শেহতীয়া বিধানসভা নিৰ্বাচনত তৃণমূল কংগ্ৰেছৰ ডাঙৰ পৰাজয়ৰ পিছত দলৰ মুৰব্বী মমতা বেনাৰ্জীয়ে এক গুৰুত্বপূৰ্ণ ঘোষণা কৰিছে। নিৰ্বাচনত প্ৰতিদ্বন্দিতা কৰা প্ৰাৰ্থীসকলৰ সৈতে হোৱা এক বৈঠকত তেওঁ স্পষ্টকৈ কয় যে যিসকলে দল এৰি অন্য দললৈ যাব বিচাৰে তেওঁলোক যাব পাৰে। তেওঁ কাকো জোৰ কৰি ধৰি নাৰাখে। বেনাৰ্জীয়ে কয় যে তেওঁ দলটোক নতুনকৈ গঢ়ি তুলিব আৰু দলত থকা সকলোকে সংগঠনটো পুনৰ শক্তিশালী কৰিবলৈ আহ্বান জনায়।
শুকুৰবাৰে মমতা বেনাৰ্জীৰ কালীঘাটৰ বাসগৃহত এই গুৰুত্বপূৰ্ণ বৈঠক অনুষ্ঠিত হয়। এই বৈঠকত দলৰ ৰাষ্ট্ৰীয় সাধাৰণ সম্পাদক অভিষেক বেনাৰ্জীও উপস্থিত আছিল। নিৰ্বাচনত শোচনীয় পৰাজয়ৰ সন্মুখীন হ’লেও তৃণমূল কংগ্ৰেছে কেতিয়াও মূৰ দোঁৱাই নিদিয়ে বুলি তেওঁ দৃঢ়তাৰে কয়। মমতা বেনাৰ্জীৰ মতে, জনসাধাৰণৰ প্ৰকৃত ৰায় লুণ্ঠন কৰা হৈছে। তেওঁ দলীয় কৰ্মীসকলক ক্ষতিগ্ৰস্ত হোৱা কাৰ্যালয়সমূহ মেৰামতি কৰি, ৰং কৰি পুনৰ মুকলি কৰিবলৈ নিৰ্দেশ দিয়ে আৰু প্ৰয়োজন হ’লে তেওঁ নিজেও ৰং কৰিব বুলি কৰ্মীসকলক উৎসাহিত কৰে।
এইবাৰৰ বিধানসভা নিৰ্বাচনত নাটকীয় পৰিৱৰ্তনৰ ফলত তৃণমূল কংগ্ৰেছে শাসন হেৰুৱাই বিৰোধীৰ আসনত বহিবলগীয়া হৈছে। ৰাজ্যখনৰ ২৯৪খন আসনৰ ভিতৰত দলটোৱে মাত্ৰ ৮০খন আসনতহে জয়লাভ কৰিবলৈ সক্ষম হয়। আনকি মমতা বেনাৰ্জী নিজেও তেওঁৰ পুৰণি সমষ্টি ভৱানীপুৰৰ পৰা পৰাজিত হয়। তৃণমূল কংগ্ৰেছে ২৯১খন আসনত প্ৰাৰ্থী দিছিল আৰু ৩খন আসন সহযোগী দল ভাৰতীয় গৰ্খা প্ৰজাতান্ত্ৰিক মৰ্চাক এৰি দিছিল। কিন্তু দলটোৰ ২১১ গৰাকী প্ৰাৰ্থী পৰাজিত হয়, যাৰ ভিতৰত কেবাগৰাকীও জ্যেষ্ঠ নেতা আৰু মন্ত্ৰীও আছিল।
নিৰ্বাচনত হাৰিবলগীয়া হোৱাৰ পিছত দলৰ ভিতৰত সৃষ্টি হোৱা অসন্তুষ্টি আৰু দলত্যাগৰ চৰ্চাৰ মাজতে এই বৈঠক আহ্বান কৰা হৈছিল। ইয়াৰ পূৰ্বে ৫ মে’ত অনুষ্ঠিত এখন সংবাদ মেলতো মমতা বেনাৰ্জীয়ে কৈছিল যে বহুতে নিজৰ বাধ্যবাধকতাৰ বাবে দল এৰি যাব পাৰে আৰু তেওঁ কাৰো ওপৰত জোৰ নকৰে। পিছত তৃণমূল কংগ্ৰেছৰ অফিচিয়েল এক্স হেণ্ডেলত এই বৈঠকৰ ফটো শ্বেয়াৰ কৰি কোৱা হয় যে অন্যায় আৰু ভাবুকিৰ মাজতো প্ৰাৰ্থীসকলে সাহসেৰে যুঁজিছিল। দলটো এটা পৰিয়ালৰ দৰে একত্ৰিত হৈ আছে আৰু সত্যৰ সদায় জয় হ’ব বুলি এক্স পোষ্টটোত উল্লেখ কৰে উক্ত পোষ্টটোত।
