ৰাজস্থানৰ উদয়পুৰত থকা মোহনলাল সুখাদিয়া বিশ্ববিদ্যালয়ত বৰ্তমান এক অদ্ভুত পৰিস্থিতিৰ সৃষ্টি হৈছে। কোনো বাঘ বা ভালুক নহয়, বৰঞ্চ এটা সৰু কেৰ্কেটুৱাৰ সন্ত্ৰাসত ত্ৰস্তমান হৈ পৰিছে সমগ্ৰ বিশ্ববিদ্যালয় কৰ্তৃপক্ষ। যোৱা ডেৰ মাহৰ ভিতৰত এই আক্ৰমণাত্মক প্ৰাণীটোৱে কমেও ২০ গৰাকী ছাত্ৰ-ছাত্ৰী আৰু কৰ্মচাৰীক কামুৰি আহত কৰিছে। আনকি মহাবিদ্যালয়খনৰ ডিনগৰাকীও ইয়াৰ আক্ৰমণৰ পৰা সাৰি যাব পৰা নাই। বিশেষকৈ বিশ্ববিদ্যালয়ৰ চাইকোলজি বিভাগলৈ যোৱা মূল পথটোত এই কেৰ্কেটুৱাটোৰ উপদ্ৰৱ ইমানেই বৃদ্ধি পাইছে যে সেই পথেৰে যাবলৈ এতিয়া সকলোৱে ভয় কৰা হৈছে।
প্ৰত্যক্ষদৰ্শীসকলৰ মতে এই কেৰ্কেটুৱাটোৰ আচৰণ অতি আচৰিত ধৰণৰ। সাধাৰণতে কেৰ্কেটুৱা মানুহৰ কাষলৈ নাহে যদিও এই বিশেষ প্ৰাণীটোৱে কোনো উচতনি নোহোৱাকৈয়ে হঠাত্ গছৰ পৰা জঁপিয়াই পৰি পথচাৰীক কামুৰি দিয়ে আৰু মুহূৰ্তৰ ভিতৰতে পুনৰ গছত উঠি নোহোৱা হৈ যায়। এই সন্দৰ্ভত বিশ্ববিদ্যালয় কৰ্তৃপক্ষই বিশেষজ্ঞৰ সৈতে আলোচনা কৰিছে। বিশেষজ্ঞসকলে ধাৰণা কৰিছে যে চাইকোলজি বিভাগৰ ওচৰত হয়তো কেৰ্কেটুৱাটোৱে নিজৰ বাহ সাজিছে আৰু নিজৰ এলেকা সুৰক্ষিত ৰাখিবলৈকে সি মানুহৰ ওপৰত আক্ৰমণ চলাইছে। পশুপালন বিভাগৰ বিশেষজ্ঞৰ মতে কেতিয়াবা আংশিক অন্ধত্ব বা কোনো বিশেষ ৰঙৰ প্ৰতি বিৰক্তি থাকিলেও প্ৰাণীসমূহ এনেদৰে হিংস্ৰ হৈ উঠিব পাৰে।
এই সৰু প্ৰাণীটোক ধৰিবলৈ গৈ উদ্ধাৰকাৰী দলৰো এতিয়া অৱস্থা কাহিল হৈছে। ইতিমধ্যে দুবাৰকৈ উদ্ধাৰকাৰী দল মাতি আনি বিভিন্ন ঠাইত ফান্দ পতা হৈছিল যদিও কেৰ্কেটুৱাটো ধৰা পৰা নাই। অতি চতুৰ এই প্ৰাণীটোৱে বাৰে বাৰে ফান্দৰ পৰা বাচি পলাই যাবলৈ সক্ষম হৈছে। মহাবিদ্যালয়ৰ সহকাৰী ডিন নবীন নাভানাই সকলোকে সতৰ্ক কৰি দিছে আৰু কেৰ্কেটুৱাটো দেখা পালেই কৰ্তৃপক্ষক জনাবলৈ অনুৰোধ জনাইছে। আনহাতে বিশেষজ্ঞসকলে জনাইছে যে কেৰ্কেটুৱাই কামুৰিলে জলাতংক হোৱাৰ ভয় নাথাকে যদিও সাৱধানতা হিচাপে আহতসকলক টিটেনাচ বেজী ল’বলৈ পৰামৰ্শ দিয়া হৈছে।
