তামিলনাডুত গণ ধৰ্ষণৰ বলি হৈছে অসমৰ এগৰাকী ২২ বছৰীয়া যুৱতী।
ইতিমধ্যে এই ধৰ্ষণ কাণ্ডত জড়িত থকাৰ অভিযোগত তামিলনাডু আৰক্ষীয়ে গ্ৰেপ্তাৰ কৰিছে তিনি অভিযুক্তক।
জানিব পৰা মতে অন্য তিনি অভিযুক্ত এতিয়াও পলাতক। আৰক্ষীয়ে উক্ত তিনি পলাতক অভিযুক্তক গ্ৰেপ্তাৰ কৰিবলৈ অভিযান চলাই আছে।
তিৰ্প্পুৰ জিলাৰ আৰক্ষী অধীক্ষক দিশান মিট্টালে কয় যে আৰক্ষীৰ এটা বিশেষ দলে পলাতক তিনি অভিযুক্তক কৰায়ত্ত কৰিবলৈ অভিযান অব্যাহত ৰাখিছে।
আৰক্ষীয়ে জনোৱা অনুসৰি ধৰ্ষণকাণ্ডটোত জড়িত থকাৰ অভিযোগত ইতিমধ্যে ছজনৰ বিৰুদ্ধে ভাৰতীয় দণ্ডবিধি আইনৰ ধাৰা ১৪৭, ৩৭৬ডি(গণধৰ্ষণ), ৩৮৪ আৰু ১০৯ৰ অধীনত গোচৰ ৰুজু কৰি তিনি অভিযুক্ত গ্ৰেপ্তাৰ কৰিছে।
পেলাদম মহিলা আৰক্ষীয়ে অভিযুক্ত ৰাজু(২১), কেভিন কুমাৰ(২১) আৰু এন্বু(২১) নামৰ তিনি অভিযুক্তক গ্ৰেপ্তাৰ কৰি আদালত হাজিৰ কৰোৱায় আৰু আদালতে উক্ত তিনি অভিযুক্তক ১৪ দিনৰ ন্যায়িক জিম্মালৈ প্ৰেৰণ কৰিছে।
আৰক্ষীয়ে প্ৰকাশ কৰা অনুসৰি যোৱা ২৮ ছেপ্টেম্বৰত তামিলনাডুৰ কইম্বাটোৰৰ নিৱাসী অসমৰ দৰং জিলাৰ ২২ বছৰীয়া যুৱতী গৰাকীয়ে চাকৰিৰ সংক্ৰান্তত ৰাজেশ কুমাৰ নামৰ যুৱকজনক তিৰ্প্পুৰ জিলাৰ পাল্লাডমত সাক্ষাৎ কৰিছিল।
সাক্ষাতৰ অন্তত ৰাজেশে ভাতৃ ৰাজু বাইকেৰে যুৱতীগৰাকীক বাছ ষ্টপেজত থৈ আহিবলৈ কয়।
ৰাজু নামৰ যুৱকজনে যুৱতীগৰাকীক বাছ ষ্টপেজত নথৈ কেভিন কুমাৰ আৰু এম্বুৱে আগতীয়াকৈ খাপ পিটি ৰৈ থকা এক নিৰ্জন ঠাইলৈ বাইকেৰে নিয়ে আৰু তাতে যুৱতীগৰাকীক দলৱদ্ধভাৱে ধৰ্ষণ কৰে।
