সোমবাৰে পুৱতি দিনা বঙাইগাঁৱৰ বৰপাৰাৰ দুটা ষ্টেট বেংক অৱ ইণ্ডিয়াৰ এটিএমৰ পৰা অচিনাক্ত ব্যক্তিৰ এটা দলে ৪০ লাখতকৈও অধিক টকা লুট কৰি নিয়ে।
আৰক্ষীৰ তথ্য অনুসৰি পাঁচ-ছয়জন মানুহৰ এটা গোটে এই চুৰিকাণ্ড সংঘটিত কৰিছে।
আৰক্ষীয়ে লগতে কয় যে চুৰি কৰাৰ পূৰ্বে চোৰ কেইটাই চিচিটিভি কেব’লৰ সংযোগ বিচ্ছিন্ন কৰিছিল।
হায়দৰাবাদৰ এটা নিৰীক্ষণ দলে আৰক্ষীক এটিএম টেম্পাৰিংৰ বিষয়ে অৱগত কৰিছিল বুলি আৰক্ষীয়ে লগতে সদৰী কৰে।
আৰক্ষী ঘটনাস্থলীত উপস্থিত হোৱাৰ পূৰ্বেই চোৰকেইটাই এটিএম ভাঙি টকাসহ সেই ঠাইৰ পৰা উধাও হয়।
আৰক্ষীৰ সূত্ৰ অনুসৰি, এটিএম কেইটাত ৪০ লাখতকৈও অধিক টকা আছিল। গেছ-কাটাৰ ব্যৱহাৰ কৰি চোৰকেইটাই এটিএম মেচিনৰ পৰা টকাখিনি উলিয়াই নিয়ে বুলি আৰক্ষীয়ে জানিবলৈ দিয়ে।
আনহাতে চুৰি কাৰ্য কাৰ্যকৰী কৰাৰ সময়ত এটিএমৰ শ্বাটাৰ বন্ধ কৰি দিয়াৰ বাবে টহলদাৰী আৰক্ষী দলে চুৰিকাৰ্যৰ ভূ নাপালে বুলি আৰক্ষী বিষয়া সকলে উল্লেখ কৰে।
ইতিমধ্যে আৰক্ষীয়ে ঘটনা সন্দৰ্ভত তদন্ত আৰম্ভ কৰিছে।
