ভাৰতীয় দলৰ বাওহতীয়া স্পীনাৰ প্ৰজ্ঞান ওঝাই আজি সকলো ধৰণৰ ৰাষ্ট্ৰীয় তথা আন্তঃৰাষ্ট্ৰীয় ক্ৰিকেটৰ পৰা সন্যাস ঘোষণা কৰে।
৩৩ বছৰীয়া ক্ৰিকেটাৰ গৰাকীয়ে টুইটাৰত নিজৰ অৱসৰৰ কথা উল্লেখ কৰি ইয়াৰ কাৰণ উল্লেখ কৰে।
‘‘এয়া মোৰ জীৱনৰ পৰৱৰ্তী অধ্যায়লৈ আগবাঢ়ি যোৱাৰ সময়। সকলোৰে মৰম আৰু সমৰ্থন সদায় মোৰ লগত থাকিব আৰু ইয়ে মোক অনুপ্ৰাণিত কৰি যাব,’’ ওঝাই টুইটাৰত লিখে।
‘‘ভাৰতীয় জাতীয় দলৰ হৈ ক্ৰিকেট খেলা মোৰ স্বপ্ন আছিল। মই শব্দৰে প্ৰকাশ কৰিব নোৱাৰো মই কিমান সৌভাগ্যৱান যে মোৰ সপোন পুৰণ হ’ল,’’ স্পীনাৰ গৰাকীয়ে লগতে টুইটাৰত লিখে।
ভাৰতীয় জাতীয় দলৰ হৈ প্ৰজ্ঞান ওঝাই মুঠ ২৪ খন টেষ্টত অংশ লৈ ১১৩ টা উইকেট দখল কৰে আৰু ১৮ খন এদিনীয়া আন্তঃৰাষ্ট্ৰীয়ত ২১ টা উইকেট দখল কৰে।
ওঝাই ছয়খন টি-২০ খেলতো দেশৰ হৈ খেলি ১০ উইকেট লাভ কৰে।
প্ৰজ্ঞান ওঝাই কেৰিয়াৰৰ অন্তিমখন টেষ্ট ম্যেচ ২০১৩ চনত মুম্বাইত খেলিছিল। সেই খেলখন শচীন টেণ্ডুলকাৰৰ কেৰিয়াৰৰ অন্তিমখন খেল আছিল।
উক্ত খেলখনত ওঝাই ১০ টা উইকেটেৰে ভাৰতৰ বিজয়ত গুৰুত্বপূৰ্ণ ভূমিকা পালন কৰাৰ লগতে মেন অব দ্যা ম্যেচৰ সন্মানো লাভ কৰি শচীন টেণ্ডুলকাৰৰ বিদায় ক্ষণক স্মৰণীয় কৰি তোলাত অৰিহণা আগবঢ়াইছিল।
