‘জাতি জনগণনা’ সন্দৰ্ভত অসম চৰকাৰক গুৰুত্বপূৰ্ণ ভূমিকা গ্ৰহণ কৰিবৰ বাবে আজি আহ্বান জনাইছে অসম প্ৰদেশ কংগ্ৰেছৰ সভাপতি গৌৰৱ গগৈয়ে।
জাতি জনগণনা প্ৰক্ৰিয়াৰ জৰিয়তে অসমৰ বিভিন্ন জনগোষ্ঠীৰ লোকসকল উপকৃত হ’ব আৰু সা-সুবিধা লাভ কৰিব বুলি উল্লেখ কৰি সভাপতি গৌৰৱ গগৈয়ে কয় যে লোকসভাৰ বিৰোধী দলৰ নেতা ৰাহুল গান্ধী ডাঙৰীয়াই জাতি জনগণনা প্ৰক্ৰিয়া আৰম্ভ কৰিবৰ বাবে দীৰ্ঘদিন ধৰি হেঁচা প্ৰয়োগ কৰা বাবে কেন্দ্ৰীয় চৰকাৰে এতিয়া জাতি জনগণনাৰ বাবে কাৰ্যকৰী ব্যৱস্থা গ্ৰহণ কৰিবলৈ বাধ্য হৈছে।
অসম চৰকাৰক জাতি জনগণনা প্ৰক্ৰিয়াক ব্যৱহাৰিক অৰ্থত কৰিবলৈ আহ্বান জনাই সভাপতিগৰাকীয়ে কয় যে জাতি জনগণনা প্ৰক্ৰিয়া আমোলাতান্ত্ৰিক ব্যৱস্থাৰ মাজতেই সীমাৱদ্ধ থাকিব নালাগে। অসমৰ বিভিন্ন জনগোষ্ঠীৰ লগতে সংখ্যালঘু সম্প্ৰদায় বিশেষকৈ গৰীয়া, মৰিয়া, দেশী আদি জাতিৰ লোকপিয়ল হোৱাতো আমি বিচাৰিছো আৰু কংগ্ৰেছ দলে আমাৰ তৃণমূল পৰ্যায়ৰ কৰ্মীসকলৰ মাজলৈ গৈ প্ৰকৃতাৰ্থত যাতে জাতিজনগণনা হয় তাৰ বাবে কাম কৰিব।
গগৈয়ে লগতে কয় যে অসম প্ৰদেশ কংগ্ৰেছৰ জাতি-জনগোষ্ঠীৰ মাজত যিসমূহ শাখা সমিতি আছে সেই সমিতিসমূহৰ ক্ষেত্ৰভিত্তিক প্ৰতিবেদনৰ ভিত্তিত কংগ্ৰেছ দলে এক নীতি-নিৰ্দেশনা প্ৰস্তুত কৰাৰ বাবেও চিন্তা-চৰ্চা কৰিছো। সংবাদমেলৰ পূৰ্বে সভাপতি গৌৰৱ গগৈয়ে আজি কংগ্ৰেছৰ কেবাটাও ভগ্নী-ভাতৃ আৰু শাখা সংগঠনৰ লগত আলোচনাত মিলিত হয়। শাখা সংগঠনসমূহৰ অধ্যক্ষৰ লগতে বিষয়ববীয়া আৰু কৰ্মীৰ লগত দিনযোৰা কাৰ্যসূচীৰে সভাপতিগৰাকীয়ে পৰ্যালোচনা কৰে। পুৱা ১০ বজাত অন্যান্য পিছপৰা শ্ৰেণী বিভাগৰ বিষয়ববীয়া, ১১.৩০ বজাত সাহায্য আৰু পুনৰ সংস্থাপন বিভাগৰ বিষয়ববীয়া, ১২.৩০ বজাত অনুসূচিত জাতি বিভাগৰ বিষয়ববীয়া আৰু কৰ্মীসকলৰ সৈতে আলোচনাত মিলিত হয়।
বিয়লিৰ ভাগত সভাপতি গৌৰৱ গগৈয়ে ভাষিক সংখ্যালঘু, গোৰ্খা শাখা আৰু একাংশ আদিবাসী নেতৃত্বৰে আলোচনাত মিলিত হয়। বুধবাৰে পুৱা ১০ বজাৰ পৰা ইতিমধ্যে নিযুক্তি প্ৰদান কৰা পৰ্যবেক্ষকসকলৰ লগত দীঘলীয়া আলোচনাত মিলিত হ’ব সভাপতি গৌৰৱ গগৈ। উল্লেখ্য যে, ৮৮ গৰাকী পৰ্যবেক্ষকক ইতিমধ্যে বিভিন্ন জিলাৰ দায়িত্ব অৰ্পণ কৰা হৈছে।
