একপিনে ‘অমৃত বৃক্ষ আন্দোলন’ বা ‘এক পেড় মা কে নাম’ৰ দৰে শ্ল’গানেৰে পৰিৱেশ সুৰক্ষাৰ জয়গান আৰু আনপিনে উন্নয়নৰ নামত বন্যপ্ৰাণী অভয়াৰণ্য ধ্বংসৰ প্ৰস্তুতি— বৰ্তমান চৰকাৰৰ এই দুই বিপৰীতমুখী স্থিতিয়ে গুৱাহাটীৰ সচেতন মহলক চিন্তিত কৰি তুলিছে।
গুৱাহাটীৰ সমীপৱৰ্তী আমচাং বন্যপ্ৰাণী অভয়াৰণ্যৰ বুকু ভেদি নিৰ্মাণ কৰিবলৈ লোৱা ‘গুৱাহাটী ৰিং ৰোড’ৰ বাবে এতিয়া অভয়াৰণ্যখনৰ বহু মূল্যবান গছ-গছনি কাটি তহিলং কৰাৰ যো-জা চলাইছে বন বিভাগে।
ইতিমধ্যে গুৱাহাটী বন্যপ্ৰাণী সংমণ্ডলে এই সন্দৰ্ভত ৬৫.১৫ লাখ টকাৰ এক নিবিদা প্ৰকাশ কৰিছে আৰু অহা ৯০ দিনৰ ভিতৰত গছ কটাৰ কাম সম্পূৰ্ণ কৰাৰ লক্ষ্য বান্ধি দিছে।
তথ্য অনুসৰি, এই প্ৰস্তাৱিত ৰিং ৰোডৰ বাবে আমচাং অভয়াৰণ্যৰ প্ৰায় ৭.১২ হেক্টৰ ভূমি ব্যৱহাৰ কৰা হ’ব, যিটো পৰিৱেশতন্ত্ৰৰ বাবে এক ডাঙৰ ভাবুকি হিচাপে বিবেচিত হৈছে। যোৱা কিছুদিন ধৰি আমচাঙত হোৱা বেদখলক লৈ প্ৰশাসনে কঠোৰ স্থিতি গ্ৰহণ কৰি শ শ থলুৱা লোকক উচ্ছেদ কৰিছিল।
যি সময়ত বনভূমি ৰক্ষাৰ দোহাই দি সাধাৰণ লোকৰ ঘৰত এক্সকেভেটৰ চলোৱা হৈছিল, সেই একেখন আমচাঙতে এতিয়া চৰকাৰী উদ্যোগত গছ কটাৰ সিদ্ধান্তই চৰকাৰৰ দ্বৈত নীতিকে প্ৰতিফলিত কৰিছে। বিশেষকৈ ২০১৩ চনৰ পৰাই আমচাঙৰ বেদখল সম্পৰ্কীয় এটা গোচৰ গুৱাহাটী উচ্চ ন্যায়ালয়ত বিচাৰাধীন হৈ থকাৰ পাছতো চৰকাৰে কেনেকৈ এনেদৰে অভয়াৰণ্যৰ ভূমি ব্যৱহাৰৰ সিদ্ধান্ত ল’লে, তাক লৈ বিভিন্নজনৰ মাজত তীব্ৰ ক্ষোভৰ সৃষ্টি হৈছে।
উন্নয়নৰ নামত এখন বনাঞ্চলৰ অস্তিত্ব বিপন্ন কৰা এই কাৰ্যক বহুতেই সহজভাৱে ল’ব পৰা নাই, যাৰ ফলত এতিয়া ৰাজ্যজুৰি প্ৰতিক্ৰিয়াৰ সৃষ্টি হৈছে।
