শ্ৰীমন্ত শংকৰদেৱ সংঘৰ ৮৮ সংখ্যক অধিৱেশনখন বুধবাৰৰ পৰা চাৰিদিনীয়া কাৰ্যসূচীৰে মৰিগাঁৱৰ লক্ষ্মীনাথ বেজবৰুৱা সমন্বয় ক্ষেত্ৰত অনুষ্ঠিত হ’ব। ভকত-বৈষ্ণৱৰ মহামিলনৰ ক্ষেত্ৰত পৰিণত হ’বলগীয়া এই অধিৱেশনৰ বাবে সকলো প্ৰস্তুতি প্ৰায় সম্পূৰ্ণ হৈ উঠিছে।
৬ ফেব্ৰুৱাৰিৰ পৰা ৯ ফেব্ৰুৱাৰিলৈ অনুষ্ঠিত হ’বলগীয়া সংঘৰ অধিৱেশনখনৰ বাবে মৰিগাঁৱৰ লক্ষ্মীনাথ বেজবৰুৱা সমন্বয় ক্ষেত্ৰত বিশাল আয়োজন কৰা হৈছে। ৰাজ্যখনৰ বিভিন্ন প্ৰান্তৰ পৰা ভক্তৰ সমাগম হ’বলগীয়া অধিৱেশনস্থলীত যাতে কোনো লোকে অসুবিধাৰ সন্মুখীন নহয় তাৰ বাবে লক্ষ্য ৰাখি আয়োজক সমিতিয়ে সকলো ব্যৱস্থা গ্ৰহণ কৰিছে।
প্ৰায় আঢ়ৈ কোটি টকা বাজেট ধাৰ্য কৰা সংঘৰ মৰিগাঁৱ অধিৱেশনৰ মূল তোৰণখন ৩ লাখ টকা ব্যয় কৰি নিৰ্মাণ কৰি উলিওৱা হৈছে। তদুপৰি, ৮৮ গৰাকী চিত্ৰশিল্পীৰ চিত্ৰপটত উজলি উঠিবলগীয়া ‘চিত্ৰপটত শংকৰদেৱ’ হ’ব অধিৱেশনৰ অন্যতম আকৰ্ষণ। ইয়াৰ লগতে ১৬ খন আকৰ্ষণীয় তোৰণৰ উপৰি থাকিব ৮৮ হাত দীঘল গামোচাৰ বিশেষ আকৰ্ষণ।
জানিব পৰা মতে, অধিৱেশনখনত প্ৰায় ৩০ লাখ ভকতৰ সমাগম ঘটাৰ অনুমান কৰিছে আয়োজক সমিতিয়ে। সমিতিয়ে ভকতসকলৰ আপ্যায়নৰ বাবে একেলগে ১৫ হাজাৰ ভকতে বহি খাব পৰা ব্যৱস্থা সাজি উলিয়াইছে।
অধিৱেশনখন সুচাৰুৰূপে চলাই নিয়াৰ বাবে ১২ হাজাৰ স্বেচ্ছাসেৱক সাজু হৈছে। ৩৫খন উপ সমিতি, ১৮ খন সহায়ক সমিতি আৰু ৩০০টা শিবিৰেৰে অধিৱেশনখন সু-শৃংখলভাৱে চলাই নিয়াৰ প্ৰয়াস কৰা হৈছে।
আনহাতে, অধিৱেশনৰ লগত সংগতি ৰাখি আয়োজন কৰা গ্ৰন্থমেলাত ৫০০ খন গ্ৰন্থ বিপনীৰ লগতে বাণিজ্য মেলাতো ১০০০খন বাণিজ্যিক বিপনী থাকিব বুলি জানিব পৰা গৈছে।
অধিৱেশনৰ দিনকেইটাত অধিৱেশন থলীত ভক্তপ্ৰাণ ৰাইজে ভক্তিৰসৰ অমিয়া মাধুৰী পান কৰাৰ লগতে ‘এক দেৱ, এক সেৱ’ দৰ্শণৰ আধ্যাত্মিক চৈতন্য তুলি ধৰি গুৰু বন্দনাৰে অধিৱেশন থলী মুখৰিত কৰি তুলিব।
