৩ নবেম্বৰৰ পৰা বাংলাদেশৰ বিৰুদ্ধে হ’ব লগীয়া টি-২০ শৃংখলাৰ বাবে নিৰ্বাচকে প্ৰথমবাৰৰ বাবে মুম্বাইৰ বিস্ফোৰক অলৰাউণ্ডাৰ শিবম ডুবেক ভাৰতীয় দলত স্থান দিছে।
মুম্বাইৰ ২৬ বছৰীয়া শিৱমক আঘাতপ্ৰাপ্ত হাৰ্দিক পণ্ডিয়াৰ ঠাইত দলত অন্তৰ্ভুক্ত কৰা হৈছে।
উল্লেখ্য যে বাঁওহতীয়া বেটছমেন শিৱমে ইতিমধ্যে ঘৰুৱা প্ৰতিযোগিতা সমূহত বিস্ফোৰক বেটিঙেৰে নিজৰ দক্ষতা প্ৰমাণ কৰি থৈছে। তেওঁ বিশাল ছিক্সাৰ মৰাৰ ক্ষেত্ৰতো সিদ্ধহস্ত।
যোৱা বছৰ ৰঞ্জি ট্ৰফীত বৰোডাৰ বিৰুদ্ধে খেলা মেচত শিৱমে স্পিনাৰ স্বপ্নিল সিঙৰ অ’ভাৰত একেৰাহে পাঁচটা ছয় কোবাইছিল। মাত্ৰ এটা ছয়ৰ বাবে ফাৰ্ষ্ট ক্লাছ ক্ৰিকেটত এক অভাৰত ছয়টা ছয় কোবোৱা ৰবি শাস্ত্ৰীৰ ৰেকৰ্ডৰ সৈতে সমভাগী হোৱাৰ পৰা বঞ্চিত হৈছিল শিৱম।
ইফালে একাংশ ক্ৰিকেট বিশেষজ্ঞই শিৱম ডুবেক আন্তঃৰাষ্ট্ৰীয় ক্ৰিকেটৰ অন্যতম বাঁওহতীয়া বিস্ফোৰক বেটছমেন যুৱৰাজ সিঙৰ সৈতে তুলনা কৰিব বিচাৰে। যিদৰে যুৱৰাজে অকলেই এখন মেচৰ গতিপথ সলনি কৰিছিল ঠিক সেইদৰে শিৱমো সক্ষম বুলি বহুতে অভিহিত কৰে।
উল্লেখ্য যে যোৱা বৰ্ষৰ বিজয় হাজাৰে ট্ৰফীত উল্লেখণীয় প্ৰদৰ্শন আগবঢ়াইছিল শিৱমে। প্ৰতিযোগিতাখনত শিৱমে এটা বিস্ফোৰক শতক অৰ্জন কৰাৰ লগতে সৰু সৰু কেইবাটাও গুৰুত্বপূৰ্ণ ইনিংছেৰে দলৰ জয়ত অৰিহনা আগবঢ়াইছিল।
শেহতীয়াকৈ ৱেষ্ট ইণ্ডিজ এ আৰু দক্ষিণ আফ্ৰিকা এৰ বিৰুদ্ধে উন্নতমানৰ প্ৰদৰ্শন আগবঢ়োৱাৰ বাবেই শিৱম ডুবেক ভাৰতীয় দলত অন্তৰ্ভুক্ত কৰা হৈছে। তদুপৰি চলিত বিজয় হাজাৰেত কৰ্ণাটকৰ বিৰুদ্ধে মাত্ৰ ৬৭টা বলত ১১৮ ৰানৰ এটা বিস্ফোৰক ইনিংছ খেলিছিল।
বেটিঙৰ উপৰি প্ৰতিযোগিতাখনত বলেৰেও উন্নত প্ৰদৰ্শন আগবঢ়াই পাঁচটা উইকেট দখল কৰিছে। ধাৰাবাহিকভাৱে উন্নত প্ৰদৰ্শন আগবঢ়াই অহাৰ ফলশ্ৰুতিতে তেওঁ ভাৰতীয় দলত স্থান লাভ কৰে।
বাঁওহতীয়া বেটছমেন তথা সোহতীয়া মিডিয়াম পেছ বলাৰ শিৱম ডুবেই এই পৰ্যন্ত ১৬খন ফাৰ্ষ্ট ক্লাছ মেচত অংশ লৈ ১০১২ ৰান সংগ্ৰহ কৰিছে।
২৫টা ইনিংছত বেটিং কৰা ডুবেৰ নামত আছে ২টা শতক আৰু ৭টা অৰ্ধশতক। আনহাতে উইকেট অৰ্জন কৰিছে ৪০টা।
আই পি এলত ভাৰতীয় দলৰ অধিনায়ক বিৰাট কোহলী নেতৃত্বাধীন ৰয়েল চেলেঞ্জাৰ বেংগালোৰৰ হৈ খেলা শিৱমৰ টি-২০ ষ্ট্ৰাইক ৰেট হৈছে ১৪২।