তুমুল সংঘৰ্ষত তিনিজন সন্ত্ৰাসবাদীক ভাৰতীয় সেনাই গুলীয়াই নিহত কৰাৰ বিপৰীতে এই সংঘৰ্ষত সেনাৰ চাৰিজন জোৱানো আহত হৈছে।
জম্মু কাশ্মীৰৰ ছোপিয়ান জিলাত বৃহস্পতিবাৰে সংঘটিত এই সংঘৰ্ষৰ সময়তে সেনাৰ হাতত আটক হয় অল কায়দা সমৰ্থিত সন্ত্ৰাসবাদী গোটৰ এজন শীৰ্ষ নেতা।
এটা ঘৰত তিনি-চাৰিজন সন্ত্ৰাসবাদীক আৱদ্ধ কৰি ৰখা হয়। সেনাই আটক কৰা সন্ত্ৰাসবাদী সংগঠনৰ শীৰ্ষ নেতাগৰাকীৰ নাম হৈছে আনছাৰ গজওৱাট উল হিন্দ।
পাকিস্তানৰ সন্ত্ৰাসবাদী সংগঠন জইছ ই মহম্মদৰ সৈতে আনছাৰৰ ঘনিষ্ঠ যোগাযোগ আছে বুলি জানিব পৰা গৈছে।
কাশ্মীৰ আৰক্ষীয়ে জানিবলৈ দিয়ে যে তিনিজন অচিনাক্ত সন্ত্ৰাসবাদীক গুলীয়াই নিহত কৰা হৈছে। নিৰাপত্তা বাহিনীয়ে অঞ্চলটোত তালাচী অভিযান অব্যাহত ৰাখিছে।
বৃহস্পতিবাৰে গোটেই দিন সেনা আৰু সন্ত্ৰাসবাদীৰ মাজত চলা সংঘৰ্ষৰ ফলত উপত্যকাটোত উত্তেজনাই বিৰাজ কৰে।
দক্ষিম কাশ্মীৰৰ ছোপিয়ান জিলাত বিশেষ সূত্ৰৰ খৱৰ লাভ কৰি জম্মু-কাশ্মীৰ আৰক্ষী আৰু সেনাৰ এটা যৌথ দলে অভিযান চলায়। গোপন সূত্ৰৰ পৰা সন্ত্ৰাসবাদী কেইজন লুকাই থকাৰ খৱৰ লাভ কৰি অভিযানকাৰী দলটোৱে গোটেই অঞ্চলটো ঘেৰি ধৰে আৰু তালাচী আৰম্ভ কৰে।
ইয়াৰ মাজতে হঠাতে এজন সন্ত্ৰাসবাদীয়ে গুলী চলাবলৈ আৰম্ভ কৰে আৰু অভিযানকাৰী দলটোৱে তাৰ প্ৰত্যুত্তৰ দিয়ে।