু বৰ দিশ প্ৰদেশ কংগ্ৰেছৰ সভাপতি গৌৰৱ গগৈয়ে নিজেই তদাৰক কৰে। ৰাইজৰ মাজত থাকি সকলো কামত এনেদৰে নিজেই আগভাগ লোৱাতো প্ৰত্যক্ষ কৰি প্ৰতিগৰাকী প্ৰত্যক্ষদৰ্শী অভিভূত হৈ পৰে। আজিৰ এই যাত্ৰাত গৌৰৱ গগৈক অসম বিধানসভাৰ বিৰোধী দলৰ দলপতি দেৱব্ৰত শইকীয়া, সাংসদ প্ৰদ্যুৎ বৰদলৈ, নিৰ্বাচনী পৰ্যবেক্ষক তথা ঝাৰখণ্ডৰ প্ৰাক্তন মন্ত্ৰী বন্ধু তিৰ্কী, অসম প্ৰদেশ কংগ্ৰেছ কমিটিৰ উপ-সভাপতি তথা প্ৰাক্তন বিধায়ক দিলীপ মৰাণ, প্ৰদেশ কংগ্ৰেছৰ সম্পাদক তথা প্ৰাক্তন বিধায়ক ৰাজু চাহু, তিনিচুকীয়া জিলা কংগ্ৰেছৰ সভাপতি তথা ডুমডুমা সমষ্টিৰ দুবাৰৰ বিধায়ক দুৰ্গা ভূমিজ সহ বহুকেইগৰাকী জ্যেষ্ঠ কংগ্ৰেছ নেতাই সংগ দিয়ে।
