২৯ বছৰীয়া চৌদি আৰবৰ এজন ৰাজকুমাৰৰ লণ্ডনৰ এখন বিলাসী হোটেলত মৃত্যু হৈছে। অত্যাধিক পৰিমাণৰ সুৰা, পাৰ্টী ড্ৰাগছ আৰু চিকিৎসকে খাবলৈ দিয়া ঔষধ একেলগে সেৱন কৰাৰ ফলতেই তেওঁৰ মৃত্যু হোৱা বুলি জানিব পৰা গৈছে। ৰাজকুমাৰজনৰ নাম আছিল আব্দুল্লাহ বিন ফাহাদ বিন আব্দুল্লাহ বিন আব্দুলআজিজ বিন জলাৱি আল চৌদ। যোৱা ২৫ নৱেম্বৰত লণ্ডনৰ কেনচিংটনৰ মেৰিয়ট নামৰ বিলাসী হোটেলখনৰ নিজৰ কোঠাত তেওঁক মৃত অৱস্থাত উদ্ধাৰ কৰা হৈছিল।
আদালতত উপস্থাপন কৰা তথ্য অনুসৰি, ৰাজকুমাৰ আব্দুল্লাহ যোৱা ১৯ নৱেম্বৰত প্ৰতি নিশাত প্ৰায় ৬০,০০০ টকা (৬০০ ইউৰো) ভাড়াত এই বিলাসী হোটেলখনত এসপ্তাহৰ বাবে থাকিবলৈ আহিছিল। মৃত্যুৰ আগদিনা সন্ধিয়া তেওঁক চিচিটিভি কেমেৰাত শেষবাৰৰ বাবে চিগাৰেট খাবলৈ বাহিৰলৈ ওলাই অহা দেখা গৈছিল। পিছদিনা হোটেলৰ চাফাই কৰ্মী এজনে তেওঁৰ কোঠাত সোমাই বাথৰুমৰ মজিয়াত তেওঁক কাপোৰ পিন্ধি থকা অৱস্থাতেই বাগৰি পৰি থকা দেখা পায়। লগে লগে জৰুৰীকালীন সেৱাক খবৰ দিয়া হৈছিল যদিও স্বাস্থ্যকৰ্মীৰ দলে তেওঁক বচাব নোৱাৰিলে আৰু থিতাতে তেওঁৰ মৃত্যু হোৱা বুলি ঘোষণা কৰা হয়।
মৃত্যুৰ পিছত কৰা পৰীক্ষাত পোহৰলৈ আহে যে ৰাজকুমাৰজনৰ তেজত অত্যাধিক পৰিমাণৰ সুৰা আছিল, যিটো ব্ৰিটেইনৰ আইনী মাত্ৰাতকৈ প্ৰায় তিনিগুণ বেছি। বিশেষজ্ঞসকলৰ মতে, কেৱল এই সুৰাৰ মাত্ৰাই এজন মানুহক ক‘মালৈ লৈ যাবলৈ যথেষ্ট। ইয়াৰ লগতে তেওঁৰ শৰীৰত জিএইচবি নামৰ এবিধ ভয়ংকৰ পাৰ্টী ড্ৰাগছ, ভাঙৰ অংশ আৰু মানসিক চাপ কমাবলৈ ব্যৱহাৰ কৰা কেইবাবিধো ঔষধৰ প্ৰমাণ পোৱা গৈছে। বিশেষজ্ঞসকলে স্পষ্ট কৰি দিছে যে এই সকলোবোৰ বস্তু একেলগে সেৱন কৰাৰ ফলতেই তেওঁৰ হৃদযন্ত্ৰৰ ক্ৰিয়া বন্ধ হৈ পৰে আৰু তেওঁৰ মৃত্যু হয়।
আদালতত এই কথাও প্ৰকাশ পায় যে ৰাজকুমাৰগৰাকীয়ে আগৰে পৰাই সুৰা আৰু ঔষধৰ নিচাত আক্ৰান্ত আছিল। ইয়াৰ পৰা পৰিত্ৰাণ পাবলৈ তেওঁ যোৱা আগষ্ট মাহত এখন চিকিৎসালয়ত ভৰ্তি হৈ চিকিৎসাও গ্ৰহণ কৰিছিল আৰু সুস্থ হোৱাৰ দিশলৈ আগবাঢ়িছিল। অৱশ্যে, আৰক্ষী আৰু আদালতে তেওঁৰ মৃত্যুৰ আঁৰত কোনো আত্মহত্যাৰ সন্দেহ কৰা নাই। তেওঁৰ কোঠাত কোনো ছুইচাইড নোট পোৱা হোৱা নাই আৰু চিচিটিভি ফুটেজতো তেওঁ অকলশৰীয়া আছিল বুলি প্ৰমাণিত হৈছে। সেয়েহে আদালতৰ তৰফৰ পৰা ইয়াক এক দুৰ্ঘটনাজনিত মৃত্যু বুলি অভিহিত কৰা হৈছে। চৌদি আৰবৰ ৰাজকীয় দৰবাৰেও তেওঁৰ মৃত্যুৰ খবৰ নিশ্চিত কৰিছে আৰু ৰিয়াদৰ এখন মছজিদত তেওঁৰ জানাজা সম্পন্ন কৰা হ‘ব বুলি জানিবলৈ দিছে।
