দেশত সংহাৰী ৰূপ ধাৰণ কৰিছে কোভিড১৯-এ।
আক্ৰান্তৰ লগতে দেশত কোভিড১৯ৰ আক্ৰান্তৰ চিকিৎসাত নিয়োজিত সন্মুখ যোদ্ধা তথা চিকিৎসক আৰু অন্যান্য চিকিৎসাকৰ্মীয়ো মৃত্যু ঘটিছে এই মাৰাত্মক ভাইৰাছবিধত।
তেনে সময়ত দেশৰ এখন ৰাজ্যৰ ৰাজ্য চৰকাৰে গ্ৰহণ কৰিছে অতি গুৰুত্বপূৰ্ণ সিদ্ধান্ত।
পশ্চিম বংগৰ মুখ্যমন্ত্ৰী মমতা বেনাৰ্জীয়ে ঘোষণা কৰিছে যে কোভিড১৯ৰ সন্মুখ যুঁজত নিয়োজিত যোদ্ধাসকল মৃত্যু হ’লে তেওঁলোকক ছহিদৰ মৰ্যাদা দিয়াৰ লগতে পৰিয়ালৰ সদস্যক ৰাজ্য চৰকাৰে কৰ্মসংস্থান দিব।
বুধবাৰে ৰাজ্যখনৰ তৃণমূল কংগ্ৰেছৰ নেত্ৰী তথা পশ্চিম বংগৰ মুখ্যমন্ত্ৰী মমতা বেনাৰ্জীয়ে এক সংবাদ মেলৰ জৰিয়তে এই কথা ঘোষণা কৰে।
সংবাদ মেলত ৰাজ্যখনৰ মুখ্যমন্ত্ৰী গৰাকীয়ে লগতে কয় যে কোভিড১৯ যুঁজত অৱতীৰ্ণ হোৱা সন্মুখ যোদ্ধাসকলক ৰাজ্য চৰকাৰৰ পৰা সন্মান জনোৱা হ’ব।
প্ৰয়াত কোভিড যোদ্ধাসকলৰ পৰিয়ালক ১০ লাখ টকাৰ এককালীন সাহায্য দিয়াৰো সিদ্ধান্ত লৈছে পশ্চিম বংগৰ ৰাজ্যিক চৰকাৰে।
কোভিড১৯ৰ মৃত সন্মুখ যোদ্ধাসকলৰ পৰিয়ালৰ সদস্যক কি দৰে চৰকাৰী চাকৰি দিয়া হ’ব সেই সন্দৰ্ভত জিলা প্ৰশাসনসমূহৰ লগতে বিভিন্ন দপ্তৰৰ সচিবসকলৰ সৈতে আলোচনা অব্যাহত আছে বুলি জনাইছে মুখ্যমন্ত্ৰী মমতা বেনাৰ্জীয়ে।
বৰ্তমানলৈকে ৰাজ্যখনত ১২ গৰাকী কোভিড যোদ্ধাৰ মৃত্যু ঘটিছে। এই মৃত কোভিড যোদ্ধাসকলৰ পৰিয়ালৰ হাতত ইতিমধ্যে ৰাজ্য চৰকাৰে বেজ মেডেলসহ চাৰ্টিফিকেটো প্ৰদান কৰিছে।
আনকি মৃত কোভিড যোদ্ধাৰ পৰিয়ালক আৰ্থিক সাহায্যও প্ৰদান কৰা হৈছে বুলি জনায় মুখ্যমন্ত্ৰী মমতা বেনাৰ্জীয়ে।
বেচৰকাৰী তথা নাৰ্ছিংহোমৰ চিকিৎসক তথা চিকিৎসাকৰ্মীসলকো সন্মান প্ৰদানৰ কথা চিন্তা কৰা হৈছে বুলি জানিবলৈ দিছে পশ্চিম বংগৰ মুক্যমন্ত্ৰী গৰাকীয়ে।