সমগ্ৰ দেশজুৰি টাইম বোমাৰে ভয়ংকৰ আক্ৰমণ চলোৱাৰ পৰিকল্পনা কৰিছিল সন্ত্ৰাসবাদীয়ে। কিন্তু এই ষড়যন্ত্ৰ বাস্তৱায়িত হোৱাৰ পূৰ্বেই তদন্তকাৰীৰ জালত পৰিল ৫ জন সন্দেহযুক্ত সন্ত্ৰাসবাদী। এক গোপন অভিযান চলাই গুজৰাটৰ সন্ত্ৰাসবাদ বিৰোধী শাখা অৰ্থাৎ এটিএছে জইছ-ই-মহম্মদ সন্ত্ৰাসবাদী গোটৰ সদস্য বুলি অভিযুক্ত এই ৫ জন লোকক গ্ৰেপ্তাৰ কৰিছে। এই ঘটনা পোহৰলৈ অহাৰ লগে লগে সমগ্ৰ দেশতে তীব্ৰ চাঞ্চল্যৰ সৃষ্টি হৈছে।
এটিএছৰ সূত্ৰৰ পৰা জানিব পৰা মতে, ভাৰতৰ একাধিক স্থানত সন্ত্ৰাসবাদী আক্ৰমণ চলাবলৈ এই সন্দেহযুক্ত জইছ সদস্যকেইজনে বিস্ফোৰক সংগ্ৰহ কৰিছিল। গ্ৰেপ্তাৰ হোৱা এই ৫ জন লোক টাইম বোমাৰ লগতে আন বিভিন্ন ধৰণৰ বিস্ফোৰক বনোৱাতো পাকৈত। তদন্তকাৰীসকলে লগতে দাবী কৰিছে যে এই দলটোৱে পাকিস্তানৰ নিৰ্দেশ মৰ্মে কাম কৰি আছিল। কেৱল সেয়াই নহয়, সন্ত্ৰাসবাদী আক্ৰমণ চলাবলৈ সীমান্তৰ সিপাৰৰ পৰা পুৰণি গাড়ী কিনিবলৈও ইহঁতক নিৰ্দেশ দিয়া হৈছিল।
তদন্তকাৰীসকলৰ ফালৰ পৰা জানিব পৰা গৈছে যে প্ৰায় এসপ্তাহৰ পূৰ্বে গুজৰাট আৰু মধ্যপ্ৰদেশত জইছৰ এটা শ্লীপাৰ চেলৰ সন্ধান পোৱা গৈছিল। ইয়াৰ পিছতে তদন্ত আৰম্ভ কৰি দুয়োখন ৰাজ্যৰ পৰা ৮ জন সদস্যক গ্ৰেপ্তাৰ কৰে এটিএছে। তদন্তত পোহৰলৈ আহে যে মাদ্ৰাছাৰ আঁৰ লৈ এই গোটৰ সদস্যসকলে ছাত্ৰ-ছাত্ৰীসকলৰ মগজু ধোলাই কৰিছিল। আনকি সন্ত্ৰাসবাদী দলত নতুনকৈ নিযুক্তি আৰু আক্ৰমণৰ প্ৰশিক্ষণো দিয়া হৈছিল। এই গ্ৰেপ্তাৰৰ ঘটনাৰ পিছতে অভিযুক্তসকলক জেৰা কৰি আৰু ৫ জন জইছ সদস্যৰ সন্ধান পোৱা যায়। তাৰ পিছতে গুজৰাটৰ একাধিক জিলাত অভিযান চলাই বৃহস্পতিবাৰে এই ৫ জন লোকক গ্ৰেপ্তাৰ কৰা হয়।
তদন্তত আৰু জানিব পৰা গৈছে যে দাৰুল ইছলাম নামৰ এটা সংগঠন গঠন কৰি সন্ত্ৰাসবাদী কাৰ্যকলাপৰ পৰিকল্পনা কৰি আছিল এই সন্ত্ৰাসবাদীসকলে। গুজৰাটেই আছিল ইহঁতৰ মূল ঘাটি। ইয়াৰ পৰাই দেশৰ একাধিক ডাঙৰ চহৰত আক্ৰমণৰ ছক ৰচনা কৰা হৈছিল। এই ৫ জন অভিযুক্তক ধৰি বৰ্তমানলৈকে এই শ্লীপাৰ চেলৰ মুঠ ১৩ জন সদস্যক গ্ৰেপ্তাৰ কৰিলে গুজৰাট এটিএছে। ৰাজ্যখনৰ আন ক’ত ক’ত ইহঁতৰ নেটৱৰ্ক বিয়পি আছে সেয়া জানিবলৈ বৰ্তমান তদন্তকাৰীসকলে চেষ্টা চলাই আছে।
