দেশজুৰি ক্ৰমাৎ বৃদ্ধি পাই আহিছে অঘৰী কুকুৰৰ আক্ৰমণৰ ঘটনা। এনে ঘটনা বন্ধ কৰাৰ বাবে উচ্চতম ন্যায়ালয়ে এক কঠোৰ স্থিতি গ্ৰহণ কৰিছে।
শুকুৰবাৰে উচ্চ ন্যায়ালয়ে নিৰ্দেশ দিয়ে যে বিদ্যালয়, মহাবিদ্যালয়, চিকিৎসালয়, খেলপথাৰ, বাছ টাৰ্মিনাছ, ৰেলৱে ষ্টেচন—এইবোৰ জনবহুল ঠাইৰ পৰা সকলো অঘৰী কুকুৰক আঁতৰাই আশ্ৰয় শিবিৰত ৰাখিব লাগে।
ন্যায়াধীশ বিক্ৰম নাথ, সন্দীপ মেহতা আৰু এন ভি অঞ্জৰিয়াৰ বিচাৰপীঠে কয় যে পথৰ পৰা বন্দী কৰা কুকুৰ বন্ধ্যাকৰণ আৰু টিকাকৰণৰ পিছত পুনৰ পূৰ্বৰ ঠাইত এৰি দিব নোৱাৰিব।
আদালতে মন্তব্য কৰে যে, “কুকুৰবোৰক সেই ঠাইবোৰলৈ ঘূৰাই পঠিয়ালে সমস্যাৰ সমাধান নহয়, বৰঞ্চ ই উদ্দেশ্যৰ পৰিপন্থী হ’ব।”
উচ্চতম ন্যায়ালয়ে সকলো ৰাজ্য আৰু কেন্দ্ৰীয় শাসিত অঞ্চলক নিজৰ অধীনস্থ সকলো চৰকাৰী আৰু বেচৰকাৰী শিক্ষানুষ্ঠান, চিকিৎসালয়, খেলপথাৰ আৰু চৰকাৰী কাৰ্যালয়ৰ তালিকা প্ৰস্তুত কৰিবলৈ নিৰ্দেশ দিছে।
জিলা দণ্ডাধীশ সকলে এই স্থানসমূহত উপযুক্ত দেৱাল থকাটো নিশ্চিত কৰিব লাগিব যাতে বিপথগামী কুকুৰ চৌহদত প্ৰৱেশ কৰিব নোৱাৰে। প্ৰতিখন প্ৰতিষ্ঠানে নিয়মীয়াকৈ পৰিদৰ্শন কৰি ওচৰত যাতে কোনো ধৰণৰ বিপথগামী কুকুৰ নাথাকে তাৰ প্ৰতি চকু ৰাখিব লাগিব। যদি কুকুৰ পোৱা যায়, তেন্তে ধৰি নি আশ্ৰয় শিবিৰলৈ স্থানান্তৰ কৰিব লাগিব।
এই গোচৰৰ পৰৱৰ্তী শুনানি ১৩ জানুৱাৰীত অনুষ্ঠিত হ’ব।
ইয়াৰ পূৰ্বে একেখন বিচাৰপীঠে কেইবাখনো ৰাজ্যৰ নিষ্ক্ৰিয়তাক লৈ অসন্তুষ্টি প্ৰকাশ কৰিছিল। পশ্চিম বংগ আৰু তেলেংগানাৰ বাহিৰে আন ৰাজ্যক কাৰণ দৰ্শাবলৈ নিৰ্দেশ দিয়া হৈছিল। আদালতে লক্ষ্য কৰিছিল, “বিপথগামী কুকুৰৰ আক্ৰমণৰ ভিডিঅ’ আৰু বাতৰিয়ে আন্তঃৰাষ্ট্ৰীয় ক্ষেত্ৰখনত ভাৰতৰ ভাবমূৰ্তি কলংকিত কৰি তুলিছে।”
কেৱল বিপথগামী কুকুৰেই নহয়, ৰাজস্থান উচ্চ ন্যায়ালয়ৰ নিৰ্দেশৰ পিছতে আজি উচ্চতম ন্যায়ালয়ে পথ আৰু ঘাইপথৰ পৰা গৰু আঁতৰোৱাৰ নিৰ্দেশ দিয়ে। ৰাষ্ট্ৰীয় ঘাইপথ প্ৰাধিকৰণ, পথ পৰিবহণ বিভাগ আৰু পৌৰসভাসমূহক যৌথভাৱে অভিযান চলাবলৈ আৰু ঘাইপথৰ পৰা জীৱ-জন্তু আঁতৰাবলৈ নিৰ্দেশ দিয়া হৈছে।
