শনিবাৰে পুৱা বাৰাণসীৰ কাশী বিশ্বনাথ মন্দিৰ এলেকাত এক গুলী চালনাৰ ঘটনা সংঘটিত হয়। জানিব পৰা মতে, নিৰাপত্তাৰ দায়িত্বত থকা এজন পিএচি জোৱান ৰাস্তাৰ দাঁতিত থিয় হৈ আছিল আৰু সেই সময়তে তেওঁৰ হাতত থকা কাৰ্বাইন বন্দুকৰ পৰা হঠাতে এক জাঁই গুলী ওলাই যায়। এই ভয়ংকৰ দুৰ্ঘটনাত ৩ জন লোক আহত হৈছে। অৱশ্যে আটাইকেইজনৰ অৱস্থা সংকটমুক্ত।
পুৱা প্ৰায় ৭ বজাত এই ঘটনাটো ঘটে। বন্দুকৰ পৰা গুলীটো গৈ ৰাস্তাত পৰে। ইয়াৰ ফলত ৰাস্তাৰ শিলগুটি উফৰি গৈ ওচৰৰে এখন ফুলৰ দোকানত কাম কৰি থকা বিকাশ, ৰামবাবু আৰু নিখিল নামৰ তিনিজন লোকৰ গাত লাগে। লগে লগে তিনিওজন আহত ব্যক্তিক ততাতৈয়াকৈ ওচৰৰ চিকিৎসালয়লৈ লৈ যোৱা হয়, য‘ত চিকিৎসকে তেওঁলোক সংকটমুক্ত বুলি ঘোষণা কৰে।
ঘটনাটো সংঘটিত হোৱাৰ লগে লগে নিৰাপত্তাৰ দায়িত্বত থকা অন্যান্য বিষয়া আৰু আৰক্ষীৰ দলে পৰিস্থিতি নিয়ন্ত্ৰণলৈ আনে। আৰক্ষীয়ে জনোৱা মতে, মানুহৰ ভিৰ আঁতৰাই থকাৰ সময়তে দুৰ্ঘটনাবশতঃ এই গুলীচালনাৰ ঘটনা সংঘটিত হয়। বৰ্তমান আৰক্ষীয়ে উক্ত পিএচি জোৱানজনক জেৰা কৰিছে। বন্দুকটো কেনেকৈ মাটিত পৰিল আৰু তাৰ পৰা কেনেকৈ গুলী ওলাল, সেই বিষয়ে আৰক্ষীয়ে তদন্ত অব্যাহত ৰাখিছে।
উল্লেখযোগ্য যে প্ৰতিদিনে হাজাৰ হাজাৰ ভক্তই বাবা বিশ্বনাথৰ দৰ্শনৰ বাবে কাশী নগৰীলৈ আহে। সেয়েহে মন্দিৰৰ কটকটীয়া নিৰাপত্তাৰ বাবে সাধাৰণ আৰক্ষীৰ লগতে পিএচি বাহিনীকো চৌহদত নিয়োজিত কৰা হৈছে।
