শেহতীয়াকৈ কেন্দ্ৰীয় চৰকাৰে ভাৰতীয় বন্দৰেৰে বাংলাদেশী সামগ্ৰীৰ প্ৰৱেশ নিষিদ্ধ কৰিছে। এইবাৰ ইউনুছ চৰকাৰে তিনিটা স্থল বন্দৰ সম্পূৰ্ণৰূপে বন্ধ কৰাৰ সিদ্ধান্ত লৈছে। এনে চাঞ্চল্যকৰ তথ্য শেহতীয়াকৈ চৰ্চালৈ আহিছে।
জানিব পৰা মতে, মহম্মদ ইউনুছৰ অন্তৱৰ্তীকালীন চৰকাৰে ভাৰতৰ সীমান্তৰ সমীপৰ তিনিটা স্থল বন্দৰ সম্পূৰ্ণৰূপে বন্ধ কৰাৰ সিদ্ধান্ত লৈছে।
বাতৰি অনুসৰি, বাংলাদেশ চৰকাৰে ৰংপুৰৰ নীলফামাৰীৰ চিলাহাটী স্থল বন্দৰ, চুৱাডাঙাৰ দৌলতগঞ্জ স্থল বন্দৰ আৰু ৰাঙামাটিৰ টেগামুখ স্থল বন্দৰ সম্পূৰ্ণৰূপে বন্ধ কৰাৰ সিদ্ধান্ত লৈছে।
এই সন্দৰ্ভত বাংলাদেশৰ মুখ্য উপদেষ্টা মহম্মদ ইউনুছৰ কাৰ্যালয়তো উপদেষ্টা পৰিষদৰ এখন বৈঠক অনুষ্ঠিত হৈছিল। তাত বন্দৰসমূহৰ বাবে নিৰ্ধাৰিত কমিটীয়ে এই বন্ধৰ পৰামৰ্শ পৰিষদক দিছিল। যাৰ ওপৰত পৰিষদে সন্মতি প্ৰকাশ কৰে। আৰু তাৰ পিছতে ভাৰত সীমান্তৰ সমীপৰ বন্দৰসমূহ বন্ধ কৰি দিয়া হৈছে।
সূত্ৰ অনুসৰি, বাংলাদেশৰ অন্তৱৰ্তীকালীন চৰকাৰৰ পৰিষদ কমিটীয়ে গ্ৰহণ কৰা সিদ্ধান্ত অনুসৰি বৰ্তমান বাংলাদেশৰ হাবিবগঞ্জৰ বাল্লা স্থল বন্দৰ কোচবিহাৰৰ হালদিবাৰীৰ সমীপত চিলাহাটী বন্দৰ আৰু নদিয়া জিলাৰ সমীপৰ দৌলতগঞ্জ বন্দৰ বন্ধ কৰি দিয়া হৈছে।
জানিব পৰা মতে, শ্বেখ হাছিনা চৰকাৰৰ পতনৰ পিছৰে পৰা বাংলাদেশৰ অন্তৱৰ্তীকালীন চৰকাৰে দেশৰ বিভিন্ন স্থল বন্দৰৰ বিত্তীয় জৰীপৰ নিৰ্দেশ দিছিল। আৰু সেই সমীক্ষাৰ প্ৰতিবেদনত প্ৰকাশ পাইছে চাঞ্চল্যকৰ তথ্য। ইউনুছ প্ৰশাসনৰ বিষয়াসকলে এই বন্দৰসমূহ কাৰ্যতঃ অসাৰ বুলি দাবী কৰিছে। তাৰপিছতে বন্দৰসমূহ বন্ধ কৰাৰ সিদ্ধান্ত ঘোষণা কৰা হয়।
বাতৰি অনুসৰি, অতি শীঘ্ৰে এই আঠটা স্থল বন্দৰ বন্ধ হৈ যাব। কাৰণ হিচাপে ইউনুছ চৰকাৰৰ প্ৰেছ সচিব ছফিকুল ইছলামে কয় যে এই বন্দৰসমূহ ইমান দিনে দেশৰ দুই এজন নেতাৰ বাবে ব্যৱহাৰ কৰা হৈছিল। যিটো চৰকাৰৰ বাবে প্ৰকৃততে উপযোগী নহয়। বৰং আৰ্থিক লোকচানহে হয়। ফলত অতি শীঘ্ৰে এই বন্দৰসমূহ বন্ধ কৰাৰ সিদ্ধান্ত লোৱা হৈছে।
