মূৰত ২১৪ লাখ কোটি টকাৰ ঋণৰ বোজা লৈ আজি সংসদত গৃহীত হ’ব কেন্দ্ৰীয় বাজেট। ১ এপ্ৰিলৰ পৰা ব্যয়ৰ হিচাপ আৰম্ভ হ’ব। আগন্তুক বিত্তীয় বৰ্ষত মোডী চৰকাৰে প্ৰায় ৫৩.৫ লাখ কোটি টকা ব্যয় কৰাৰ লক্ষ্য লৈয়েই আজি সংসদত চূড়ান্ত অনুমোদন হ’ব।
ইয়াৰে ৩৮২ কোটি ২২ লাখ টকা অসমকে ধৰি চাৰিখন ৰাজ্য আৰু কেন্দ্ৰীয় শাসিত অঞ্চল পুডুচেৰীৰ নিৰ্বাচন আৰু অন্যান্য খৰচৰ বাবে ভাৰতৰ নিৰ্বাচন আয়োগক দিয়া হৈছে। এনে চমু আলোচনাৰ অন্তত কিছু সংশোধনীৰে বাজেট গৃহীত হ’ব।
চৰকাৰে যেনেকৈ ‘বিত্ত বিধেয়ক ২০২৬’ত সংশোধনী আনিব, একেদৰে এন কে প্ৰেমচন্দ্ৰনৰ দৰে বিৰোধীসকলেও সংশোধনী দাখিল কৰিছে। অৱশ্যে বিৰোধীৰ সংশোধনী মানি লোৱা নহ’ব।
জানিব পৰা মতে চৰকাৰে নিজাববীয়াকৈ বাজেট গৃহীত কৰিব। সংসদত বাজেট দাখিল কৰাৰ ৫০ দিনৰ পাছত আজি লোকসভাত ২০২৬-২৭ বিত্তীয় বৰ্ষৰ বাজেট গৃহীত হ’ব। কেন্দ্ৰীয় বিত্তমন্ত্ৰী নিৰ্মলা সীতাৰমণে ১ ফেব্ৰুৱাৰীত সংসদত বাজেট দাখিল কৰিছিল।
যদিও মোডী চৰকাৰে অহা এবছৰত ৫৩,৪৭,৩১৫ কোটি টকা খৰচ হ’ব বুলি সংসদৰ অনুমোদন সাপেক্ষে বাজেটখন গৃহীত কৰিলেও ২০২৭ চনৰ শেষৰ ফালে পুনৰ যে অতিৰিক্ত ধন নিবিচাৰিব তাৰ কোনো নিশ্চয়তা নাই বুলিয়েই মত প্ৰকাশ কৰিছে অৱগত সূত্ৰই। কিয়নো এইবাৰে মাৰ্চ মাহত শেষৰ ২০ দিনত প্ৰায় দুই লাখ কোটি টকা বাজেটৰ বহিৰ্ভূত ধন খৰচ কৰাৰ বাবে চৰকাৰে সংসদৰ অনুমোদন লৈছে।
অহা বছৰো একেই হ’ব। কাৰণ, ইৰাণ-ইজৰাইল যুদ্ধ পৰিস্থিতিয়ে ভাৰতত পৰোক্ষ প্ৰভাৱ পেলাইছে। টকাৰ মূল্য কমি আহিছে। আমেৰিকান ডলাৰৰ মূল্য বৃদ্ধি পাইছে। তাৰ লগতে চৰকাৰৰ ঋণৰ বোজাও বাঢ়িছে। যিটো পৰিচালনা কৰাটো ক্ৰমান্বয়ে কঠিন হৈ পৰিছে।
চৰকাৰী তথ্য অনুসৰি আগন্তুক বিত্তীয় বৰ্ষত চৰকাৰৰ আনুমানিক ৰাজহ আয় হ’ব ৩৬,৫১,৫৪৭ কোটি টকা। ২০২৭ চনৰ ৩১ মাৰ্চৰ ভিতৰত চৰকাৰৰ মুঠ ঘৰুৱা আৰু বিদেশী ঋণ আৰু দায়বদ্ধতা ২১৪,৮২,০৫০ কোটি টকা হ’ব।
গতিকে প্ৰধানমন্ত্ৰী নৰেন্দ্ৰ মোডী আৰু তেওঁৰ কেবিনেট সদস্যসকলে ভাৰত অতি সোনকালে তৃতীয় বৃহত্তম অৰ্থনীতি হ’ব বুলি যিমানেই ফুটনি নামাৰক কিয়, বিষয়টো ‘ঋণং কৃত্বা ঘৃতাং পিবেত!’ৰ বিষয় হৈ পৰিছে। অৰ্থাৎ ধাৰ লৈ ঘিউ খোৱাৰ দৰে। ফলত আগন্তুক দিনত চৰকাৰে ৰাজহ বৃদ্ধিৰ বাবে যে ৰাইজৰ ওপৰতে চাপ বৃদ্ধি কৰিব, সেয়া কোৱা বাহুল্য।
