কা আন্দোলনৰ স্থবিৰতাক লৈ অসন্তুষ্টি ব্যক্ত কৰিছে কা আন্দোলনৰ শ্বহীদ টীয়কৰ বনাই ৰবি গাঁৱৰ ৰাজেন বৰুৱাৰ পত্নী জুনুমনি বৰুৱাই। শনিবাৰে শ্বহীদ গৰাকীৰ দ্বিতীয় মৃত্যু বাৰ্ষিকীত এই ক্ষোভ প্ৰকাশ কৰে শ্বহীদ পত্নীয়ে।
কা আন্দোলনৰ নেতৃত্ব বহন কৰা সকলৰ আহ্বানৰ প্ৰতি সঁহাৰি জনাই অনান্য সকলৰ লগতে আন্দোলনৰ বাবে ৰাজপপথলৈ ওলাই আহিছিল ৰাজেন বৰুৱাও।
কিন্তু প্ৰতিবাদী সমদল কাৰ্যসূচীত অংশগ্ৰহণ কৰি থকা অৱস্থাত আন্দোলনস্থলীতে কৰুণ মৃত্যুক সাবতি লৈছিল ৰাজেন বৰুৱাই। লগে লগে যোৰহাট জিলা ছাত্র সন্থাই ঘোষণা কৰিছিল বৰুৱাক কা আন্দোলনৰ প্ৰথম গৰাকী শ্বহীদ।
উক্ত দিনাই কা আন্দোলনৰ ব্যাপকতাত আতংকিত হৈ অসম চৰকাৰে ইন্টাৰনেট সেৱা বন্ধ কৰি দিয়াত ৰাজেন বৰুৱাৰ মৃত্যুৰ বিষয়ে বহুল প্ৰচাৰ নোহোৱাত কা আন্দোলনৰ শ্বহীদৰ সংখ্যাকলৈ ভিন্ন মত পোষণ কৰা পৰিলক্ষিত হৈছে।
কিন্তু ছয় গৰাকী শ্বহীদৰ ভিতৰত ৰাজেন বৰুৱা কা আন্দোলনৰ প্ৰথম গৰাকী শ্বহীদ বুলি ছাত্র সন্থাই দাবী কৰি শ্বহীদ পৰিয়ালটোৰ প্ৰতি চৰকাৰে সাহায্য আগবঢ়োৱাৰ দাবী জনায়।
ৰাজেন বৰুৱাৰ মৃত্যুৰ পাছত এতিয়া পৰিয়ালটোৰ পানীত হাঁহ নচৰা অৱস্থা হৈছে।
ইপিনে, শনিবাৰে শ্বহীদ ৰাজেন বৰুৱাৰ বাসগৃহ প্ৰাংগণত শিমলুগুৰি মৌজা আঞ্চলিক ছাত্র সন্থাৰ উদ্যোগত আয়োজন কৰা হয় শ্ৰদ্ধাঞ্জলি অনুষ্ঠানৰ।
শ্ৰদ্ধাঞ্জলি অনুষ্ঠানত অঞ্চলটোৰ কেইবাগৰাকী বয়োজেষ্ঠ ব্যক্তি উপস্থিত থকাৰ উপৰি আছুৰ কেন্দ্ৰীয় কাৰ্যনিৰ্বাহক সদস্য জিতু নেওগ, যোৰহাট মহকুমা ছাত্ৰ সন্থাৰ সম্পাদক যদুমনি বৰুৱা, কৰ্মচাৰী পৰিষদৰ নেতা কিশোৰ দাস, জ্ঞানপীঠ একাডেমীৰ সচিব সৌৰভ বৰা, ৰেঙনিৰ সঞ্চালক বিজু শৰ্মাকে ধৰি বহু কেইগৰাকী ব্যক্তি উপস্থিত থাকে।
