পুলিচৰ চকুত ধুলি দিয়াত সিদ্ধহস্ত এটা দুধৰ্ষ সন্ত্ৰাসবাদী। এটা স্থানৰ পৰা আন এটা স্থানলৈ অতি কম সময়ৰ ভিতৰতে আত্মগোপন কৰিব পাৰে বাবেই সন্ত্ৰাসবাদীৰ মহলত তাৰ নাম হৈছিল ‘খৰগোশ’ (Rabbit)। লস্কৰ-ই-তৈবাৰ সেই কুখ্যাত পাকিস্তানী সন্ত্ৰাসবাদী উমৰ হেৰিছ ওৰফে খৰগোশে এইবাৰ ভাৰতীয় পৰিচয় ধাৰণ কৰি দেশ এৰি পলাই যোৱা বুলি জানিব পৰা গৈছে।
চোৰাংচোৱা সূত্ৰৰ খবৰ অনুসৰি, বৰ্তমান উমৰে চৌদি আৰবত আত্মগোপন কৰি আছে। শ্ৰীনগৰ আৰক্ষীৰ তদন্তত এক বিস্ফোৰক তথ্য পোহৰলৈ আহিছে যে ২০১২ চনত উপত্যকাত অনুপ্ৰৱেশ কৰা এই সন্ত্ৰাসবাদীজনে নিজকে ৰাজস্থানৰ বাসিন্দা ‘সজ্জাদ’ বুলি পৰিচয় দিছিল।
কেৱল সেয়াই নহয়, ৰাজস্থানৰ জয়পুৰত এজন লস্কৰ এজেণ্টৰ কন্যাক বিয়াও কৰাইছিল আৰু সেই বিবাহৰ নথিপত্ৰ ব্যৱহাৰ কৰিয়েই ৰাজস্থানৰ পৰা ভাৰতীয় পাছপোৰ্ট যোগাৰ কৰিছিল।
আৰক্ষীৰ কঠোৰ নিৰীক্ষণৰ পাছতো এজন পাকিস্তানী সন্ত্ৰাসবাদীয়ে কেনেকৈ ভাৰতীয় পাছপোৰ্ট লাভ কৰিলে, তাক লৈ এতিয়া ডাঙৰ প্ৰশ্ন উত্থাপন হৈছে। পাকিস্তানৰ খাইবাৰ পাখতুনখোয়াৰ বাসিন্দা উমৰ হেৰিছে কৰাচীত কেইবাটাও অগ্নিসংযোগৰ গোচৰৰ পৰা বাচিবলৈ লস্কৰত যোগ দিছিল। শ্ৰীনগৰ আৰু বান্ডিপোৰাৰ বিভিন্ন ঘাটিত দীৰ্ঘদিন থাকি সি এটা নেটৱৰ্ক গঢ়ি তুলিছিল আৰু ভাৰতৰ পৰা প্ৰথমে ইণ্ডোনেছিয়া আৰু তাৰ পিছত আন এক জাল নথিৰ সহায়ত চৌদি আৰবত উপস্থিত হোৱা বুলি অনুমান কৰা হৈছে।
অলপতে শ্ৰীনগৰ আৰক্ষীয়ে এটা বৃহৎ আন্তঃৰাজ্যিক লস্কৰ মডিউল ধ্বংস কৰিছে আৰু তাতেই ধৃত সন্ত্ৰাসবাদী আব্দুল্লাহ আৰু উসমানক জেৰা কৰি ‘খৰগোশ’ৰ এই ৰাজস্থান সংযোগৰ কথা পোহৰলৈ আহে। আনকি যোৱা নৱেম্বৰত ধৰা পৰা ‘আল ফালাহ মডিউল’ৰ সৈতেও ইয়াৰ সম্পৰ্ক থকাৰ সন্দেহ কৰা হৈছে, য’ত চিকিৎসকৰ দৰে উচ্চশিক্ষিত পেছাদাৰীসকলক সন্ত্ৰাসবাদী কাৰ্যকলাপত ব্যৱহাৰ কৰা হৈছিল।
বৰ্তমান উমৰ হেৰিছ ওৰফে খৰগোশৰ বিৰুদ্ধে আন্তঃৰাষ্ট্ৰীয় পৰ্যায়ত কূটনৈতিক তৎপৰতা আৰম্ভ কৰিছে ভাৰত চৰকাৰে আৰু অতি সোনকালে এই গোচৰৰ তদন্তৰ দায়িত্ব এনআইএ-য়ে ল’ব পাৰে বুলি ধাৰণা কৰা হৈছে। লগতে পাছপোৰ্ট ভেৰিফিকেচনৰ সময়ত ৰাজস্থান আৰক্ষীৰ ক’ত ত্ৰুটি ৰৈ গৈছিল, সেই বিষয়টোও এতিয়া তদন্তৰ আওতালৈ অনা হৈছে।
