হাৰিয়ানাৰ জনপ্ৰিয় গায়ক তথা ইউটিউবাৰ অঙ্কিত বালিয়ানক অতি নৃশংসভাৱে হত্যা কৰা হৈছে। ৩২ বছৰীয়া গায়কজনক লক্ষ্য কৰি দুৰ্বৃত্তই ১৮ জাঁই গুলী চলায়। ইয়াৰে পাঁচ জাঁই গুলী অঙ্কিতৰ শৰীৰত লাগে। এটাকৈ গুলী মূৰ ভেদ কৰি ওলাই যায়। ওচৰৰ চিকিৎসালয়লৈ লৈ যোৱাৰ পাছত চিকিৎসকে তেওঁক মৃত ঘোষণা কৰে।
ঘটনাটো উত্তৰ প্ৰদেশৰ শামলীত সংঘটিত হয়। বুধবাৰে নিশা শামলীৰ এখন ব্যায়ামাগাৰলৈ গৈছিল অঙ্কিত। ব্যায়ামাগাৰৰ পৰা ওলাই অহাৰ সময়তে বাহিৰত ৰৈ থকা দুৰ্বৃত্তই তেওঁলৈ লক্ষ্য কৰি গুলী চলাবলৈ আৰম্ভ কৰে। অঙ্কিতে নিজৰ এছ ইউ ভিৰ আঁৰত আত্মগোপন কৰি প্ৰাণ ৰক্ষা কৰাৰ চেষ্টা কৰিছিল যদিও গুলীৰ পৰা বাচিব নোৱাৰিলে।
ঘটনাক কেন্দ্ৰ কৰি হাৰিয়ানাৰ লগতে উত্তৰ প্ৰদেশতো ৰাজনৈতিক উত্তেজনা বৃদ্ধি পাইছে। উত্তৰ প্ৰদেশৰ বিৰোধী দলপতি তথা সমাজবাদী পাৰ্টীৰ মুৰব্বী অখিলেশ যাদৱে ঘটনাক লৈ ৰাজ্যখনৰ আইন-শৃংখলা ব্যৱস্থাক কঠোৰ সমালোচনা কৰিছে। কেইমাহমান পাছতেই উত্তৰ প্ৰদেশত বিধানসভা নিৰ্বাচন অনুষ্ঠিত হ’ব। সেয়ে এই হত্যাকাণ্ড নিৰ্বাচনৰ সময়ত এক গুৰুত্বপূৰ্ণ বিষয় হৈ উঠিব পাৰে বুলি ৰাজনৈতিক মহলত চৰ্চা চলিছে। হাৰিয়ানা আৰু পশ্চিম উত্তৰ প্ৰদেশৰ মাজত ভাষা আৰু সংস্কৃতিৰ মিল থকাৰ বাবে অঙ্কিতৰো অঞ্চলটোত যথেষ্ট জনপ্ৰিয়তা আছিল।
হত্যাৰ পিছতেই অঙ্কিতৰ অনুৰাগীয়ে নিশাই তেওঁৰ মৃতদেহ লৈ দিল্লী-মুজাফফৰনগৰ ৰাষ্ট্ৰীয় পথ অৱৰোধ কৰে। সেই সময়ত অঙ্কিতৰ মাকে পুত্ৰৰ মূৰ কোলাত লৈ পথতে বহি পৰে। কান্দি কান্দি তেওঁ উপস্থিত লোকসকলক শান্ত হৈ থাকিবলৈ আহ্বান জনাই কয়, “অনুগ্ৰহ কৰি অলপ মনে মনে থাকক। মোৰ ল’ৰা শুই আছে।”
হাৰিয়ানাৰ সামলিৰ বান্টিখেড়া গাঁৱৰ বাসিন্দা অঙ্কিত মঞ্চত গীত পৰিৱেশন কৰাৰ লগতে ইউটিউবতো যথেষ্ট জনপ্ৰিয় আছিল। তেওঁৰ বহু গীতৰ দৃশ্যত এছ ইউ ভি আৰু বিভিন্ন ধৰণৰ আগ্নেয়াস্ত্ৰৰ ব্যৱহাৰ দেখা গৈছিল। তেওঁৰ জনপ্ৰিয় গীতসমূহৰ ভিতৰত ‘ভৰি ক’ৰ্ট মে গুলি মাৰেংগে মেৰী জান’ অন্যতম।
হত্যাকাণ্ডৰ তদন্তৰ বাবে বিশেষ তদন্তকাৰী দল গঠন কৰা হৈছে বুলি উত্তৰ প্ৰদেশ আৰক্ষীৰ মীৰাট মণ্ডলৰ অতিৰিক্ত আৰক্ষী সঞ্চালক প্ৰধান ভানু ভাস্কৰে সংবাদ মাধ্যমক জনায়। আৰক্ষীৰ মতে, আক্ৰমণকাৰীৰ সংখ্যা আছিল চাৰিজন। তেওঁলোকে ব্যায়ামাগাৰৰ বাহিৰত দুখন মটৰচাইকেল লৈ অঙ্কিতৰ অপেক্ষাত আছিল। গুলী চলাই তেওঁৰ মৃত্যু নিশ্চিত কৰাৰ পাছত তেওঁলোকে ঘটনাস্থলীৰ পৰা পলাই যায়।
পশ্চিম উত্তৰ প্ৰদেশৰ এই অঞ্চলত পেছাদাৰী ভাড়াতীয়া হত্যাকাৰী দল সক্ৰিয় হৈ থকাৰ কথাও পোহৰলৈ আহিছে। অঙ্কিতক হত্যাৰ ক্ষেত্ৰতো তেনে ভাড়াতীয়া হত্যাকাৰীৰ ব্যৱহাৰ কৰা হ’ব পাৰে বুলি সন্দেহ কৰা হৈছে।
প্ৰাথমিক তদন্তত আৰক্ষীয়ে অঙ্কিতৰ হত্যাকাণ্ডৰ সৈতে হাৰিয়ানাৰ এখন স্থানীয় নিৰ্বাচনৰ যোগসূত্ৰ থকাৰ সন্দেহ কৰিছে। আৰক্ষীয়ে অঙ্কিতৰ চিনাকি লোকসকলৰ সৈতে কথা পাতি জানিবলৈ পাইছে যে তেওঁ স্থানীয় পঞ্চায়ত নিৰ্বাচনত অংশগ্ৰহণ কৰি ৰাজনীতিত প্ৰৱেশ কৰাৰ প্ৰস্তুতি চলাই আছিল। এই দিশটো অধিক গভীৰভাৱে তদন্ত কৰিবলৈ উত্তৰ প্ৰদেশ আৰু হাৰিয়ানা আৰক্ষীয়ে যৌথ তদন্তকাৰী দল গঠন কৰিব পাৰে বুলি ইংগিত পোৱা গৈছে।
