অৰুণাচলত শেহতীয়াকৈ নিৰ্মাণ কৰিবলৈ লোৱা ২২২০ মেগাৱাট অজো জলবিদ্যুৎ প্রকল্প, ২০০০ মেগাৱাট কমলা জলবিদ্যুৎ প্রকল্প, ২৫০০ মেগাৱাট উজনি সোৱণশিৰি প্ৰকল্প আৰু ১২০০০ মেগাৱাট আপাৰ ছিয়াং জলবিদ্যুৎ প্রকল্পকে ধৰি ১৩৫ টা বৃহৎ নদীবান্ধৰ বিৰোধিতা কৰি লক্ষীমপুৰ ৰাইজৰ দলৰ ভাতৃ সংগঠন জাতীয় যুৱ বাহিনীয়ে কালি দেশৰ প্ৰধানমন্ত্ৰী নৰেন্দ্ৰ মোদী আৰু কেন্দ্ৰীয় শক্তি মন্ত্র মনোহৰ লাল কট্টৰৰ প্ৰতিমূৰ্তি দাহ কৰি প্ৰতিবাদ সাব্যস্ত কৰাৰ পাছতে প্রতিবাদকাৰীসকলৰ ওপৰত তৎপৰ হৈ পৰিছে লক্ষীমপুৰ আৰক্ষী।
গণতান্ত্রিক আন্দোলনৰ ভাষা বুজি নোপোৱা অসম আৰক্ষীয়ে বিনা কাৰণত আজি দিনৰ ২.০০ বজাৰ পৰা ঘণ্টা ঘণ্টা ধৰি আৰক্ষী থানাৰ ভিতৰতে কোনো কাৰণ নজনোৱাকৈ আৱদ্ধ কৰি ৰাখিছে প্রতিবাদকাৰী নেতা ক্রমে জাতীয় যুৱ বাহিনীৰ কেন্দ্রীয় সম্পাদক শ্রী মঞ্জিল জৈন, লক্ষীমপুৰ জিলা সমিতি সভাপতি শ্রী দেৱজিৎ শইকীয়া আৰু সাধাৰণ সম্পাদক শ্রী আজিজ আলিকে ধৰি কেইবাজনো প্রতিবাদকাৰীক।
গণতান্ত্রিক আন্দোলন কৰা প্ৰতিবাদকাৰীক আৰক্ষীয়ে এইদৰে ঘণ্টা ঘণ্টা ধৰি আটক কৰি ৰখা ঘটনাক গণতন্ত্র বাবে চৰম দুর্ভাগ্যজনক আখ্যা দিছে জাতীয় যুৱ বাহিনীৰ কেন্দ্ৰীয় সভাপতি লক্ষ্যজ্যোতি গগৈ আৰু সাধাৰ সম্পাদক নির্মল পায়েঙে।
এক বিবৃতি যোগে গগৈয়ে উল্লেখ কৰিছে যে অৰুণাচলত নিৰ্মাণ কৰিবলৈ বিচৰা এই বৃহৎ নদীবান্ধসমূহৰ পৰা অসমৰ একো লাভ নহয় বৰঞ্চ গুজৰাট আৰু অন্য ৰাজ্যৰহে লাভালাভ হ’ব। এই বৃহ নদীবান্ধ নির্মাণ হ’লে অসমৰ ওপৰত ব্যাপক দুর্যোগ নামি আহিব, খৰালি কালত অসমৰ নদীসমূহ শুকাই যাব আৰু বাৰিষা বানপানীৰ ফলত নদী কাষৰীয়া অঞ্চলসমূহ ব্যাপকভাবে ক্ষতিগ্রস্ত হ’ব আৰু এইসমূহ বান্ধ নিৰ্মাণ কৰিবলৈ কোটি কোটি গছ-গছনি কটাৰ ফলত সামগ্রিকভাৱে উত্তৰ পূৰ্বাঞ্চলৰ জলবায়ুৰ ব্যাপক ক্ষতি হ’ব।
গগৈয়ে মোদী নেতৃত্বাধীন কেন্দ্ৰীয় চৰকাৰ আৰু হিমন্ত বিশ্ব শর্মা নেতৃত্বাধীন অসম চৰকাৰক ক্ষুৰধাৰ সমালোচ কৰি কয় গণতান্ত্রিক আন্দোলনৰ ভাষা বুজি অতি শীঘ্ৰে যদি আটাইকেইগৰাকী প্ৰতিবাদকাৰীক বিনাচর্তে মুকলি কৰি নিদিয়ে তেন্তে জাতীয় যুৱ বাহিনীয়ে কঠোৰতকৈ কঠোৰ পদক্ষেপ ল’বলৈ বাধ্য হ’ব।
জাতীয় যুব বাহিনীয়ে বৃহৎ নদীবান্ধ কোনো কাৰণত হ’বলৈ নিদিয়ে। অৰুণাচলৰ বৃহৎ নদীবান্ধ বন্ধ কৰিবৰ বাবে জাতীয় যুৱ বাহিনীয়ে পৰৱৰ্তী পৰ্যায়ত এলানি প্রতিবাদী কার্যসূচী ঘোষণা কৰিব বুলিও যুৱ সংগঠনটোৱে জানিবলৈ দিয়ে। অসম ধ্বংস কৰা কোনো কামকে ৰাইজৰ দল আৰু জাতীয় যুৱ বাহিনীয়ে সহ্য নকৰে বুলি একেটা বিবৃতিতে উল্লেখ কৰিছে।
