গুজৰাটৰ পঞ্চমহল জিলাত এক অত্যন্ত দুৰ্ভাগ্যজনক ঘটনা সংঘটিত হৈছে য’ত এজন দ্বাদশ শ্ৰেণীৰ ছাত্ৰই তেওঁৰ শিক্ষয়িত্ৰীক চৰ মৰাৰ অভিযোগ উত্থাপন হৈছে। যোৱা ২৪ জানুৱাৰীত এখন বিদ্যালয়ত পৰীক্ষা চলি থকাৰ সময়তে এই ঘটনাটো ঘটে। পৰীক্ষা নিৰ্ধাৰিত সময়ত আৰম্ভ হৈছিল যদিও এজন ছাত্ৰই পৰীক্ষা গৃহলৈ আহিবলৈ অলপ দেৰি কৰিছিল। সেই সময়ত কোঠাত পহৰা দি থকা শিক্ষয়িত্ৰীগৰাকীয়ে ছাত্ৰজনক দেৰি হোৱাৰ কাৰণ সোধাত ছাত্ৰজনে হঠাৎ উত্তেজিত হৈ শিক্ষকজনক চৰ মাৰে। এই সমগ্ৰ ঘটনাটো বিদ্যালয়খনৰ চিচিটিভি কেমেৰাত বন্দী হৈছে যিটো বৰ্তমান ছচিয়েল মিডিয়াত ভাইৰেল হৈ পৰিছে।
শিক্ষকজনক চৰ মৰাৰ পিছতো ঘটনাটো ইমানতে থমকি ৰোৱা নাছিল। অভিযোগ অনুসৰি ছাত্ৰজনে নিজৰ ভুল স্বীকাৰ কৰি ক্ষমা বিচৰাৰ পৰিৱৰ্তে শিক্ষয়িত্ৰীগৰাকীক ওলোটাই ভাবুকিহে প্ৰদান কৰিছিল। ইয়াৰ কেইদিনমানৰ পিছত ছাত্ৰজনৰ পিতৃ আৰু আন কেইজনমান লোক বিদ্যালয়লৈ আহিছিল আৰু অভিযোগ উঠিছে যে তেওঁলোকে বিদ্যালয়ৰ ভিতৰতে শিক্ষয়িত্ৰীগৰাকীক ককৰ্থনা কৰিছিল। অৱশ্যে ছাত্ৰজনৰ পৰিয়ালে এই অভিযোগ অস্বীকাৰ কৰিছে। তেওঁলোকে দাবী কৰিছে যে তেওঁলোকে শিক্ষয়িত্ৰীগৰাকীক ধমক দিবলৈ নহয় বৰঞ্চ ক্ষমা খুজিবলৈহে বিদ্যালয়লৈ গৈছিল।
এই ঘটনা সন্দৰ্ভত পৰৱৰ্তী সময়ত থানাত এখন এজাহাৰ দাখিল কৰা হয়। আৰক্ষীয়ে শিক্ষয়িত্ৰীগৰাকীক আক্ৰমণ কৰাৰ অভিযোগত ১৮ বছৰীয়া ছাত্ৰজনক গ্ৰেপ্তাৰ কৰে। যদিও পিছলৈ ছাত্ৰজনে জামিন লাভ কৰিবলৈ সক্ষম হয় তথাপিও এজন ছাত্ৰৰ এনে আচৰণক লৈ বিভিন্ন মহলত তীব্ৰ প্ৰতিক্ৰিয়াৰ সৃষ্টি হৈছে। এজন শিক্ষয়িত্ৰীগৰাকীক কৰ্তব্যৰত অৱস্থাত এনেদৰে অপদস্থ কৰা কাৰ্যক সচেতন ৰাইজে নিন্দা কৰিছে। প্ৰধানমন্ত্ৰীৰ গৃহ ৰাজ্যত সংঘটিত এই ঘটনাই শিক্ষাৰ্থীৰ মাজত নৈতিকতাৰ অৱক্ষয়ক লৈ বহু প্ৰশ্নৰ অৱতাৰণা কৰিছে। বৰ্তমান আৰক্ষীয়ে সমগ্ৰ বিষয়টোৰ তদন্ত চলাই আছে।
